Իմքայլականների ծափերը ոչ թե Հայաստանի, այլ՝ իրենց ապագա մանդատի համար էին. Մարուքյան
«Մինչ օրս ոչ մի ապացույց չի ներկայացվել առ այն, որ ԳՇ նախկին պետ Օնիկ Գասպարյանի և 40-ից ավելի բարձրաստիճան սպաների՝ Փաշինյանի հրաժարականը պահանջող հայտարարությունը Սերժ Սարգսյանի հրանանգով է ստորագրվել»,- այսօր խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։
Նրա խոսքով, իշխանությունները հանիրավի մարդկանց մեղադրում և վարկաբեկում են, երբ տեսնում են, որ նրանց հետ այլևս գնալու ճանապարհ չունեն։
«Ո՞նց եղավ, որ բաժանվելուց հետո եք սկսում իրար մասին ինչ-որ բաներ ասել, որոնց վերաբերյալ հանրությունը որևէ ապացույց չունի»,- ասաց նա, և միևնույն ժամանակ շեշտեց, որ չի պատրաստվում գնալ և ծանոթանալ գաղտնի նյութերին, որոնք իբր փաստելու են, որ Օնիկ Գասպարյանն ասել է՝ «հակառակորդը ոչ մի առաջխաղացում չի ունեցել, բանակը, ԶՈւ-ն կատարում են իրենց խնդիրը, և մինչև վերջ կկատարեն»։
Ըստ նրա, քանի որ Փաշինյանն է գաղտնի տեղեկություն հրապարակել, այսինքն՝ եթե նա ԱԽ նիստի արձանագրությունից հղում է արել, ապա ինքն էլ պիտի ապացուցի, որ ինքն է ճիշտը։
«Այս ամենը բերում է համոզման, որ մեզ քննություն է պետք, ճշմարտությունը պարզել է պետք, այլապես, ով ավելի բարձր գոռա ամբիոնից, պարզվելու է, որ ինքն է ճիշտ ասում»,- ասաց նա։
Ըստ Մարուքյանի, ինքը երբ էլ ուզի, կարող է ծանոթանալ ԱԽ նիստի արձանագրությանը, բայց չի ուզում, քանի որ դա գաղտնի արձանագրություն է, ու ինքը դրա մասին չի կարողանալու խոսել։
«Ես ուզում եմ, որ ամողջ արձանագրությունը հրապարակվի, քանի որ Փաշինյանը կարող է ելույթի իրենց ձեռնտու կտորն է հրապարակել։ Եվ բացի այդ, վստա՞հ եք, որ ճիշտ է հրապարակվել, Օնիկ Գասպարյանն ասում է՝ խեղաթյուրված են այդ փաստերը»,- նշեց նա։
Էդմոն Մարուքյանն անդրադարձավ նաև Փաշինյանի այն հայտարարությանը, թե Օնիկ Գասպարյանը գաղտնի հանդիպել է ՀՀ երրորդ նախագահ Սերժ Սարսգյանին։ Նա նշեց, որ իր տեղեկություններով, երբ երկրում սկսվել են ցնցումներ, ԳՇ պետը Փաշինյանի հրամանով սկսել է հանդիպել քաղաքական ուժերի ղեկավարների հետ՝ այդ թվում և իր։
«Հետո կանգնել ու ասել, որ եթե դու այդ ուժերի հետ հանդիպել ես, ուրեմն համագործակցում ես նրանց հետ, որ պետական հեղաշրջում անես, լուրջ չէ»,- շեշտեց նա։
Ինչ վերաբերում է Փաշինյանի երեկվա ելույթին, ապա ըստ ԼՀԿ առաջնորդի, դա նախընտրական քարոզարշավի մեկնարկ էր։ Իսկ ահա Փաշինյանի ելույթից հետո հնչած ծափերը, Մարուքյանի խոսքով, ուղիղ կապ ունեն նախընտրական ցուցակների հետ։
«Ցուցակները կազմելուց հաշվի են առնելու՝ ով առաջինը կանգնեց, ով ավելի ուժեղ ծափ տվեց։ Իմքայլականների երեկվա ծափերի ուժգնությունն ուղիղ կապ ունի նախընտրական ցուցակում իրենց համարների հետ։ Թե չէ պարզ է, որ իրենք Հայաստանի ապագային հավատացող մարդիկ չեն, ուղղակի իրենց մանդատի ապագային են ուզում հավատալ»,- կարծիք հայնտեց նա։
Հարակից հրապարակումներ`
- Էլինար Վարդանյան. Ծափեր նոր Եռաբլուրի հիմնադրին
- Ճեպազրույցի ընթացքում Ալեն Սիմոնյանն ինքն իրեն ծափահարեց ու գնաց
- Փաշինյանի «հուզիչ ճառին» հաջորդեցին իմքայլականների հոտնկայս ծափերը