Ձեր վստահելի աղբյուրը

Նիկոլ Փաշինյանի, ԱԱԾ նախկին տնօրեն Ա. Վանեցյանի և ՀՔԾ պետ Ս. Խաչատրյանի հեռախոսային խոսակցությունները ապօրինի ձայնագրառելու և համացանցում տարածելու դեպքի առթիվ ՀՀ քրեական օրենսգրքի 146-րդ հոդվածի 1-ին մասով և  ՀՀ քրեական օրենսգրքի 254-րդ հոդվածի  3-րդ մասի 4-րդ կետով հարուցված քրեական գործի նախաքննությունը շարունակվում է: Այս մասին Panorama.am-ին հայտնեցին քննչական կոմիտեից՝ նշելով, որ այս գործով Փաշինյանը, Վանեցյանը, Խաչատրյանը  էլ ճանաչվել են որպես տուժող և հարցաքննվել:

Ինչ վերաբերում է 2018թ. սեպտեմբերի 11-ին զանգվածային լրատվության միջոցներով «ՀՀ ԱԱԾ տնօրենի  և  ՀՀ ՀՔԾ պետի խոսակցությունը հայտնվել է համացանցում» վերտառությամբ հրապարակումներում տեղ գտած պաշտոնեական լիազորություններն անցնելու առկայությունը մատնանշող տվյալների հիման վրա ՀՀ քրեական օրենսգրքի 309-րդ հոդվածի 1-ին մասով (պաշտոնեական լիազորություններն անցնելը) հարուցված քրեական գործին, ապա 04.02.2020թ. հիշյալ քրեական գործով վարույթը ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի հիմքով՝ հանցակազմի բացակայություն, կարճվել է:

Ձայնագրությունից պարզ է դառնում, որ ՀՀ երկրորդ նախագահ Ռոբերտ Քոչարյանի, ԶՈւ ԳՇ նախկին պետ Յուրի Խաչատուրովի ձերբակալությունը, ապա կալանավորումը համաձայնեցվում է անձամբ Նիկոլ Փաշինյանի հետ։ Իսկ ՀՔԾ պետ Սասուն խաչատրանը նշում է՝ դատավորին կասի Խաչատուրովի նկատմամբ մեծ գրավ կկիրառեն։