Ձեր վստահելի աղբյուրը

«Ինչպե՞ս կարելի է գոնե արցախյան բանակցային գործընթացի շրջանակներում ամեն ինչ մի կողմ չդնել ու չխոսել այն մարդկանց հետ, որոնք այս 30 տարիների ընթացքում բանակցային գործընթացն առաջ են տարել, ինչ-որ մի արդյունքի են հասել, որ կարողացել են թեկուզ փխրուն, բայց ոչ պատերազմ, ոչ խաղաղություն կարգավիճակը պահպանել»,- «Ձայն հայրենեաց» նախաձեռնության երրորդ ընդլայնված հավաք-քննարկմնա ժամանակ ասաց ՀՀ պաշտպանության նախկին նախարար Սեյրան Օհանյանը։

Նա հարցնում է՝ ինչպե՞ս կարելի է խոսել թավշյա հեղափոխության մասին, բայց հասարակությունը բաժանել մի քանի մասերի. «Պետության առաջնորդը հոր նման պետք է լինի, իսկ հայրը իր չարաճճի զավակին օրվա ընթացքում վատ բաների համար ապտակ է հասցնում, միևնույն է, ընթրիքի ժամանակ ասում է՝ արի նստի, միասին ընթրենք:

Այսպիսի փոխադարձ հանդուրժողականության կարող են գալ կյանքի, պետական կառավարման փորձ ունեցող մարդիկ: Անփորձ մարդիկ են մանրախնդրության գնում, որն արտահայտվել է բոլոր օղակներում՝ սկսած պետության, կառավարության կառուցվածքի ոչ ճիշտ գնահատումից, ֆինանսական միջոցների ոչ ճիշտ օգտագործումիղ, մեր ռազմավարական գործընկերոջ, հարևանների հետ հարաբերությունների վատթարացումից, վերջացրած այս բանակցային գործընթացով»։

Նա նշեց, որ նախապատերազմյան ժամանակահատվածում այսօրվա իշխանություններն ամեն ինչ արեցին, որ պատերազմ լինի՝ միգուցե չգիտակցելով, բայց շատ վատ կլինի, որ նրանք այդ ամենն իրականացրել են գիտակցելով։

Ս. Օհանյանի խոսքով, գերագույն հրամանատարը չի կարող խուսափել ռազմական կառավարումից. «Երբ որ մեր գերագույն հրամանատարն ասում է՝ ես միայն քաղաքական որոշումներ եմ ընդունում, բայց եղել են մեր ռազմական թատերաբեմում վայրեր, հատկապես այն տեղը, որտեղ մխրճում է եղել, հակառակորդը ճեղքել է մեր պաշտպանությունը, անձամբ պետք է տվյալ հատվածի  օպերացիաները հաստատեր, խորանար այդ ամեն ինչի մեջ ու համապատասխան ցուցումներ, որոշումներ ընդուներ»։

Ըստ  պաշտպանության նախկին նախարարի, այս պետական կառավարման ժամանակահատվածում չեն օգտագործվել ԱԺ հնարավորությունները, բոլոր պատգամավորների հնարավորությունները, հատկապես գործող մեծամասնության հնարավորությունները մեր երկիրը համախմբելու, մոբիլիզացնելու և տանելու հայրենական պայքարի, չեն օգտագործվել պաշտպանական ու անվտանգային հանձնաժողովի աշխատանքները բանակի հետ միասին զորահավաքն իրականացնելու համար։ Նա ընդգծեց, որ կառավարությունը պետք է ամբողջական անցներ ռազմական ռեյսերի։

Ս. Օհանյանի խոսքով, կառավարությունը պետք է խորքում աջակցություն ցուցաբերի բանակին, ապահովի ամբողջությամբ բանակի թիկունքը և տնտեսական, և իրավական առումով, քանի որ իրավական ոլորտում բազմաթիվ թերություններ են եղել։

«Ըստ էության, խախտվել է մեր այն ազգային գաղափարախոսության մեջ գոյություն ունեցող առանձնահատկությունը, որ վտանգի պահին հայ ժողովուրդը միասնական է։ Վտանգի պահին մենք միասնական չեղանք, ընդհակառակը Ալիևը հոխորտաց, ինքը սկսեց պատերազմը, իր պատերազմն անվանեց հայրենական, փոխանակ մենք  այդ ամեն ինչը հակադրեինք, ներկայացնեինք, համախմբեինք մեր ողջ ժողովրդին հայրենական պատերազմ իրականացնելու համար»,- ասաց նա։

Ս. Օհանյանը պետական կառավարման մեջ նկատել է նաև չափազանց ցածր կարգապահության մակարդակ, պատճառներից մեկն այն է, որ ոտքի վրա են բոլորը ղեկավարում, ոտքի վրա որոշումներ ընդունում։

«Եթե այս ժամանակահատվածում լիներ պետության ղեկավարության խիստ մոտեցումներն իրավական, վարչական որոշումների ընդունման, պաշտոների, կոչումների վերաբերյալ, հասկանալի կլիներ, որ պատերազմի ողջ 44 օրվա ընթացքում որոշումներ են ընդունվել, փակել են այն ճանապարհները, որոնք իրենց մեջ  թերացումներ են պարունակել։ Ընդհակառակը՝ մխրճման գոտում եղել են «Ազգային հերոս»-ի կոչումներ։ Այսինքն՝ մենք ամեն ինչ արել ենք, որ պատերազմ լինի, ամեն ինչ արել ենք, որ պատերազմում հստակ պետական կառավարում չլինի ու այդ ամբողջ նահանջը խրախուսել ենք։ Սա է այն ճանապարհը, որ այս պատերազմի ժամանակ մենք տեսել ենք։

Իհարկե, մարտավարական օղակում էլ թերացումներ, բացթողումներ եղել են, բայց եթե ինչ-որ մի ստորաբաժանումում ձախողում է լինում, այդ ստորաբաժանման հրամանատարը փոխվում է, հիմա ձախողել է պետությունը ու պետք է փոխվի։

Այսօրվա իշխանությունները, որոնք ցույց են տվել իրենց պետական կառավարման անկարողությունը, բազմաթիվ տեղերում է սա արտահայտվել, այս ամենը շարունակվում է։

Նախապատերազմյան ժամանահատվածի ձախողումները բերել են պատերազմի ձախողումների։ Նոյեմբերի 9-ի հայտարարությունը միանձնյա  մեր կառավարության ղեկավարը վերցրել է իր վրա ու ստորագրել։ Դա է պատճառը որ հունվարի 11-ին էլ առանց մեր կառավարության ղեկավարի ասել են՝ այս  4 կետը ստորագրի։

Այս իշխանությունների առկայության պայմաններում պարտությունների ու ձախողումների շարքը մշտական է լինելու։ Սա է պատճառը, որ մենք մեզ պետք է հարց տանք՝ ուզո՞ւմ ենք մշտական  այսպիսի ձախողումներ ունենալ, թե՞ ոչ։ Իհարկե, ոչ»,- ասաց նախկին նախարարը։