Պաշտպանը՝ դատավոր Դանիբեկյանին. Դուք կատարել եք հանցագործություն և դրա համար պետք է ենթարկվեք պատասխանատվության
«Հարգելի դատարան, ես գտնում եմ, որ դուք բացարկման ենթակա դատավոր եք ու սույն քրեական գործոց չեք կարող իրականացնել վարույթն իրականացնող մարմնի պարտականությունները»,-դիմելով դատավոր Աննա Դանիբեկայնին՝ հայտարարեց ՀՀ նախագահի աշխատակազմի նախկին ղեկավար Արմեն Գևորգյանի փաստաբան Էրիկ Ալեքսանյանը։
Նա նշեց, հանգամանքները, որոնք պատրաստվում է ներկայացնել, կվկայեն այն մասին, որ այս պահից սկսած սա օրինական դատարան չէ։
«Միջնորդության մեջ վկայակոչել եմ համապատասխան նորմատիվային ակտեր, նախադեպային որոշումներ, որոնք վերաբերում են դատական իշխանությանը։ Ընդամենը նշեմ, որ ամբողջ գաղափարը վերաբերում է նրան, որ դատարանը ոչ միայն պետք է լինի օբյեկտիվ, անաչառ ու անկողմնակալ, այլև այդպիսին պետք է երևա»,-հայտարարեց փաստաբան Ալեքսանյանը։
Պաշտպանն ընդգծեց, միչդեռ կան հանգամանքեր, որոնք վկայում են, որ դատավոր Դանիբեկյանը ոչ միայն օբյեկտիվ, անաչառ ու անկողմնակալ չէ Արմեն Գևորգյանի նկատմամբ, այլև այդպիսին չի էլ կարող երևալ։
Ալեքսանյանը մասնավորապես նշեց, որ 2020 թ. հուլիսի 9-ին սույն քրեական գործի շրջանակում ինքն էլ. փոստի միջոցով միջնորդություն է ներկայացրել, որով խնդրել է նույն օրը նշանակված նիստը հետաձգել այն պարզ պատճառով, որ Արմեն Գևորգյանի կնոջ մոտ հայտնաբերվել է կորոնավիրուս, բնականաբար Արմեն Գևորգյանը, լինելով կոնտակտավոր, չի կարողանա մասնակցել այդ նիստին։
«Միաժամանակ ես դատարանին խնդրել եմ, որ Թամարա Գևորգյանի մոտ կորոնավիրուսի հաստատման փաստը դռնբաց դատական նիստի պայմաններում չհրապարակվի՝ այն բժշկական գաղտնիք հանդիսանալու պատճառաբանությամբ։ Հետո մամուլից տեղակացանք, որ այդ տեղեկությունը հրապարակվել է դռնբաց նիստի պայմաններում ու դարձել է հանրամատչելի»,-ներկայացրեց պաշտպանը՝ ավելացնելով, որ այդ հանգամանքն առաջացրել է իրենց տարակուսանքը։
Ալեքսանյանը մանրամասնեց, երբ կապ են հաստատել դատավորի աշխատակազմի հետ, մի աշխատակից իրենց փոխանցել է՝ Դանիբեկյանը հրաժարվում է առհասարակ դրա վերաբերյալ որևէ պարզաբանում տալ։ Այնուհետ գրավոր են դիմել պարզաբանման համար, սակայն էլի պարզաբանում չեն ստացել։
«Մեր տարակուսանքն ավելի մեծացավ, քանի որ բարոյական տեսանկյունից Ձեր կողմից դրսևորած վարքագիծը որևէ կերպ չի կարող տեղավորվել ողջամիտ տրամաբանության մեջ։ Այդ ժամանակ գնահատելով Ձեր գործողությունները որպես հանցագործություն, քանի որ բոլորիս հայտնի է, որ բժշկական գաղտնիքը պաշտպանվում է նաև քրեական օրենսգրքով, և մինչ օրս մենք այն կարծիքին ենք, որ Դուք կատարել եք հանցագործություն և դրա համար պետք է ենթարկվեք պատասխանատվության»,-ասաց պաշտպանը։
Նրա խոսքով, դիմել են դատախազություն, խնդրել են մարդու անձնական կյանքի մասին տեղեկատվությունն առանց նրա համաձայնության հրապարակելու փաստով հարուցել քրեական գործ։ Փաստաբանի համոզմամբ, դատավորի արարքը երեք հանցակազմերից առնվազն մեկին համապատասխանում է՝ պաշտոնական լիազորությունների չարաշահում, պաշտոնական անփութություն, անձնական տվյալների օգտագործում կամ իրացում։
