Ձեր վստահելի աղբյուրը

«Ոչ մեկիս համար այլևս գաղտնիք չէ, որ 2018-ին տեղի ունեցածը հատուկ գործողություն էր օտարերկրյա գործակալական ցանցի կողմից, որն ուներ շատ հստակ օրակարգ։ Այդ օրակարգն իրագործվեց Արցախի հանձնմամբ։ Այդ շրջանակները շուտով անցնելու են հաջորդ փուլին, երբ հաշտության պակմանագրեր են պատրաստվելու Ադրբեջանի ու Թուրքիայի հետ՝ մոռանալով Ցեղասպանության մասին»,- ֆեյսբուքյան ուղիղ եթերում հայտարարեց «Ադեկվադ» միաբանության հիմնադիր Արթուր Դանիելյանը։

Նրա խոսքով, այս ամենի նպատակը Հայաստանին ինքնիշխանությունից զրկելն է, Ռուսաստանից պոկելը, ապա վերջին հաշվով Ռուսաստանի կազմաքանդումը։

Հայաստանում 2018-ին տեղի ունեցածը, ըստ Դանիելյանի, ամբողջ աշխարհում փորձարկված տեխնոլոգիաների արդյունք է, ընթացքում ավելացնում էին ժողովրդի հույզերը, որպեսզի ցասում տեղի ունենա, ինչի ընթացքում մարդիկ հրաժարվեն սեփական անվտանգությունից ու պետությունից։

«Անարդարությունն էլ, կաշառակերությունն էլ, եկամուտների անարդար բաշխումը առիթ է եղել բողոքելու, ոչ թե դա եղել է բողոքի իրական պատճառը։ Իրական պատճառն եղել է այն, որ ունեցել ենք անվտանգության խնդիր ու այդ բեռը մեծամասամբ դրված է սոցիալապես ոչ ապահով մասի վրա։ Սա է եղել խնդիրը»,- ասաց Դանիելյանը՝ ավելացնելով, երբ մարդիկ մասնակցում էին իշխանափոխության ակցիաներին, բողոքում էին արժանապատվության պակասից, այն բանի համար, որ էլիտան Սպարտա կառուցելու փոխարեն, լինելով պաշարված ամրոց, փորձել է ապրել ինչպես Հոլանդիայում, որն անվտանգության խնդիր չունի։

Նրա խոսքով, հիմա հասարակությունում ստեղծված է անդունդ, այն մարդիկ, ովքեր ցանկանում են, որ ազգը փրկվի, պետք է անդունդի վրա կամուրջ կառուցեն, հասարակության երկու շերտերը մոտեցնեն իրար։

«Դա հնարավոր է անել, նույնիսկ մեկ կամ տասը տարվա խնդիր չէ, բայց դա ամենամեծ խնդիրն է։ Հաջորդ խնդիրը մեր աշխարհագրական դիրքն է, քանի որ ունենք լուրջ տարաձայնություններ ոչ բարով մեր հարևանների հետ։ Երրորդ խնդիրն անշուշտ Հայաստանում ներկայիս քաղաքական իրավիճակն է, և այդ խնդրի մարմնավորումը Նիկոլ Փաշինյանի իշխանությունն է, բայց կարևորությամբ չի զիջում առաջին երկուսին։ Հենց այս հարցը պետք է լուծենք առաջին հերթին։ Բոլոր նրանք, ովքեր ուզում են բեկում մտցնել դեպի դժոխք ուղևորվող ազգի համար, պետք է սկսեն Նիկոլ Փաշինյանից»,- նշեց նա։

Բանախոսն անհաջող է որակում Փաշինյանի դեմ քաղաքական ուժերի պայքարը, քանի որ այդ պայքարում քաղաքական բովանդակություն չկա։

Մանրամասները՝ տեսանյութում։