Ձեր վստահելի աղբյուրը

Արցախյան պատերազմում վիրավորում ստացած բազմաթիվ քաղաքացիների աշխատանքի և սոցիալական հարցերի նախարարության գործարկած համակարգը մերժել է ընդգրկել 500 հազար դրամ աջակցության շահառուների ցանկում։

Այդ մասին փաստում են թե Panorama.am-ի խմբագրություն ստացած ահազանգերը, թե նախարարության ֆեյսբուքյան էջում վիրավոր զինծառայողների, նրանց հարազատների թողած մեկնաբանությունները։

«Մեր դիմումը մերժվել է։ Սակայն զինվորը ունի վիրավորում, գրանցված է եղել Ստեփանակերտի, այնուհետև Երևանի 8-րդ հիվանդսնոցում, վիրահատվել է։ Այժմ բուժման փուլում է՝ գտնվում է տանը։ Որն է պատճառը։ Ինչ տվյալներ է համադրվում»,- նախարարության էջում կարգի վերաբերյալ գրառման ներքո նման մեկնաբանություն է թողել վիրավոր զինծառայողի հարազատը։

«Ունենք 3 վիրավոր, որոնց դիմումները մերժվել են։ Թող բազան թույլ տա կցելու անհրաժեշտ փաստաթղթեր»,- առաջարկել է քաղաքացիներից մեկը։

«Բարև ձեզ, կասեք ինչպես է ստացվում, որ վիրավորում ստացած, վիրավորումից հետո Ղարաբաղում մի քանի օր մնացած, ներկա պահին բուժում ստացող անձը ՊՆ ցուցակներում չի երևում, ով պետք է պատասխանատվություն կրի ու ոնց պիտի լուծվի այս հարցը»,-,զարմանքն է արտահայտում մեկ ուրիշը։

«Զանգում ենք սոցապ, ասում են՝ զանգեք ՊՆ, Պն֊ից ուղղորդում են զինկոմիսարիատ, զինկոմիսարիատն ասումա՝ մենք դրա հետ կապ չունենք։ Հիմա եթե ներկայացրած ցանկում առկա չէ անունը, բայց շահառու է հանդիսանում, տվյալ դեպքում ու՞մ դիմել»,- հարցնում է մեկ այլ քաղաքացի։

«Ամուսինս նույնպես ստացել է վիրավորում, բայց հայտը մերժում է։ Ասացեք խնդրում եմ ում դիմենք»,- հարցնում է վիրավորի կինը։

Բոլոր նման գրառումներին նախարարությունից արձագանքել են. «Հարգելի՛ քաղաքացի, բոլոր այն անձինք, որոնց դիմումները կմերժվեն Պաշտպանության նախարարության կողմից ներկայացված ցանկում չլինելու հիմքով, վերջիններիս տվյալները ճշգրտման նպատակով կտրամադրվեն ՊՆ-ին: Կատարված ճշտումների արդյունքում՝ ծրագրի շահառու լինելու դեպքում քաղաքացին լրացուցիչ կտեղեկացվի sms հաղորդագրության միջոցով։ Այլ լրացուցիչ հարցերի դեպքում դիմել ՀՀ պաշտպանության նախարարություն»։

Խնդիրների հաջորդ մեծ խումբը, որի մասին նշել են քաղաքացիները, կապված է՝ փաստաթղթերի հետ։ Վիրավորվածներից շատերը պատերազմին մասնակցել են կամավորության սկզբունքով, նրանց մի մասի անձնագրերը դեռ զինկոմիսարիատներում են։ Իսկ առանց անձնագրային տվյալների մուտքագրման դիմումը լրացնել չի լինի։

«Հարգելի՛ քաղաքացի, անձնական տվյալների մուտքագրման խնդիրը այս պահին քննարկվում է, լրացուցիչ կտեղեկացնենք՝ ինչ անել»,- ի պատասխան նման հարցերի նշել են նախարարությունից։

Հիշեցնենք, որ պատերազմի ընթացքում վիրավորում ստացած անձանց տրվող միանվագ 500,000 դրամ աջակցության ծրագրի դիմումներն արդեն ընդունվում են։

Աջակցությունը տրվում է ռազմական գործողությունների հետևանքով վիրավորում ստացած այն անձանց, որոնք բուժհաստատություններում բժշկական օգնություն և սպասարկում են ստացել, չունեն հաշմանդամության խումբ կամ ունեն (կարող են ունենալ) հաշմանդամության երրորդ խումբ:

Դիմումներն ընդունվում են էլեկտրոնային եղանակով մինչև ապրիլի 15-ը՝ օոliոe.ssa.am կայքի «Արցախում վիրավորում ստացած անձանց աջակցության դիմում»։