Ձեր վստահելի աղբյուրը

«Անկախ այն հանգամանքից, թե այսօր ինչ որոշում կկայացնի դատարանը, ակնհայտ է, որ կա քաղաքական հետապնդում, քաղաքական ենթատեքստ»,- Երևանի ընդհանուր իրավասության դատարանի դիմաց լրագրողներին ասաց «Հենակետ» վերլուծական կենտրոնի ղեկավար Տիգրան Աբրահամյանը:

Հիշեցնենք, որ այստեղ քիչ անց հրապարակվելու է վերլուծաբան Կարեն Բեքարյանին խափանման միջոցի վերաբերյալ որոշումը:

Տ.Աբրահամյանի խոսքով, հատկապես վեջին շրջանում քաղաքական հետապնդումներ դրսևորվում են բոլոր այն անձանց նկատմամբ, որոնք էական ներդրում ունեն որպես փորձագետներ, ոլորտային  մասնագետներ են Արցախի հարցում, բանակցային գործընթացում, Ադրբեջանի դեմ իրականացվող գործողություններում:

«Ինչպես Կարեն Բեքարյանի, այնպես էլ այս թեմայով հետապնդումների ենթարկվող մնացած անձանց մասով, ակնհայտ է այդ քաղաքական գործոնը»,- ասաց նա:

Տ. Աբրահամյանը նշեց, որ մի կողմից սա ցույց է տալիս պետական ինստիտուտների ոչնչացված լինելը կամ այդ ճանապարհին գտնվելը, մյուս կողմից ցույց է տալիս հետպատերազմական իրավիճակում իշխանությունների բուռն ցանկությունն ամեն գնով պահելու իրենց իշխանությունը:

«Այդ ճանապարհին ով կամ ովքեր խոչընդոտ են հարուցելու, կամ իշխանության համար սպառնալիք են ստեղծելու, բոլորը միանշանակ հետապնդվելու են»,- ընդգծեց վերլուծաբանը:

Նա նշեց, որ Արա Սաղաթելյանի, Կարեն Բեքարյանի, ադրբեջանագետ Անժելա Էլիբեգովայի հետ տասնամյակից ավելի աշխատել է ամենատարբեր կառույցներում, հատկապես ակտիվ աշխատել է այն փուլում, երբ մոտ 4 տարի Արցախում էր, ամենաօրյա բոլոր խորհրդակցությունները սկսում ու ավարտվում էր նրանց հետ, մեծ ներդրում են ունեցել հակաադրբեջանական ողջ պայքարում:

«Այսօր արդեն իսկ նկատելի է հանրության բոլոր շերտերի համար, որ ցավալիորեն նրանց դեմ քաղաքական հետպանդումներ են գնում, զուգահեռ տեսնում են, թե նույն իշխանությունը Ադրբեջանի, Թուքիայի հետ ինչ գործընթաց է տանում, Հայաստանը հետպատերազմական փուլում տարածքային, մարդկային կորուստներ է ունենում: Սա անթույլատրելի գործընթաց է, բխում է միգուցե իշխանության նեղ խմբակային շահերից, բայց որևէ կերպ չի բխում Հայաստանի շահերից»,- ասաց Տիգրան Աբրահամյանը:

Հիշեցնենք, որ վերլուծաբան Կարեն Բեքարյանին, ինչպես նաև ՀՀ աշխատակազմի նախկին ղեկավար  Արա Սաղաթելյանին, մեղադրանք է առաջադրված ՀՀ ՔՕ 226 (ազգային, ռասայական կամ կրոնական թշնամանք հարուցելը), 226.2 (բռնություն գործադրելու հրապարակային կոչերը, բռնությունը հրապարակայինորեն արդարացնելը կամ քարոզելը), 307.4 (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հոդվածների հատկանիշներով: Արա Սաղաթելյանը դատարանի երեկվա որոշմամբ  կալանավորվել է: Նույն գործի շրջանակում կալանավորված է նաև Արամ Լևոնի Սարգսյանը։

Նույն հոդվածներով մեղադրանք է առաջադրվել նաև Մհեր Ավագյանին, ով երեկ ազատ է արձակվել. դատարանը ոչ իրավաչափ է ճանաչել Մհեր Ավագյանին ձերբակալելու մասին ԱԱԾ քննիչի որոշումը՝ բավարարելով պաշտպանի բողոքը, նաև դատարանը մերժել է Ավագյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։