Ձեր վստահելի աղբյուրը

Հայաստանում ՌԴ դեսպանության մոտ հավաքվել են անհետ կորած, զոհված  զինծառայողների հարազատները, խնդրում են հանդիպում ՀՀ-ում ՌԴ դեսպանի հետ՝ խնդրելու ՌԴ-ին օգնել Հայաստանին վերադարձնել գերիներին:

«Անհետ կորած երեխաների ծնողներով հավաքվում ենք, քանի որ շատ ենք դիմումներ գրել, առ այսօր պատասխան չենք ստացել:  Այսօր մի պատասխան տվողն ել ՌԴ-ն է, քանի որ կնքած պայմանագիր կա, որ հողերը տալու դեպքում պետք է մեր երեխաներին հետ վերադարձնեն: Հողերը տվել ենք, երեխաներին հետ չեն տվել: Ամեն օր ադրբեջանցիները  կադրեր են գցում, թե ինչպես են տանջամահ անում մեր երեխաներին»,- լրագրողներին ասաց զոհված զինծառայողներից մեկի հայրը՝  Ռոման Գևորգյանը:

Նա նշեց, որ գերիների հարցը մնացել է օդում կախված, պատրաստ են դիմել ամեն տեղ, եթե մարդկային լեզվով չհասկանան, ծնողները պատրաստ են ամեն ինչի:

«Ակտիվ ծնողները, որոնք միշտ խոսում են, պահանջում են,  խնդիրներ են առաջացնում, մեկ օր անց իրենց ԴՆԹ հաստատվում է: Անհասկանալի է սա, ոչ մեկ չի հավատում, որ իրենց երեխաներն են: Ոչ ոք չի հավատում: Այնպիսի վիճակ է, ոնց որ ասեն՝ բրդենք, գնանք, մեշոկը տալիս են ու ասում են՝ ձերն է, մենակ ոսկորներ են:
Հանելու եմ իմ երեխայի դին գերեզմանից, բերեմ, դնեմ կառավարության դիմաց, ոնց տվել եմ, իմ երեխուն բերեն տան ինձ: 
Խնդրում ենք բոլորին՝ ոտքի կանգնել, այսօր անհետ կորած երեխաները բոլորի երեխաներն են, ազգի համար են կորել: Բոլորս միասնական լինենք, մեր երեխաներին մեկ վայրկյան շուտ հետ բերենք»,- ասաց Ռ.Գևորգյանը:

Նա նշեց, որ այսօր Հայաստանն ունի 800-ից ավելի գերի:

«Հաստատ կա: Հարցն այն է, որ ջանքեր գործադրեն ու բերեն այս երեխաներին: Եթե չբերեն, երկրի վիճակը ահավոր է լինելու, ոչ մի ծնող թույլ չի տա, որ մարդիկ հանգիստ ապրեն: Պետք է մեր երեխաներին հետ տան մեզ:

Մենք պարտադրելու ենք, պետք լինի՝ ամբողջ քաղաքն էլ կփակենք, մեզ ոչ ոք չի կարող կանգնեցնել:  Մի քիչ ոտքերը պնդացրել են, մտածում են՝ վերջ, մոռացան հերոսների, անհետ կորածների ծնողներին: Առաջ շաբաթը տաս անգամ կընդունեին, հիմա  պետք է հերթագրվես, սպասես, ասում են՝ խառն է  պարոն Փաշինյանը: Բա որ մեզ չընդունի, ո՞ւմ պետք է ընդունի»,- ասաց զոհված զինծառայողի հայրը:

Նրանց չհաջողվեց հանդիպել դեսպանի հետ, խնդրեցին, կոչ արեցին բոորին ոտքի կանգնեն, վաղը ժամը 12:00-ին լինեն ՌԴ դեսպանության դիմաց, որից հետո կշարժվեն կառավարություն: