Ձեր վստահելի աղբյուրը

Խորհրդարանը քննարկում է «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի նախագծի երեք դրույթների ուժի մեջ մտնելու ժամկետը մինչև 2022 թվականի հունվարի 1-ը երկարաձգելու օրենքի նախագիծը:

Հիմնական զեկուցող իմքայլական պատգամավոր Բաբկեն Թունյանի խոսքով, նախագծին տրվել էր դրական եզրակացություն, թեև շեշտվել էր, որ կան բազում մտահոգություններ՝ կապված օրենքի տնտեսական հետևանքների հետ։

«Այս պահին որոշել ենք 1 տարով հետաձգել այն դրույթները, որոնք ուժի մեջ են մտնում 2021 թվականի հունվարի 1-ից: Այդ դրույթների ուժի մեջ մտնելու ժամկետը որոշել ենք հետաձգել մեկ տարով, որ առաջինը՝ բիզնեսի վրա բացասական ազդեցությունը մեղմվի, քանի որ հիմա գտնվում ենք այլ իրավիճակում, քան գտնվում էինք օրենքն ընդունելու պահին, և երկրորդ, որպեսզի այս ընթացքում ժամանակ ունենանք նաև միջազգային գործընկերների հետ համագործակցությամբ իրականացնել ազդեցության գնահատական»,- ասաց Բաբկեն Թունյանը:

Հիշեցնենք, որ օրենքի նախագծով ծխախոտային արտադրատեսակների հրապարակային ցուցադրումը վաճառասրահներում և հանրային սննդի օբյեկտներում հունվարի 1-ից պետք է արգելվեր: Բացի այդ արգելվում էր ծխախոտային արտադրատեսակների կամ ծխախոտային արտադրատեսակների փոխարինիչների վերաբերյալ գովազդային վահանակների՝ սպառողի համար տեսանելի վայրում տեղադրումը:

Թեև առաջարկված նախագիծը տնտեսական հարցերի մշտական հանձնաժողովում դրական եզրակացություն է ստացել, բայց առողջապահության փոխնախարար Լենա Նանուշյանը վստահ է՝ ծխախոտի մասին օրենքը այն նախագիծը չէ, որ պետք է քննարկվի այս օրերին։

«Այս նախագիծը չի նպաստելու երկրի իրավիճակի բարելավմանը։ Այլ ընդհակառակը՝ հարված է հասցնելու առողջապահական համակարգին։ ՀՀ-ի համար այս դժվարի ժամանակահատվածում մեզ համար անակնկալ էր ծխախոտի օրենքին անդրադարձը։ Այս նախագծով առաջարկվում է ևս մեկ տարի շարունակել ծխախոտի անվերահսկելի գովազդը, և թույլ տալ, որ ծխախոտի տուփերը տեղակայվեն դեռահասների համար տեսանելի հատվածներում։ Բացի այդ, առաջարկվում է հետաձգել տաքացվող ծխախոտի համար նախատեսված կարգավորմանը։ Արդյո՞ք չեն ուզում, որ դրանց վրա գրվի՝ վնասակար է առողջությանը, թե՞ թողնենք արտադրողի կամակատարությանը։ Ես կարծում եմ, որ մենք չպետք է որևէ արտոնություն տանք որևէ ծխախոտային արտադրատեսակին»,- նշեց առողջապահության փոխնախարարը։