Դատախազությունն իրենց հաղորդումը վերագրել է ՀՔԾ-ին, ՀՔԾ պետի տեղակալ Ենոքյանն իրենց հայտնել է՝ իբր հաղորդումն ընդհանրական է, վերացական, կոնկրետ տվյալներ չի պարունակում հանցագործության մասին, քրգործ չի հարուցվել։ Ալեքսանյանն ասաց, դա որակել են անգործություն, բողոքարկել վերաքննության կարգով, բացի այդ հարցը քննարկման առարկա են դարձել ՄԻՊ-ի մոտ։
«Նրա ուշադրությունը հրավիրեցինք այն բանի վրա,թե ինչպես է ստացվում, որ կներեք, հարգելի դատարան, Ձեր քթի վիրահատության վերաբերյալ հրապարակված տեղեկության առումով Կենտրոն և Նորք Մարաշ քննչական բաժնում հարուցվել է քրեական գործ, այն էլ երկու հոդվածներով, իսկ մեր դեպքում, երբ խոսքը նույնպես վերաբերում է բժշկական գաղտնիքի հրապարակմանը, ոչ միայն քրեական գործ չի հարուցվել, այլև նյութեր չեն նախապատրաստվել։ Բնականաբար ՄԻՊ-ի մոտ սա ևս տարակուսանք առաջացրեց»,-ասաց պաշտպանը։
Նա մանրամասնեց, որ ՄԻՊ-ը տարբերակված մոտեցում ցուցաբերելու հարցով դիմել է դատախազություն, վերջինս նյութեր նախապատրաստելու պահանջով՝ ՀՔԾ։ Վերջինն էլ նյութեր նախապատրաստեց, որոշում կայացրեց՝ քրգործի հարուցումը մերժել։ Պաշտպանը զավեշտալի որակեց, որ նյութերի նախապատրաստման ընթացքում դատավորը չի կանչվել հարցաքննության, քանի որ կարող է դիտվել ճնշում դատավորի վրա, մինչդեռ նույն այդ կառույցը որպես վկա հարցաքննում է Ֆելիքս Թոխյանին, խուզարկում դատավոր Դավիթ Գրիգորյանի աշխատասենյակը, քրեական հետապնդում իրականացնում Հրայր Թովմասյանի նկատմամբ։
Ալեքսանյանը զավեշտալի որակեց այն, որ բոլոր պետական մարմինները փորձում են պաշտպանել Աննա Դանիբեկյանին։
«Ինչո՞ւ եք դուք բացառություն, ինչո՞ւ մյուս դատավորներին կարող են հարցաքննել, Ձեզ՝ ոչ։ Միգուցե այն հանագամքնով, որ դուք այս քրեական գործով ընտրվել եք անփոխարաինելի դատավոր։ Ձեր նկատմամաբ առկա է հատուկ վերաբերմունք»,-ասաց պաշտպանը՝ նշելով, որ դատավորը պետք է հեռանա այս գործից։
Արմեն Գևորգյանը փորձեց հայտարարությամբ հանդես գալ․ «Ամբողջ պրոցեսը հրեշավոր ծրագրի կարևոր օղակ է։ Ծրագրի հիմնական մասը բանակը որպես գլխավոր մեղավոր «նշանակելն է․․․»։ Սակայն դատավորը թույլ չտվեց շարունակել, ասելով, որ դատարանում քաղաքական հայտարարություններ չեն անում։
Իր հերթին ՀՀ երկրորդ նախագահ Ռոբերտ Քոչարյանը հիշեցրեց, որ այս դատավարությունը կապված է ընտրական և հետընտրական գործընթացների հետ, հետևաբար, չի կարող զրկված լինել քաղաքական բաղադրիչից։
«Ակնկալել, որ այս դատավարության մեջ քաղաքական կոմպոնենտ չպետք է լինի, նշանակում է ուղղակի ընդհանրապես այս գործը չլսել իր բովանդակությամբ։ Հաշվի առեք այս հանգամանքը, որ չի կարող լինել քաղաքական գործընթացի մասին դատավարություն առանց քաղաքական կոմպոնենտի», - հայտարարեց նախագահը։
Բացարկի միջնորդությանը միացան նաև պաշտպաններ Արամ Վարդևանյանը, Հայկ Ալումյանը, Հովհաննես Խուդոյանը, Միհրան Պողոսյանը և Կարեն Մեժլումյանը։
Հարակից հրապարակումներ`
- Ռոբերտ Քոչարյանը հինգ օր կբացակայի հանրապետությունից
- Արմեն Գևորգյանի պաշտպանն ինքնաբացարկ հայտնեց դատավոր Դանիբեկյանին
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