Նիկոլը շատ վախեցած է, ու ուզում է մի քիչ էլ մեզ վախեցնի. մանկական խաղ է. Վազգեն Մանուկյան
«Եթե Նիկոլ Փաշինյանն օրենքը խախտելով, այնուամենայնիվ, հրամանագիր ստորագրի, որ Օնիկ Գասպարյանին հանի իր պաշտոնից, ապա իմ տեղեկություններով, բանակը չի համաձայնելու դրան, քանի որ բանակը հասկանում է՝ սա անձի հարց չի»,- այսօր Բաղրամյան պողոտայում «Հայրենիքի փրկության շարժման» հանրահավաքից առաջ լրագրողների հետ զրույցում ասաց շարժման վարչապետի միասնական թեկնածու Վազգեն Մանուկյանը։
Նրա խոսքով, Օնիկ Գասպարյանն այն պարկեշտ մարդկանցից մեկն է, ում համար պաշտոնը չի կարևոր. այստեղ լուծվում է բանակի հարցը։
«Եթե ինքը դուրս գա, դա նշանակում է, որ ինքը թույլ կտա կորպուսի բոլոր հրամանատարներին փոխել ու փչացնել ամբողջ ռազմական ուժը, ինչպես դա Նիկոլ Փաշինյանն արեց իշխանության գալուց, երբ կոռուպցիա էր փնտրում բանակում։ Ամեն դեպքում, բանակը չի համաձայնի ու թույլ չի տա։ Իսկ եթե դա թույլ տրվեց, ապա կստացվի, որ Արմեն Սարգսյանը մի ստորագրությամբ ջարդում է բանակը»,- կարծիք հայտնեց Վազգեն Մանուկյանը։
Նա նշեց, որ չի լսել որևէ իրավաբանի կարծիք, որտեղ ասվում է, թե Նիկոլ Փաշինյանի հրամանագիրը համապատասխանում է Սահմանադրությանը։
«Եկեք նայեք, Սահմանադրության մեջ նշված է, որ շտաբի պետը նշանակվում է որոշակի ժամանակահատվածով, և այդ պաշտոնից նրան ոչ ոք չի կարող հանել, եթե իհարկե, քրեական հանցագործություն ինքը չի կատարել։ Օրենքի մեջ այդ ժամկետը նշված է՝ 5 տարի»,- նշեց նա։
Հարցին, թե ինչ է կարծում ինքը՝ Արմեն Սարգսյանի վրա ճնշումներ եղե՞լ են, Վազգեն Մանուկյանը պատասխանեց՝ ասելով, որ եթե հաշվի առնվի վերջին 2.5 տարվա Նիկոլ Փաշինյանի կառավարման ձևը, ապա միանշանակ, ճնշումներ եղել են։
«Դա իմ անձնական կարծիքն է, ես որևէ հստակ փաստ չունեմ։ Ես Արմեն Սարգսյանի հետ հանդիպումից տպավորություն ստացա, որ ինքը և՛ մտահոգված էր փաստաթղթի ստորագրմամբ, և մտահոգված էր, թե՛ ստորագրած փաստաթուղթը ինչ բորբոքվածություն կարող է առաջացնել հասարակության մեջ։ Բոլորն էլ ցանկություն ունեն, որ քիչ բորբոքվածությամբ լինի այս խնդրի լուծումը»,- ասաց նա։
Շարժման վարչապետի միասնական թեկնածուն հիշեցրեց՝ իրենց հիմնական խնդիրն այն է, որ Նիկոլ Փաշինյանը գնա։
Հարցին, թե ինչպես է վերաբերում Նիկոլ Փաշինյանի հայտարարությանը, որ կարող է սահմանադրական փոփոխություններ լինեն, և խորհրդարանականից անցում կատարվի կիսանախագահական կառավարման համակարգի, Վազգեն Մանուկյանը պատասխանեց.
«Սահմանադրական փոփոխություններ միշտ էլ կարելի է անել։ Նիկոլն ուզում է, որ ընտրություններն արվեն իր օրոք։ Այսինքն՝ ինչպես հրապարակում տարբեր շրջաններից 15 հազար մարդկանց հավաքեց, այդ նույն ձևով ուզում է ընտրություններ անցկացնել ու ասել՝ ժողովուրդն ինձ ընտրեց։ Մենք համաձայն ենք արտահերթ ընտրություններին, բայց դա պետք է լինի Նիկոլ Փաշինյանի հրաժարականից հետո»։
Հարցին, թե ԱԺ շենքի մոտ դիպուկահարներ կան տեղակայված, հնարավո՞ր է հանրահավաքի մասնակիցների նկատմամբ ուժի կիրառում լինի, Վազգեն Մանուկյանը պատասխանեց՝ ասելով, որ Նիկոլը մանկական խաղ է խաղում։
«Նիկոլը շատ վախեցած է, ու ուզում է մի քիչ էլ մեզ վախեցնի. մանկական խաղ է։ «На войне как на войне»»,- եզրափակեց խոսքը Վազգեն Մանուկյանը։
Հարակից հրապարակումներ`
- ԱԺ պատշգամբից զենքներն ուղղել են դեպի հանրահավաքի մասնակիցները
- Շարժում. «Ժամը 16:00-ին՝ բոլորս դեպի Բաղրամյան պողոտա»
- Հանրահավաքի ժամանակ հնարավոր են սադրանքներ. Ոստիկանություն