Ձեր վստահելի աղբյուրը

Երևանի պետական համալսարանի հոգաբարձուների խորհրդի անդամներից 11-ը դիմում են գրել խորհրդի կազմից դուրս գալու համար։ Panorama.am-ը տեղեկացավ Երևանի պետական համալսարանի ուսխորհրդի նախագահ, ԵՊՀ հոգաբարձուների խորհրդի անդամ Դավիթ Ափոյանից:

«Երեկ հոգաբարձուների խորհրդի քարտուղարից մենք նամակ ստացանք, որ 11 անդամներ դիմում են գրել հոգաբարձուների խորհրդի  կազմից դուրս գալու համար: Դիմում գրողները հոգաբարձուների խորհրդի կառավարության լիազոր մարմնի կողմից ներկայացված անդամներ են: Որևէ պատճառ գրված չէ, այլ միայն՝  խնդրում եմ դադարեցնել  իմ լիազորությունները հոգաբարձուների խորհրդի կազմում:

Պարզից էլ պարզ է, որ այստեղ կա հրահանգավորված գործողություն: Պարզ է, որ առավոտյան չեն արթանացել քնից և 11 հոգի միասին որոշել, որ իրենց ծանրաբեռնվածությունը չի ներելու, պետք է դուրս գան»,- ասաց նա:

Ըստ Դ.Ափոյանի, ինչ-որ մի պլան են մշակել, որը երևի թե վերջնարդյունքի չի հասել կամ հասել է. «Ինչու եմ կարծում՝ երևի թե չի հասել, որովհետև հոգաբարձուների խորհուրդը լուծարվում է կեսից ավելիի հրաժարականի դեպքում, բայց դեռ չունենք կեսից ավելիի հրաժարական:

Այս դեպքում ունենք որոշումների կայացման, քվորման խնդիր: Որոշումներ կան, օրինակ ռեկտորի ընտրության հարցը, 2/3-ով պետք է ձևավորվի: Այսօր իրավաբանների խորհրդակցության կարիք ունենք, կարծում եմ, մինչև առաջիկա խորհրդի նիստը, որը կայանալու է չորեքշաբթի, մենք այդ հարցերը կկարգավորենք: Հուսով եմ՝ կկարողանք խորհրդի նիստ գումարենք»:

ԵՊՀ  ուսխորհրդի նախագահը նշեց, որ կառավարությունն անպատասխանատու քայլեր է անում, հրաժարական տված անդամները չեն հասկանում իրենց գործողության բարոյական և իրավական հետևանքները:

«Այն, ինչ նրանք անում են համալսարանի հետ, մեզ թույլ են տալիս եզրակացնել, որ այդ մարդիկ չեն գիտակցում համալսարանի դերն ու նշանակությունը, իրենց վրա դրված պատասխանատվության չափը, համալսարանը որպես արժեք չեն հասկանում, չեն վերաբերում համալսարանին որպես ազգային արժեք: 

Նրանք շարժվում են մի սկզբունքով՝ կամ մեր ուզածով եք անում, կամ ոչինչ չեք կարողանա անել, կամ ռեկտորը կլինի մեր մարդը, կամ համալսարանը ռեկտոր չի ունենա»,- ասաց Դ. Ափոյանը:

Նա կառավարության գործողությունները կապում է ԵՊՀ ռեկտորի ընտրության հետ:

«Բացի նրանից, որ մենք կարող ենք հստակ եզրակացնել, որ այս մարդիկ համալսարանի հանդեպ չարացած են, այս փուլում նրանց գործողություններն առանձնահատուկ կապված են ռեկտորի ընտրության գործընթացի հետ, որ նրանք չունեն իրենց թեկնածուն, այդ մարդիկ դեռևս չեն գտնել իրենց երդում տված անձին, դրա համար գործողություններ են անում, որ ռեկտորի ընտրություն չկայանա,  որովհետև կայանալու դեպքում հնարավոր է իրենց թեկնածուն չանցնի»,- նշեց Դ. Ափոյանը:

Երևանի պետական համալսարանի հոգաբարձուների խորհուրդը կազմված է 32 անդամից՝ կառավարության ներկայացուցիչներ (16 հոգի) և բուհի կողմից առաջադրված անդամներ(16 հոգի): Փաստորեն, կառավարության 16 ներկայացուցչից 11-ն է հրաժարականի դիմում գրել: Դ. Ափոյանը հույս ունի, որ հինգ անդամները չեն գրի: Միաժամանակ չբացառեց, որ կարող են էլի դիմումներ լինեն:

«Կան մարդիկ, որոնցից չեմ սպասում, որ կգրեն, հույս ունեմ՝ սպասելիքներս կարդարանան»,- նշեց նա:

Ինչ վերաբերում է հոգաբարձուների խորհրդի անդամների ընտրությանը, Դ. Ափոյանն ասաց, որ հստակ կարգ սահմանված չէ նոր անդամների ընտրության վերաբերյալ, և այդ բացն իշխանություններին հնարավորություն է տալիս, որ նրանք ձգեն այնքան, մինչև  «Բարձրագույն կրթության մասին» նոր օրենքի նախագիծը մտնի ուժի մեջ, եթե այն ստորագրի Հանրապետության նախագահը:

«Իսկ նոր օրենքի նախագծի ուժի մեջ մտնելու դեպքում արդեն տոտալ վերահսկողություն կունենան բուհերի վրա, քանի որ նոր նախագծով հոգաբարձուների խորհրդի 9 անդամներից 5 արդեն իրենցն է, ցանկացած որոշում կամակատար 5 անդամներով կարող են անցկացնել անկախ նրանից՝ բուհը դեմ է, թե կողմ է»,- ասաց նա:

Դավիթ Ափոյանն ընդգծեց՝ երկու տարի հետևողականորեն իջեցնում են համալսարանի վարկանիշը, համալսարանում անկայունություն է մտել, տուժել է կրթությանը, համալսարանի գործունեությունը:

«Ոնց որ այս մարդիկ ինչքան հնարավոր վատ բան կա, անում են համալսարանի հետ: Սա էլ հերթական վատությունն է համալսարանին»,- ասաց Երևանի պետական համալսարանի ուսխորհրդի նախագահ, ԵՊՀ հոգաբարձուների խորհրդի անդամ Դավիթ Ափոյանը: