Ձեր վստահելի աղբյուրը

««Հայրենիքի փրկության շարժման» հաջորդ մեծ հանրահավաքը կլինի փետրվարի 18-ին։ Շարժման հայտարարություններն ուժի մեջ են. առաջիկայում լինելու են և՛ բողոքի ցույցեր, և՛ երթեր, և՛ անհնազանդության ակցիաներ»,- այսօր «Եռաբլուր» զինվորական պանթեոնում լրագրողների հետ զրույցում ասաց ՀՅԴ ԳՄ անդամ Իշխան Սաղաթելյանը։

Նրա խոսքով, ակցիաները ընդհատումներով են եղել՝ կապված և՛ եղանակային պայմանների, և՛ ստեղծված իրավիճակի հետ։ Քաղաքական գործիչը նկատեց՝ դադարի փուլը նաև ինքնակազմակերպման, անցած ճանապարհը վերագնահատելու և առաջիկա աշխատանքները ծրագրելու համար էր։

«Այո՛, մեզ մեղադրում են ոչ վճռական գործողությունների մեջ։ Բայց մենք ասել ենք, թե որն է այս չարիքի կառավարությանը հեռացնելու ճանապարհը։ Նիկոլ Փաշինյանի հեռացման համաժողովրդական պահանջ կա, բայց այդ պահանջը մենք չենք կարողացել վերափոխել համաժողովրդական պայքարի, բայց վերածելու ենք»,- շեշտեց նա։

Իշխան Սաղաթելյանը նշեց՝ բոլոր այն խոսակցությունները, թե շարժումը ավարտվել է, իրականությանը չեն համապատասխանում։

«Ես չեմ կարծում, որ հայրենիքի մեծ մասը հանձնած ու այսքան դժբախտություններ մեր ժողովրդի գլխին բերած իշխանությունը կարող է մնալ իշխանության։ Մեր կողմից վճռականություն միշտ եղել է, առաջիկայում էլ կլինի։ Եվ մինչև փետրվարի 18-ն էլ մարզային այցելությունները շարունակվելու են»,- ասաց նա։

Ինչ վերաբերում է ՀՀ երկրորդ նախագահ Ռոբերտ Քոչարյանի՝ քաղաքականություն վերադառնալուն, Իշխան Սաղաթելյանը նշեց, որ նրա վերադարձը ոչինչ չի փոխում իրենց օրակարգում, քանի որ Ռոբերտ Քոչարյանը 17-ի շարժման ասածին հակասող բան չի ասել։

«Մենք հրապարակել ենք մեր ճանապարհային քարտեզը, դրան հավատարիմ շարունակում ենք գնալ առաջ»,- նշեց ՀՅԴ-ական գործիչը։

Ըստ Իշխան Սաղաթելյանի, այս պահին արտահերթ ընտրություններ անցկացնելը կարող է բազմաթիվ վտանգներ առաջ բերել։

«Նիկոլ Փաշինյանի գլխավորությամբ ընտրություններ կազմակերպելը նշանակում է, որ երկրում շարունակելու է լինել անկայունություն, երկրում շարունակվելու է ատելության մթնոլորտն ու պառակտումը։ Ինքն ամեն ինչ անելու է վերարտադրվելու համար, որ չդատվի։ Պետք է կեղծի ընտրությունները, որ այս ամեն ինչի համար պատասխան չտա։ Այսօր ինքն ասում է՝ եկեք ես մնամ, իսկ խորհրդարանական մեծամասնությունը թող գնա տուն։ Տարօրինակ է չէ՞ այս մարդու պահվածքը։ Ինքն ամեն ինչ անում է՝ պատասխանատվությունից խուսափելու համար»,- կարծիք հայտնեց նա։

Նրա խոսքով, ժողովուրդը, ի դեմս Փաշինյանի, գործ ունի մի ծաղրածուի հետ, որը շարունակում է մոլորեցնել։

«Դա է խնդիրը։ Որ ասում են նախկիններ, այդ նախկինները հայրենիք չեն վաճառել, նախկինների պատճառով այսքան զոհ չի եղել։ Այո՛, եղել են սխալներ, բացթողումներ։ Որ խոսում են թալանից, Նիկոլ Փաշինյանից շատ այս երկիրը ոչ ոք չի թալանել»,- եզրափակեց խոսքը ՀՅԴ-ական գործիչը։