Ձեր վստահելի աղբյուրը

«Մենք ունենք ակնկալիք, որ մեր երկրի Սահմանադրությունը չի ոտնահարվի և նախագահն ամբողջությամբ կպահպանի այն»,- ԱԺ դիմաց լրագրողներին ասաց ՀՅԴ ԳՄ ներկայացուցիչ, Հայրենիքի փրկության շարժման համակագող Իշխան Սաղաթելյանը՝ պատասխանելով հարցին, թե ի՞նչ ակնկալիքներ ունենք ՀՀ նախագահից ԳՇ պետ Օնիկ Գասպարյանին պաշտոնից ազատելու մասին Փաշինյանը դիմումը ՍԴ ուղարկելու կամ չուղարկելու վերաբերյալ:

Նա նշեց, որ իրենք ունեն ակնկալիք և այսօրվա իրենց հանրահավաքի նպատակներից մեկն էլ հենց դա է՝ զուգահեռ ԱԺ նիստ է կայանալու, առաջիկա երկու ժամում որոշվելու է՝ նախագահն ուղարկում է  առաջարկությունը ՍԴ, թե ոչ:

«Այս ամեն ինչը շատ կարևոր նշանակություն ունի, դրա համար ևս մեկ անգամ կոչ եմ անում գալ այս պայքարի հրապարակ, քանի որ Հայաստանի քաղաքական օրակարգն այլևս թելադրվում է  այս հրապարակից»,- ասաց Ի. Սաղաթելյանը:

Նա ընդգծեց՝ երկիրը չպետք է տանեն ցնցումների, ամեն ինչ արվելու է սրանց հեռացնելու համար, քանի որ սրանք վերջնականապես մեր երկիրն ու պետությունը տանում են կործանման:
«Մեր քայլերի արդյունքում շատ հստակ Փաշինյանն օրեցօր, րոպե-րոպե կորցնում է  իր իշխանությունը»,- ասաց ՀՅԴ-ական գործիչը:

Նա նշեց, որ «Իմ քայլը» խմբակցության անդամները պատասխանատվություն են կրում երկրի համար, պետք է հասկանան դա ու դուրս գան ուսապարկի կարգավիճակից:

«Ի՞նչ է նշանակում բանակը գեներալները չեն, սպաները չեն: Բա ո՞վ է: Դո՞ւք եք: Ո՞վ է բանակը: ՔՊ ջոկա՞տն է, թե՞ Էռատոյի ջոկատն է: Այս մարդիկ շարունակում են չհասկանալ մեր երկրում ստեղծված իրավիճակը, իրենց համար իրենց պարգևավճարն ու աշխատավարձը շատ ավելի կարևոր է, քան մեր բանակը, պետությունը: Այս մարդանց վզին 10 հազար հայ մարդու արյուն կա ու սրանք առանց կաշկանդվելու, ամաչելու ինչ որ բաներից են խոսում»,- ասաց Իշխան Սաղաթելյանը:

Նա ընդգծեց՝ մեր երկիրը վտանգի մեջ է, Փաշինյանն արդեն իր հանցագործությունների 4-րդ շղթայի մեջ է մտնել:

«Այս մադը բոլոր կարմիր գծերը փորձում է անցել: Բանակը ռազմական հեղաշրջման փորձ չի արել: Բանակն իրեն, մեր պետականությունը պահպանելու համար ընդամենն արել է  նախազգուշացում  և  հստակ ներկայացրել է իր պահանջը՝ այս մարդը պետք է գնա,  որպեսզի փրկվենք: Եթե բանակը ցանկանար ռազմական հեղաշրջում աներ, արդեն վաղուց արած կլիներ: Բանակը նաև հստակ ասել է՝ չփորձեք ժողովրդի նկատմամբ ուժ կիրառել:

Բանակը թող շարունակի զբաղվել իր գործով: Մենք բանակի կողքին ենք,   որովհետև բանակին չպետք է թողնենք մենակ: Եթե Նիկոլը կարողացավ ոչնչացել մեր բանակը, ամեն ինչ շատ հստակ է ու վերջնական՝ կորցնում ենք պետականությունը: Իր հանցագործությունների 4-րդ  շղթայով ուզում է լուծել այդ հարցը: Սա չպետք է թույլ տանք: Մենք պետք է կանգնենք բանակի կողին, բանակը՝ պետության, և հետևողական քայլերի և գործողությունների արդյունքում հեռացնենք այս մարդուն, փրկենք մեր հայրենիքը, փորձենք նոր որակի իշխանություն ունենալ, որը կկարողանա երկրի առաջ ծառացած մարտահրավերները լուծել»,- ասաց Իշխան Սաղաթելյանը:

Նա նշեց, որ իրենք շարունակում են մնալ այն կարծիքին, որ պետք է երկրում անցկացվեն խորհրդարանական ընտրություններ, բայց պահանջը նույնն է՝ առանց Նիկոլի:

«Իր հանրահավաքով մեկ անգամ ևս ապացուցեց, որ ամեն ինչի դիմելու է վերարտադրման համար»,- ասաց Իշխան Սաղաթելյանը: