«Մեր տնտեսության նման վիճակում պատասխանատու հանքարդյունաբերության կողմնակից եմ այս փուլում»
«Ես ինքս պատասխանատու հանքարդյունաբերության կողմնակից եմ այս փուլում, մեր տնտեսության այս վիճակում»,- այս մասին հայտարարեց ՀՀ Շրջակա միջավայրի նախարար Ռոմանոս Պետրոսյանը՝ «Ազատություն» ռադիոկայանի ֆեյսբուքյան ասուլիսի ընթացքում՝ պատասխանելով Ամուլսարի շահագործմանը վերաբերող հարցին։
Նրա խոսքով, Ամուլսարի խնդիրն այս պահին առկախված է՝պայմանավորված քննչական կոմիտեում քնվող քրգործի առկայությամբ։
Ըստ նախարարի, ինքը մի քանի անգամ առիթ ունեցել է այդ մասին խոսելու։ Ռոմանոս Պետրոսյանը նշեց՝ եթե առաջանան այնպիսի օբյեկտիվ իրողություններ, որոնք կասկածի տակ կդնեն թդ ՇՄԱԳ փորձաքննության դրական եզրակացությունը, թե մյուս ինստիտուցիոնալ փաստաթղթերը, լիցենզիաները, որոնք թույլ են տալիս տնտեսվարողին շահագործելու Ամուլսարի ոսկու հանքավայրը, այդ դեպքում, ըստ նրա, իր լիազորությունների և իրավասությունների շրջանակում կմիջամտի, որ հանքը չշահագործվի։
«Իսկ եթե նման օբյեկտիվ իրականություն գոյություն չունի և բոլոր փաստարկները քննվելուց հետո պարզվի, որ որևէ օբյեկտիվ խանգարող հանգամանք, փաստ գոյություն չունի, ապա նախարարությունը ինստիտուցիոնար առումով որևէ գործիքակազմ և իրավասություն չունի միջամտելու։ Այս պահին տվյալ տնտեսվարողն ունի բոլոր թույլտվությունները՝ ընդերքօգտագործման իրավունքը և մնացած լիցենզիաները, որպեսզի շահագործի։ Սակայն մեր բնապահպանները երկար ժամանակով փակել էին ճանապարհները և տնտեսվարողը այդպես էլ երկար ժամանակով չկարողացավ շահագործել, ապա քրգործի փուլը մտավ»,- ասաց նախարարը։
Ամփոփելով խոսքը Ռոմանոս Պետրոսյանը նշեց, որ ՀՀ-ում այսօր մեկ տասնյակ հանքավայր է շահագործվում և բոլոր հանքավայրերում էլ կան ակնառու խնդիրներ։
Պետրոսյանը նաև խոստովանեց, որ այսօր, ցավոք, վերահսկողական ինստիտուտները, պետական պատկան մարմինները իրենց կարողությունների շրջանակներում որքան էլ որ հակազդում կամ վարչարարություն են իրականացնում, խոշոր հաշվով չեն կարողանում ոլորտում բեկումնային փոփոխություններ անել։
«Այո, մի կողմից գուցե պատկան մարմինների անատամության կամ ոչ ճիշտ վարչարարության արդյունք է, բայց մյուս կողմից էլ՝ տնտեսվարողի վարքի , էկոդաստիարակության հետ կապված խնդիրներ կան, որոնք շտկելու համար ժամանակ է պահանջվում»,- նշեց նա։
Թեև, ըստ նախարարի, ոլորտում կան վերահսկողության հետ կապված խնդիրներ, այդուհանդերձ, դա նախարարին չկաշկանդեց «գովելու» Ամուլսարի նախագիծը։
«Որքանով, որ ես հասցրել եմ թե որպես քաղաքացի, թե որպես պաշտոնյա ուսումնասիրել Ամուլսարի նախագիծը, բնապահպանի կողմից վեր հանած մտահոգությունները, խոշոր հաշվով Ամուլսարի հանքարդյունահանման նախագիծը, կանխարգելիչ միջոցառումները բավականին ներկայանալի են։ Ինձ հույս է ներշնչում այդ հանգամանքը, ուստի եթե ունենանք հավուր պատշաճի պետական վերահսկողություն, և եթե չլինի այնպիսի օբյեկտիվ իրականություն՝ վերհանված քրգործի վարույթով, որ հստակ խնդիր առաջանա կասեցնելու շահագործումը, ապա տնտեսվարողը պետք է շահագործի հանքավայրը։ Տնտեսվարողը պետք է պետական խիստ վերահսկողության ներքո, հարկերը վճարի, համայնքներում սոցիալական ծրագրեր իրականացնի և դա տնտեսական էֆեկտ պետք է ունենա մեր տնտեսության վրա»,- ասաց նա։
Բոլոր դեպքում, ըստ նրա, այս պահին որևէ որոշում չունեն, քանի դեռ քրգործը չի հանգուցալուծվել։
Հարակից հրապարակումներ`
- Գիտակից քաղաքացիները չեն թողնելու Ամուլսարի շահագործումը. բնապահպան
- Դավաճանական պարտություն և եղերական պատերազմ մարսողը Ամուլսար էլ կմարսի․ Հայկ Մարտիրոսյան
- Հայաստանի սահմանների փոքրանալուց հետո Ամուլսարն այլևս կենսատարածք է. Ջերմուկի բնակիչ
- Գեղամ Օհանյան. Կանցնեն տարիներ, հետո կհիշենք բոլորով՝ Նիկոլի օրոք կար մի խնդիր Ամուլսար անունով
- Գնդեվազցիները փակել են Ամուլսար գնացող ճանապարհը
Լրահոս
Տեսանյութեր
«Ազատություն քաղբանտարկյալներին». ակցիա՝ Հայաստանում ԵՄ պատվիրակության գրասենյակի դիմաց