Ձեր վստահելի աղբյուրը

«Լինելով հայկական ընկերություն՝ հնարավոր և անհնար ամեն ինչ անելու ենք, որպեսզի կապը զարգացնենք ոչ միայն Հայաստանում, նաև աջակցենք Արցախում կապի զարգացմանը»,- լրագրողների հետ հանդիպմանն ասաց «Թիմ» ՍՊԸ համասեփականատեր Ալեքսանդր Եսայանը:

Հիշեցնենք, որ հոկտեմբերի 29-ից «ՎԵՈՆ Արմենիա» ՓԲԸ-ի (ապրանքանիշը Beeline) 100  տոկոս բաժնետոմսերը պատկանում են ՀՀ-ում հիմնադրված և գրանցված «Թիմ» ՍՊԸ-ին, որի համասեփականատերերն են Հայկ և Ալեքսանդր Եսայանները:

Նրա խոսքով, այդ աջակցությունը, որը մշակման փուլում է, կլինի ուղղակի կամ անուղղակի, մասնագիտական կամ տեխնիկական, ինչլես նաև ամեն ինչ անելու են ոչ միայն ռոումինգ ծառայություն չլինի, այլ նաև հենց կապի որակը Արցախում բարելավվի:

Հայկ Եսայանն էլ ասաց, որ այս պահին ռոումինգային ծառայություններն Արցախում ամբողջությամբ զրոյացված են, իսկ ինչ վերաբերում է հետագային՝ կախված կլինի «Ղարաբաղ տելեկոմի» հետ հարաբերություններից, թե ինչպիսի քաղաքականություն կլինի Արցախում: Նա վստահ է, որ այս հարցում կփորձեն գտնել ոսկե միջինը, Արցախի բնակչության համար լավագույն տարբերակը:

Հարցին, թե մամուլում լուրեր կային, որ Եսայան եղբայրները եղել են Արցախում, ցուցումներ են տվել «Ղարաբաղ տելեկոմին», Հայկ Եսայանն ասաց, որ միայն ինքն է եղել տեխնիկական անձնակազմի հետ միասին:

«Պատերազմից հետո 24 ժամ չանցած Արցախում էինք: Մենք իրականացրել ենք «Ղարաբաղ տելեկոմի» կապի վերականգնման աշխատանք, այդ պահին Ղարաբաղում ուղղակի կապ չկար: Եթե չկարողանայինք հասնել և օգնել, խնդիր կարող էր առաջանալ, 4-5 օր ընդհանրապես կապ չլիներ: Չեմ կարող ասել, թե ինչի պատճառով էր, որ չէր աշխատում, բայց տեխնիկական շատ մեծ խնդիր էր, տեխնիկական մեծ հարձակում էր, որի դիմաց կանգնել էր «Ղարաբաղ տելեկոմ»-ը: Առաջնագծում պատերազմի մակարդակի կարգի պատերազմ էր գնացել «Ղարաբաղ տելեկոմի» ինֆաստրուկտուրայի նկատմամբ»,- նշեց նա:

Հարցին՝ հերքե՞ք կամ հաստատե՞ք վերջերս մամուլում տարածված տեղեկություները, որ հեռախոսազանգերի արտահոսք է եղել, ընկերությունում ստուգումներ են եղել և ԱԱԾ-ն «Վեոն Արմենա» ընկերություն էր եկել խուզարկության, Հ. Եսայանն ասաց. «Ոչ մի մարմին ոչ մի խուզարկություն այս տարվա ընթացքում չի իրականացել ոչ «Վեոն Արմենիայում», ոչ «Տելեկոմ Արմենիայում»:

Հեռախոսազանգերի փոխանցում չի եղել: Հայաստանի օրենսդրությամբ՝ չես կարող զանգերը ձայնագրել: Այս ընկերության ոչ մի զանգ չի ձայնագրվում, որ փոխնացվեր: Նման բան չկա, չի եղել: Զրպարտանք է, որը փորձում են ինչ-որ ձև խանգարել կամ մեր շուկա մուտքից վախենալ: Չեմ կարող ասել՝ ով է կանգնած դրա հետևում: Նման բան գոյություն չունի»:

Նա նշեց, որ տեխնիկական անվտանգությունն իրենց առաջնային խնդիրն է: Հ. Եսայանը վստահեցրեց, որ առավելագույն ապահոված են ինֆորմացիոն արտահոսքից:

Հարցին՝ լուրեր շրջանառվեցին թուրք բաժնետիրոջ հետ կապված, Ալեքսանդր Եսայանը պատասխանեց. «Խոսքը «Վիմպելկոմ կոմունիկացիա» ընկերության խորհրդի տնօրենի մասին է, որը եղել է մինչև մեր գործարքը: Մինչև մեր գործարքը «Վիմպելոմը» եղել է «Վեոն Արմենիայի» բաժնետեր, գործարքից հետո «Վեոն Արմենիայի» հետ որևէ մեկն առանչություն չունի, բացի «Թիմ» ընկերությունից»: