Ձեր վստահելի աղբյուրը

«Ուղղակի շատ ամոթ է, ստացվում է, որ պարտությունը որբ է, իսկ հաղթանակն ունի 1000 տեր»,- այսպես բնութագրեց ԱԺ «Իմ քայլը» խմբակցության պատգամավոր Արմեն Խաչատրյանը որոշ գործընկերների՝ խմբակցությունից դուրս գալու և որպես անկախ պատգամավոր հանդես գալու երևույթը։

Ըստ նրա, ինչ-որ կերպ հասկանալի է, երբ պատգամավորները խմբակցությունը լքում են՝ մանդատը վայր դնելով. նրանք փորձում են իրենց ուժերն այլ բնագավառում փորձել։

Նա նշեց, որ եթե պատերազմում հայկական կողմը հաղթանակ ունենար, պատկերն այլ կլիներ, և պատգամավորները ոչ միայն խմբակցությունը չէին լքի, այլ նաև կսկսեին հեքիաթներ պատմել՝ պատերազմում իրենց ներգրավվածության և արած-չարածի մասին։

«Մենք լավ իրավիճակների համախոհ ենք, դժվար իրավիճակների ընկեր չենք։ Այդպես չի լինում»,- ասաց պատգամավորը։

Դիտարկմանը, որ եթե էլի լինեն պագտամավորներ, որոնք դուրս գան խմբակցությունից և հանդես գան որպես անկախ պատգամավորներ, հնարավոր է արդեն վարչապետի անվստահության հարցը բարձրացվի, արդյոք խմբակցությունը մտավախություն չունի այս առումով, Արմեն Խաչատրյանն արձագանքեց. «Ես ամենօրյա կապի մեջ եմ ժողովրդի հետ, և չեմ հավատում ֆեյսբուքյան գրառումներին ու մի քանի հոգու ցույցերին։ Սյունիքից, Վայոց Ձորից ինձ ասում են՝ հանկարծ հնին վերադարձ չլինի, ինչի՞ են այսքան խոսում հրաժարականի մասին, ինչի՞ են խոսում»։

Հարցին, թե արդյոք ինքը տեղյակ է եղել եռակողմ հայտարարության մասին, և որ նոյեմբերի 10-ին այն ստորագրվելու է, Արմեն Խաչատրյանը պատասխանեց՝ ոչ.

«Փաստաթղթից տեղյակ չեմ եղել, բայց այդ օրը, ստորագրումից ժամեր առաջ անմիջական կապի մեջ եմ եղել Արցախի որոշակի շրջանակների հետ, և ահազանգեր եմ ստացել՝ այլևս հնարավոր չէ շարունակել։ Ու ինձ ահազանգող մարդիկ նրանք են, որոնք անընդհատ հուսադրում էին մեզ, բայց այդ օրն արդեն տեղեկացրին, որ այլևս հնարավոր չէ, ժամերի ու րոպեների խնդիր կա։ Նրանք ասացին՝ ուժերը, որ գտնվում են Շուշիում, ոտքով էլ կարող են գալ Ստեփանակերտ, և արդեն Ստեփանակերտը պահելու խնդիր է առաջանալու։ Արդեն ծայրահեղ ծանր վիճակ էր այնտեղ»։

Ճշտող հարցին, իսկ ինչո՞ւ էր ծայրահեղ ծանր իրավիճակ ստեղծվել, արդյո՞ք այդ հարցը չպետք է ուղղել վարչապետին, իշխանական պատգամավորը պատասխանեց, որ վարչապետին ուղղելու հարցեր չունի, քանի որ Արցախում տիրող իրավիճակի մասին ինքն իմացել է Սյունիքում գտնվելով, ունի իր տեղեկությունը, և հաճախ հենց ինքն է եղել տեղեկատվության աղբյուր։

Հարցին, իսկ ի՞նչ է արել իշխանությունը, որ հայերի համար ավելի նպաստավոր պայմաններով, ավելի քիչ կորուստներով փաստաթուղթ ստորագրվեր, իմքայլական պատգամավորը պատասխանեց.

«Ես դիվանագիտական կորպուսի աշխատակից չեմ, որ ինչ-որ բան անեմ, առաջին օրվանից եղել եմ բանակի ու իմ ժողովրդի կողքին։ Ասում եք, որ համաձայնագրից անցել է 20 օր, բայց Ադրբեջանից պահանջվել էր 25 տարի, որ ինքը հասնի հաղթանակի։ Իսկ 20 օրվա ընթացքում հնարավոր չէ անգամ մի «զաչյոտի» կամ քննության պատրաստվել։ Բայց և, այս օրերին ես շատ բան եմ արել, որոնք հրապարակման ենթակա չեն»։