Ձեր վստահելի աղբյուրը

«Եթե մենք՝ հերոս տղաների ծնողներս, չդառնանք այս պետության առանցքը, ապա այս պետությունն ապագա չի կարող ունենալ»,- այս մասին «Ճշմարտություն սերունդների համար» նախաձեռնության կողմից զոհվածների ծնողների մասնակցությամբ կազմակերպված քննարկման ժամանակ ասաց նախաձեռնության հիմնադիր Գեղամ Նազարյանը։

«Մենք հիմա այսպես հանգիստ նստած քննարկում ենք, սակայն մեր հոգիներում փոթորիկ է։ Եթե այդ փոթորիկն ուզում եք հանդարտվի, ապա միակ ելքը այս ոճրագործության մեղավորներին հայկական Նյուրենբերգյան դատավարության միջով անցնելն է։ Հակառակ պարագայում իրավիճակը դուրս կգա նորմալ վերահսկողությունից, քանի որ որևէ մեկին չթվա, որ մենք հենց այնպես անցնելու ենք գնանք՝ ասենք ոչինչ, զոհվեցին։ Մենք գիտենք, թե ովքեր են մեղավորները և նրանք պետք է պատասխան տան»,- ասաց նա։

Գեղամ Նազարյանը, ում որդին ևս զոհվել է արցախյան պատերազմի ընթացքում, դիմելով հանրությանն ասաց․

«Պատերազմը մեր տուն բերեց Նիկոլը, իր հոր տնից բերեց, թե որտեղից, բայց մենք մեր երեխեքին մեր տնից էինք բերել։ Մեր երեխեքը նպատակներ ունեին, երազանքներ ունեին, մենք էլ ունեինք, դուք խլեցիք մեզնից մեր էրեխեքին՝ պատերազմ բերելով»։

Անդրադառնալով Փաշինյանի այն հայտարարությանը, թե իր ընտանիքը մասնակցել է պատերազմին և ամենաթեժ կռվի տեղերում է եղել, Գեղամ Նազարյանն արձագանքեց․

«Մենք գիտենք, թե որտեղ են եղել։ Երբ մեր տղերքը զոհվում էին, նրանք խորոված էին ուտում պատերազմի օրերին, կադրերը կան, կարող եք չկասկածել։ Աշոտիկը որտեղ էր խորոված ուտում ծանր կռվի ժամանակ։ Մենք գիտենք, թե քո էռատոյի բունկերը որ գյուղում է, Գորիսի շրջանում, որտեղ ֆոտոսեսիաներ էր անում ֆենած մազերով։ Մենք այդ ամեն ինչը գիտենք և ծանր պատասխան եք տալու, շատ ծանր»։

Զոհված զինծառայողի հայրը նաև նշեց. «Եթե չլինի այդ Նյուրենբերգյան դատավարությունը, մենք բոլորով՝ ծնողներով, հարազատներով, դուրս ենք գալու փողոց և քշենք տանենք ձեզ՝ բոլորիդ, խելքներդ գլուխներդ հավաքեք»։

Նազարյանը նաև դիմեց Կենտրոնական ընտրական հանձնաժողովին, որ ոչ մի դեպքում չգրանցել ոչ Նիկոլին, ոչ էլ ուսապարկերին պատգամավորի թեկնածու։

«Դա մեզ վիրավորում է։ Նրանք պետք է դատարանում ցուցմունքներ տան, պատասխաններ տան և ոչ թե մասնակցեն ընտրություններին։ Մենք շուրջ կես տարի պայքարում ենք, որ Նիկոլը պետք է հրաժարական տա, Նիկոլը պետք է բանտում լինի, իսկ այսօր մեզ ուզում են ասել, որ նա պետք է մասնակցի խորհրդարանական ընտրություններին»,- ընդգծեց նա։

Նախաձեռնության հիմնադիրը տեղեկացրեց, որ նման հավաքները շարունակական բնույթ են կրելու և ավելի մեծ կազմով։