Կապիտուլյացիոն ակտի ստորագրումից հետո չենք տեսնում, որ իշխանությունները սթափվել են. Զաքարյան
Երկրում իրավիճակը ծայրահեղ ծանր է, և մեր կուսակցությունը ստեղծվել է հենց այդ ծանր պայմաններում՝ սյունիքյան կորիզով, թեև բոլորս էլ հասկանում ենք, որ Սյունիքը չի կարող առանձին լինել, պարզապես հայրենիքի վերականգնման համար անհրաժեշտ քայլերը սկսել ենք Սյունիքից։ Այս մասին այսօր «Վերածնվող Հայաստան» կուսակցության համագումարից հետո լրագրողների հետ զրույցում ասաց Մեղրի խոշորացված համայնքի ղեկավար Մխիթար Զաքարյանը։
«Սա տեղային կուսակցություն չէ, համահայկական է։ Իրադարձությունների տրամաբանությունը բերել է նրան, որ մենք պետք է համախմբվենք»,- նշեց նա։
Անդրադառնալով Մեղրիում տիրող իրավիճակին՝ համայնքապետը նշեց, որ այնտեղ, ինչպես և ողջ Սյունիքում իրավիճակը նույնն է՝ անորոշ։
«Նոյեմբերի 9-ի այդ չարաբաստիկ ակտի ստորագրումից հետո մենք առ այսօր չենք տեսնում մեր իշխանությունների սթափվելու ցանկությունը»,- նշեց նա, ապա հավելեց, որ համեմատած մյուս տարածաշրջանների, Մեղրիում իրավիճակը փոքր-ինչ բարվոք է, դա էլ ռուս խաղաղապահների շնորհիվ։
Բայց և այնպես, Մխիթար Զաքարյանը նկատեց՝ պետությունը պաշտպանված է այն ժամանակ, երբ այդ պաշտպանությունն իրականացնում է իր սեփական պաշտպանական համակարգերի միջոցով, ինչը զարգացնելուն միտված ներկայիս քայլերը բավարարող չեն։
Ինչ վերաբերում է Մեղրու միջանցքի հետ կապված հարցերին, ապա նա նշեց, որ որևէ տեսանելի քայլ չի իրականացվում այդ ուղղությամբ, դեռ ամեն բան անորոշ է.
«Շինարարական աշխատանքները վերաբերում ենք ՌԴ սահմանապահ ուժերի տեղակայմանը»։
Միթար Զաքարյանն անդրադարձավ նաև Ագարակի մաքսային պահեստին, որը ՊԵԿ նախագահի հրամանով դադարեցրել էր աշխատանքները։ Համայնքապետը նշեց, որ մաքսային պահեստը դեռ չի աշխատում։
««Ագարակ Տերմինալ» ՍՊԸ-ն իմ ընտանիքին է պատկանում, իմ ընտանիքի սեփականությունն է։ Իմ կարծիքով ՊԵԿ ղեկավարության ապօրինի հրամանով է փակվել այն։ Մենք դիմել ենք վարչական դատարան, և հույս ունենք, որ արդարությունը կվերականգնվի»,- նշեց նա։
Հարակից հրապարակումներ`
- Սյունիքն է Հայաստանի ողնաշարը, և միայն այդ ողնաշարն ուղղելով կարող է Հայաստանն առաջ շարժվել. Աննա Գրիգորյան
- Մենք եկել ենք առաջարկելու ոչ թե պոպուլիստական, այլ՝ իրատեսական լուծումներ. Վահե Հակոբյան