Ձեր վստահելի աղբյուրը

Ժամկետային զինծառայողների ծնողներն այսօր էլ կառավարության շենքի դիմաց են։ Նրանք նշում են, որ 40 օր շարունակ իրենց որդիները եղել են կրակի ու ռումբերի տակ, հիմա չոլերում են։

«Ընկեր կորցրած, հարազատ կորցրած, տրավմա տարած վիճակը մի կողմ, թող հենց հիմա մեզ պատասխան տան, էդ երեխաները որտե՞ղ են, ի՞նչ պայմաններում են, մինչև ե՞րբ պետք է մնան, թող ասեն, ամեն օր գալիս են, ասում են, էս գյուղից դուրս եկեք, գա՞ն մեր երեխեքին մի օր վերցնեն, տանե՞ն։ Մենք մեր գերիներին չենք կարողանում վերադարձնել, հիմա մեր երեխեքին, թողնենք  գերի տանե՞ն»,- հարցեր ու մտահոգություններ են բարձրաձայնում զինծառակողների ծնողները։

Ակցիայի մասնակից Լուսինե Հարոյանը, ում որդին ևս ժամկետային զինծառայող է, լրագրողների հետ զրույցում ասաց, հինգ հոգանոց խմբով երեկ հանդիպել են Նիկոլ Փաշինյանի հետ, բայց արդյունքներն իրենց չեն բավարարել։

«Մեր երեխաներին տարբեր շրջանների զորամասերից հավաքել են Մարտունիում կամ այլ տեղերում, սարսափելի պայմաններում են։ Մենք ոչ մի երաշխիք չունենք, չունենք վստահություն պաշտոնական տեղեկատվության վերաբերյալ։ Ծնողները թող որոշեն մեր հետագա քայլերը»,- ասաց զինծառայողի մայրը։

Փաշինյանի հետ հանդիպած զինծառայողներից մեկի հայրը նրան ասել է իր մտածածը.

«Ասեցի, ոնց որ դուք էս «Արմենիա» հյուրանոցում Սերժ Սարգսյանին ասացիք՝ չեք տիրապետում իրավիճակին, քեզ քո օգնականները ճիշտ չեն զեկուցում, հիմա ձեր բառերը ձեր դեմ եմ ուղղում, չեք տիրապետում, թե ինչ վիճակում են գտնվում հայ զինվորները Ղարաբաղում։ Ձեր աշխատողները ձեզ սխալ ինֆորմացիա են տալիս։ Գիտեք, վարչապետը շատ ունակ է, խոսքերը փոխելու, իրավիճակը փոխելու ու լպրծուն պատասխաններով լղոզելու։ Այ էդ լղոզելու մասը ծնողներից մեկի սայթաքումն էր, որ հարցրեց Սոթքի մասին։ Ես ասեցի՝ հոպ, չենք շեղվում, պահանջում ենք Հայաստան վերադարձնել 18-20 տարեկաններին այստեղ ծառայությունը շարունակեն։ Ես երեսին ասեցի՝ դուրը չեկավ, որ Դուք՝ որպես գերագույն հրամանատար, պաշտպանության նախարարությունը մոռացել է զինվորներին, զինվորը մոռացված է։

Երբ ես նկարագրեցի, թե ինչ վիճակում են ապրում մեր զինվորները, Փաշինյանն ինձ պատասխանում է՝ երկու տեղանի կռավատ ես ուզում տանենք այնտեղ։ Սա պատասխա՞ն է։ Այ էդ բառերից հետո ես գտնում եմ, որ մենք էլ վարչապետ չունենք։ Հետո զգաց, որ հիմարություն է ասում, ներողություն խնդրեց։ Բայց մենք կռավատի կռի՞վ ենք տալիս։ Այո, էդ երեխաներն արժանի են քնել երկու տեղանոց կռավատների վրա, նրանց առոջությունը քայքայվել է։ Քնում են գետնի վրա, դիակների կողքին... Մեզ հավատացրին, որ կարճ ժամանակում կեցության պայմանները կփոխվեն, բայց չեմ հավատում։ Երեք զորանոց է մնացել, 20 հազար զինվորին ո՞նց եք տեղավորելու»։

Զինվորի հայրը պատմեց՝ Փաշինյանին առաջարկել է, եթե իրենք չեն կարող զինվորներին տեղափոխել, ապա ծնողները կարող են բերել։

«Ինձ ասաց՝ դա հանցագործություն է։ Պատասխանեցի՝ ես շատ լավ գիտակցում եմ, որ հանցագործություն է։ Ու այսօր ասում եմ՝ կառավարությունը մեզ դրդում է հանցագործության»,-ընդգծեց նա՝ ավելացնելով, որ նույնիսկ առաջարկել է հիմնադրամի գումարները ոչ թե պետք էր փոխանցել բյուջե, այլ պրոթեզներ ձեռք բերել վիրավորների համար, բարձրացնել պայմանագրային զինծառայողների աշխատավարձերը։

Նրան բարկացրել է Փաշինյանի տեսաուղերձը։ Զինվորի հայրը տարակուսած է՝ ուղերձում ավելի շատ կնոջը պաշտպանեց, քան զինվորների խնդրի մասին խոսեց։

«Ղարաբաղից շներին, կատուներին հավաքում բերում են, մեր զինվորն էդքան չկա՞։ Ամոթ Ձեզ։ Նիկոլ քեզ եմ ասում, ամոթ քեզ»,- ասաց նա։

Ուղիղ եթերը՝ News.am-ի։