Ձեր վստահելի աղբյուրը

«Վերջին երեք տարիներին տարածաշրջանում ամենամարտունակ բանակը փորձեցին պարզապես փոշիացնել»,- «Հայելի» մամուլի ակումբում հայտնեց Երևանի ավագանու «Բարգավաճ Հայաստան» խմբակցության անդամ Հռիփսիմե Առաքելյանը:

Նրա խոսքով՝ այս ընթացքում փորձեցին ստեղծել այն միֆը, որ Հայաստանի բանակը ոչ զինվոր ունի, ոչ բարձրաստիճան սպայակազմ և մանիպուլյացիաների միջոցով հրամանատարական կազմին փորձում էին լռեցնել:

Ավագանու անդամը հավելեց՝ պատերազմից հետո էլ իշխանական ուժը հայտարարում էր, որ պարտվել ենք, որովհետև բանակը և հայ զինվորը չի կռվել:

«Սա ուղղակի շարքային սիրկայություն էր բանակի նկատմամբ»,- նշեց Հռիփսիմե Առաքելյանը՝ հավելելով, որ այդ ամենից հետո ԳՇ հայտարարությունը բեկումնային է և միայն բանակը կարող է կանգնեցնել հայրենազրկման գործընթացը:

Բանախոսը զարմանքով նկատեց, որ 44 օրվա պատերազմի ժամանակ միջազգային, մասնավորապես՝ եվրոպական կառույցները չէին արձագանքում, իսկ նախորդ օրը եվրոպական բոլոր հեռուտաալիքները մտահոգվում էին Հայաստանում հնարավոր «հեղաշրջումով», իսկ Թուրքիայի ԱԳ նախարարի արձագանքը զարհուրելի համարեց:

«Պատմության մեջ սևով սպիտակի վրա կգրվի, որ Հայաստանի այս հողատուին, անմիջապես պաշտպանեց Թուրքիայի ԱԳ նախարար Չավուշօղլուն և Էրդողանի մամուլի խոսնակը»,- հայտարարեց Հռիփսիմե Առաքելյանը:

Նա շեշտեց, որ բանակը քաղաքական գործընթաներին չի խառնվում, այլ պաշտպանում է հայ ժողվորդին, հայոց պետականությունը և անվտանգությունը, և ժողովուրդը պետք է կանգնի նրա թիկունքին:

Հռիփսիմե Առաքելյանը գտնում է՝ իրենք են մեղավոր, որ Նիկոլ Փաշինյանը կարողանում է հանրահավաք անել այն դեպքում, երբ մի քանի ամիս առաջ բունկերից բունկեր էր փախչում:

Տարակուսելով, որ այսքանից հետո դեռ Փաշինյանին սատարողներ կան՝ ավագանու անդամը հարցրեց. «Զարմանում եմ՝ «Այո, մենք քեզ աջակցում ենք, հանձնիր մեզ թուրքին», սա՞ է Փաշինյանին աջակցողների կրեդոն»: