Ձեր վստահելի աղբյուրը

«Նեղ, դժվարին, Ժամանակահատվածում սոցիալական բազմաթիվ խնդիրների պայմաններում հակակառուպցիոն դատարանների այս հաճույքը մեզ վրա կնստի 5 և ավել միլիարդ դրա՞մ»,-ԱԺ-ում «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին նախագիծը  քննարկելիս արդարադատության նախարար Ռուստամ Բադասյանին հարց ուղղեց «Լուսավոր Հայաստան» խմբակցության պատգամավոր Անի Սամսոնյանը:

Նա հիշեցրեց, որ հարցում էր ուղարկել Արդարադատության նախարարությանը՝ ցանկանալով պարզել հակակոռուպցիոն դատարանների ստեղծման համար անհրաժեշտ ծախսերի քանակը և ստացել պատասխան, որ դրա համար պետք կգա մոտավորապես 4 մլրդ 508 մլն դրամ:

Տեղեկացնելով, որ 2021 թվականի բյուջեի միջոցառումներում ասվում է, որ հակակոռուպցիոն  դատարանների շենքային պայմանների ապահովման, կարիքները սպասարկող նոր շնքի կառուցման համար նախատեսված է ևս 1 մլրդ դրամ՝ հետաքրքրվեց, թե արդյոք վերջին թիվը ներառված է 4 մլրդ դրամի մեջ:

Ռուստամ Բադասյանը նշեց, որ Անի Սամսոնյանի ստացած պատասխանի 4 մլրդ 508 մլն դրամը ուժի մեջ է և տեղին չէ դրան գումարել միջնաժամկետ ծախսերի համար հատկացված ևս 1 մլրդ դրամը, քանի որ վերջին գումարով այլ խնդիրներ են լուծվում:

Բադասյանը հայտարարեց, որ այդ գումարներից բացի ԵՄ բյուջետային աջակցության ծրագրով ստացել են  9 մլն դոլարի առաջին տրանշը և համաձայնագրում նշված է, որ այն  կարող է օգտագործվել բացառապես արդարադատության ոլորտում:

«Այսինքն այս ծանր սոցիալական վիճակում մենք այդ գումարն որևէ այլ ուղղությամբ չենք կարող ծախսել»,-հայտարարեց Ռուստամ Բադասյանը:

Անի Սամսոնյանը հայտնեց, որ միայն դատարաններում չէ, որ պետք է ծախսվեն այդ գումարները, կան նաև այլ ոլորտներ, օրինակ քրեակատարողական հիմնակների վիճակի, դրանց աշխատակիցների պայմանների բարելավումը:

Արդեն ելույթում Անի Սամսոնյանը նշեց, որ այն երկրները, որոնց օրինակին հետևել է Հայաստանը հակակոռուպցիոն դատարաններ ստեղծելիս, չեն փայլում կոռուպցիայի ցածր ցուցանիշներով:

Պատգամավորը համոզված է, որ փոփոխությունները ոչ թե կնվազեցնեն կոռուպցիան դատական համակարգում, այլ կծաղկեցնեն և հավելեց, որ հակակոռուպցիոն դատարանների ստեծմամբ տեսնում է դատական համակարգ խտրականության ներմուծման միտում:

ԱՆի Սամսոնյանը անընդունելի համարեց, որ հակակոռուպցիոն դատարանի նախագահի  և դատավորների աշխատավարձերի դրուքաչափերը ավելի բարձր են մյուս դատարանների՝ ընդհուպ Վճռաբեկ դատարանի նախագահի և դատավորների աշխատավարձերից: 

«Ծաղկամանի ջուրը չփոխած, նրա մեջ դնում եք նոր ծաղիկ, որը շատ արագ թոշնելու է: Այդպիսին է դատական համակարգի բարեփոխումների ամբողջ բնութագիրը այս երկու տարիների ընթացքում»,- հայտարարեց «Լուսավոր Հայաստան» խմբակցության պատգամավոր Անի Սամսոնյանը:

Պատգամավորի համոզման, Ռուստամ բադասյանը ինքն էլ է դժգոհ իր կատարած բարեփոխումներից, բայց շարունակում է դեկորատիվ բարեփոխումները, որոնք խնդիրը չեն լուծելու, բայց ավելի են խոչընդոտներ ստեղծելու և խորացնելու դատական համակարգի պրոբլեմները

«Դատավորների միջև անհավասարություն ստեղծելով՝ դուք սերմանում եք անարադարություն, սա խտրականություն է և չի նպաստելու նրան, որ հակակոռուպցիոն դատարանի դատավորը մեկ տարի հետո չորոշի, որ պետք է զբաղվի կոռուպցիայով և այն չի բացառի ավելի ցածր աշխատավարձ ստացող դատավորներին չդիմանալ կոռուպցիայի գայթակղությանը»,- հայտարարեց Սամսոնյանը: