Կառավարությունն առաջարկում է բյուջեում կատարված վերաբաշխումները փորձաքննության չենթարկել
Խորհրդարանը քննարկում է «Նորմատիվ իրավական ակտերի մասին» ՀՀ օրենքում փոփոխություններ և լրացումներ կատարելու մասին օրենքի նախագիծը։
Հիմնական զեկուցող ՀՀ արդարադատության փոխնախարար Վահե Դանիելյանի խոսքով, նախագծով առաջարկվում է նորմատիվ իրավական ակտերի համար հանրային քննարկում նախատեսել նաև պատգամավորների և խմբակցությունների նախաձեռնությամբ։
«Հանրային քննարկումը պետք է սահմանվի ԱԺ կանոնակարգով, և նաև ժամկետներ են հստակեցվել այս մասով։ Առաջարկվում է լրացնել փորձաքննության ոչ ենթակա ակտերի շրջանակը, մասնավորապես՝ փորձաքննության չեն ենթարկվի բյուջեների վերաբաշխման կատարումն ապահովող միջոցառումների վերաբերյալ նախագծերը, 100 տոկոս պետության սեփականությանը պատկանող բաժնեմաս ունեցող ՓԲԸ-ների, ՊՈԱԿ-ների ստեղծման կամ լուծարման նախագծերը։
Սահմանվել է, որ հավասար իրավական ուժ ունեցող նորմատիվ իրավական ակտերի դրույթների միջև անհամապատասխանության դեպքում առաջնահերթ կիրառվելու են ավելի ուշ ուժի մեջ մտած նորմատիվ իրավական ակտերը»,- ներկայացրեց փոխնախարարը։
Նա տեղեկացրեց, որ նախագծով առաջարկվում է բացի նորմատիվ իրավական ակտերի էլեկտրոնային եղանակով հրապարակման տարբերակը, նաև նախատեսել պաշտոնական տեղեկագրում դրանց հրատարակումը։
«Նաև սահմանվում է, որ ԵԱՏՄ բարձրագույն խորհրդի նորմատիվ իրավական ակտերը գործելու են անմիջական, սակայն դրանց ընդունվելուց հետո՝ մինչև ուժի մեջ մտնելու համար սահմանված ժամկետը, պետք է թարգմանվեն և հրապարակվեն՝ դրանով իսկ հասանելի ու պարտադիր դառնալով հանրության համար։ Բացի այդ, ներմուծվում է նորմատիվ իրավական ակտը չեղյալ հայտարարելու ինստիտուտը։ Ըստ այդմ, չեղյալ կարող է համարվել այն նորմատիվ իրավական ակտը, որն ընդունվել, բայց դեռևս ուժի մեջ չի մտել»,- նշեց Վահե Դանիելյանը։
ԱԺ «Լուսավոր Հայաստան» խմբակցության պատգամավոր Կարեն Սիմոնյանը հետաքրքրվեց, թե բյուջեում կատարված վերաբաշխումներն ինչո՞ւ չպետք է ենթարկվեն փորձաքննության։
Ի պատասխան՝ Վահե Դանիելյանը նշեց, որ բյուջեի վերաբաշխումը լինում է Կառավարության որոշմամբ, և այդ որոշումները մեծ քանակ են կազմում, ու մեծամասամբ՝ տեխնիկական բնույթ ունեն։