Ձեր վստահելի աղբյուրը

«Այս տարվա համար հատկացվել է արդեն 900 միլիոն դրամ, որը 9 միլիոն լիտր կոնյակի սպիրտի արտահանման խթանմանն ուղղված ծրագիր է»,- կառավարության այսօրվա նիստում անդրադառնալով կոնյակի սպիրտի արտահանման տուրքի փոխհատուցմանը՝ հայտարարեց էկոնոմիկայի նախարար Վահան Քերոբյանը:

Վերջինս կառավարության անդամներին հորդորեց ուշադրություն դարձնել, որ արդեն երկու տարի է, ինչ խաղողագործները ճանապարհներ չեն փակում, խաղող չեն թափում:

«Այնուհանդերձ, հաշվի առնելով անցած տարվա խիստ ծանր վիճակը կոնյակի ու գինու արտահանման հարցում, կոնյակի սպիրտի այս ծրագիրը հույժ կարևոր է եղել, որպեսզի մենք կարողացանք մթերման ամբողջականությունն ապահովել ու չթողնել, որ մեր գյուղատնտես գործընկերները լուրջ խնդրի առջև կանգնեն»,-հայտարարեց նախարարը:

Փոխվարչապետ Մհեր Գրիգորյանը հիշեցրեց, որ նախորդ տարի խաղող մթերողներն ընդհուպ մինչև տարայի  խնդիր ունեին և մթերման գործընթացում խրախուսելու համար սուբսիդավորում էին արել:

Էկոնոմիկայի նախարարն էլ հայտնեց, որ մթերումը վերահսկելու լուրջ խնդիրներ են առաջացել, և արդեն թվային մեթոդների կիրառման անհրաժեշտություն կա գործընթացի մոնիթորինգի հարցում:

«Արդեն երեք մարզում ավարտված է խաղողի տնկարկների քարտեզագրման գործընթացը: Նախատեսում ենք այս տարի մյուս երկու մարզերում ևս ավարտել, որի արդյունքում կունենանք ամբողջական պատկեր խաղողի տնկարկների մասով և բջջային հավելվածի միջոցով կկարողանանք արդեն փակել այն շղթան, որի միջոցով կկարողանանք վերահսկել խաղողի մթերումն ամբողջությամբ»,- նշեց նախարարը:

Անդրադառնալով Սյունիքի մարզի գյուղոլորտի վիճակին՝ վարչապետի խորհրդական Ռոբերտ Ղուկասյանն էլ հայտնեց, որ սահմանամերձ բնակավայրերի բնակիչները գյուղատնտեսական աշխատանքների և անասնապահության հետ կապված խնդիրներ ունեն:

Վերջինս նկատեց, որ գյուղացիները նախկինում անասնապահական աշխատանքները ծավալում էին ավելի լայն տարածություններում, որի հնարավորությունն այսօր չունեն:

Ղուկասյանի խոսքով՝ խնդիր սուր է Որոտանում, որի վարչական շրջանը շատ փոքր է:

Նա հավաստիացրեց, որ խնդիրը լուծելու համար էկոնոմիկայի նախարարության հետ աշխատում են, շուտով կունենանք վերջնական լուծումներ՝ ջերմոցային տնտեսությունների, ինտենսիվ այգիների, խելացի անասնագոմերի հետ կապված:

Ռոբերտ Ղուկասյանը հավաստիացրեց, որ կառավարության հաջորդ նիստում կունենան վերջնական որոշումներ:

Վերջինս նաև հայտնեց, որ Սյունիքում արդեն սկսել են ականազերծման աշխատանքները: