Ձեր վստահելի աղբյուրը

 Գործադիրն այսօր չզեկուցվող հարցերի շարքում ընդունեց  2019 թվականի նոյեմբերի 21-ին իր հաստատած N 1666-Ն որոշման մեջ փոփոխություններ և լրացումներ կատարելու մասին նախագիծը:

Նախագծով առաջարկվում է 2021 թվականի պետական բյուջեից շուրջ 2 մլրդ դրամ ուղղել 1988-1992 թթ. Ադրբեջանից բռնագաղթած անձանց բնակապահովման ծրագրի 3-րդ փուլի իրականացմանը:

«Ծրագրի  առաջին փուլն  ուղղված էր լուծելու Երևան քաղաքի Աջափնյակ, Նորք Մարաշ, Մալաթիա-Սեբաստիա, Ավան, Քանաքեռ-Զեյթուն վարչական շրջանների ժամանակավոր կացարաններում բնակվող առաջնահերթ ծրագրի շահառու հանդիսացող 1988-1992 թվականներին Ադրբեջանից բռնագաղթած  ընտանիքների  բնակարններով ապահովման խնդիրը։ Ընթացքի մեջ  է ծրագրի երկրորդ փուլը, որով  բնակարանների գնման վկայագրեր են  տրամադրվում  Երևան քաղաքի Կենտրոն, Էրեբունի, Նոր Նորք, Արաբկիր, Դավթաշեն վարչական շրջաններում բնակվող  շահառուներին։ Հայաստանի Հանրապետության 2021 թվականի պետական բյուջեով նախատեսված բյուջետային ծախսերի տնտեսագիտական դասակարգման «Այլ կապիտալ դրամաշնորհներ» հոդվածով արդեն իսկ նախատեսված է 2,169,750.0 հազ. դրամ ուղղել Միգրացիոն ծառայությանը ծրագրի  երրորդ  փուլի  իրականացման  համար՝ Շենգավիթ վարչական շրջանի ժամանակավոր կացարաններում  բնակվող  Ադրբեջանից բռնի տեղահանված առաջնահերթ կարիքավոր ընտանիքներին  բնակարանների գնման վկայագրեր տրամադրելու նպատակով»,- ասվում է հիմնավորման մեջ։

Ծրագրի երկու փուլերի շրջանակներում, ընդհանուր առմամբ, հատկացվել է 183 բնակարանի գնման վկայագրեր, որոնցից 44 տոկոսը (81 վկայագիր) իրացված է, իսկ մնացածը գտնվում են իրացման փուլում:

Հատկացված դրամական միջոցներով նախատեսվում է երրորդ փուլով լուծել Շենգավիթում բնակվող 168 հավակնորդ շահառու ընտանիքի բնակարանային խնդիրը:

Հիմնավորման մեջ ասվում է, որ ծրագրի իրականացման ընթացքում ի հայտ են  եկել մի շարք  խնդիրներ,  որոնց  լուծումը  հնարավոր  է որոշմամբ սահմանված  ընթացակարգերը լրամշակելու, առանձին դեպքերում  հստակեցնելու միջոցով։

«Անհրաժեշտություն  է  առաջացել  ծրագրում  ներառել  դրույթ՝ վկայագիրը  ստանալուց  հետո դրա  շուրջ դատական վեճ առաջանալու  դեպքում  վկայագրի գործողության ժամկետը կասեցնելու վերաբերյալ,
-որոշմամբ հաստատված հավելվածի  38-րդ  կետը  վերաշարադրվել  է, հստակ  դասակարգվել  են  վկայագրի միջոցով ձեռք  բերվող բնակարանի գնի վճարման հետ կապված  բոլոր հնարավոր դեպքերը և պահանջվող  փաստաղթղթերի  ցանկը,
-հստակեցվել  է  նաև ԲԳՎ  ստացած  անձի  կողմից հիփոթեքային վարկի միջոցներ ներգրավելու ցանկության  դեպքում  վճարումների  կատարման ընթացակարգը»,-գրված է հիմնավորման մեջ։