Ձեր վստահելի աղբյուրը

«Չի կարելի մեկնաբանել բացահայտ տգիտությունը, այն, որ Շուշին ադրբեջանական քաղաք է»,- ասուլիսում ասաց թուրքագետ Ռուբեն Մելքոնյանն՝ անդրադառնալով Շուշիի մասին Նիկոլ Փաշինյանի  հայտարարությանը։

Միաժամանակ նա նշեց, որ այս հայտարարությունն արվել է երկրի ղեկավարի կողմից խորհրարանական ամբիոնից, ու  դրան չարձագանքելը նույնպես բերում է  որոշակի տարընթերցումներ։

«Պետք է հստակ Ֆիքսել՝ Շուշին, ինչպես նաև ամբողջ Արցախը բուն հայկական տարածք է, հայկական բնօրրան է, քննարկել՝ Շուշին ադրբեջանական է եղել, չի դիմանում որևէ քննադատությանը, հեռու է պատմական օբյեկտիվությունից, փաստերի տրամաբանական  շարադրանքի մոտեցումներից։

Շուշին ոչ միայն եղել է  հայկական կարևոր քաղաքներից մեկը, կան  բազմաթիվ փաստեր, որ Շուշին Անդրկովկասի կրթական կենտրոններից է եղել»,- ասաց թուքագետը։

Ըստ Ռ.Մելքոնյանի, Շուշիի պատկանելիության հարցը վերցնել կասկածի տակ՝ բացահայտ փաստերի խեղաթյուրում է։

Նրա խոսքով, նման հայտարարություն անելով՝ բախվում են պատասխանատվության զգացողության պակասի հետ։

«Չի կարող պետական պաշտոնյան նման անլրջությամբ մոտենալ այդ հարցերին, հատկապես խիստ զգայուն հարց է, ու ԱԺ ամբիոնից խոսել գիտելիքների նման ցածր պաշարով նման զգայուն հարցերի մասին։ Անթույլատրելի է, մեծ հարված է առաջին հերթին մեր ազգային ինքնասիրությանը, մեր պետականությանը, նաև մեր պետական սկզբունքներին, քանի որ տասնամյակներ, հարյուրամյակներ շարունակ անընդհատ բախվել ենք ադրբեջանական կեղծ թեզերի հետ Արցախի, Շուշիի պատկանելիության հետ, անընդհատ հակադարձել ենք օբյեկտիվ փաստերով։ Խորհրդային ղեկավարներն ամեն կերպ  պահպանել են, պաշտպանել են Արցախի, այդ թվում Շուշիի  հայկական պատկանելիության մասին թեզը գիտական, օբյեկտիվ փաստերի վրա հիմնված։ 

Այն, ինչ հնչում է  ԱԺ-ում, ճիշտ և ճիշտ համապատասխանում է  ադրբեջանական դիրքորոշմանը, ինչ ասել են ադրբեջանցիները տարիներ շարունակ, օրեր առաջ Ալիևն իր տիկնոջ հետ թեյ էր խմում ու հայտարարում էր նույնը»,- ասաց Ռ. Մելքոնյանը։

Նա նշեց, որ կա «թյուրքական խորհուրդ» կազմակերպություն, թուրքալեզու  պետություններ են ընդգրկված, ընդամենը օրեր առաջ այդ կազմակերպությունը որոշել է 2022 թվականին Շուշին հռչակել թյուրքական աշխարհի մշակութային մայրաքաղաք, նրանց նույն առաջարկը ԱԺ-ում աջակցություն է  ստանում, ընդ որում իշխող խմբակցության լուռ համաձայնությամբ։

«Վերջին 2,5-3 տարում այսքան պատահականություն, տարբեր ոլորտներում այսքան թուրքահաճո հայացքներ, հակահայկական արարքներ, այդ ամենը տպավորություն է թողնում, որ սա ավելի շատ մշակված մի գործընթաց է, քան պատահականությունների  շղթա, քանի որ սիստեմատիկ կերպով հարվածում են մեր ազգային, պետական կարևոր ինստիտուներին, դրանց հիմքերին։ Այս վերջին հայտարարությունը նման օրինակներից մեկն է»,- ասաց թուրքագետը։

Ռ.Մելքոնյանը մի եզարահանգման է եկել. «Կարծում եմ՝պետք է Քրեական օրենսգրքով ամրագրվի, որ հայոց պատմության, մեր ազգային արժեքների, մշակույթի հանդեպ այս տոտալ վիրավորանքները պետք է պատժվեն քրեորեն, արգելվի պետական պաշտոնյաներին բարձր ամբիոններից խոսել այնպիսի թեմաների մասին,  որոնք ուղիղ վիրավորանք են մեր համազգային ինքնությանը, պետականությանը, ազգային արժեքներին։ Մենք ողբեգական ժամանակներ ենք ապրում, նման մեխանիզմների կիրառումը, ցավոք սրտի, ավելորդություն չէ»։