Ձեր վստահելի աղբյուրը

«Կարծես, դուք ընդունել էիք այդ սուպերվաչապետական մոտեցումը, բայց անհասկանալի է, և ձեր թիմակիցը ղեկավարել է այդ կառույցը, երբ իր օրոք նա լոյալ է եղել թալանչիական, կոռումպացված կոստյումին»,- կառավարության հետ հարցուպատասխանի ժամանակ Փաշինյանին դիմեց «Լուսավոր Հայաստան» խմբակցության պատգամավոր Արմեն Եղիազարյանը՝ ներկայացնելով հաշվեքննիչ պալատի կողմից  Աշխատանքի և սոցիալական հարցերի նախարարությունում 2019 թվականին հայտնաբերված աղաղակող չարաշահման դեպքերը, երբ  մահացածն իր մահից երկու օր անց պրոթեզավորվել էր և անձամբ դիմում գրել:

Պատգամավորն ընթերցեց Հաշվեքննիչ պալատի բացահայտումները, ըստ որոնց՝ լսողկան սարքեր և հաշմանդամության սայլակներ են ձեռք բերվել այն մարդկանց համար, որոնցից 67-ը երկրում չեն եղել, նրանցից 40-ը՝ մինչև 2019 թ. էին լքել ՀՀ-ն:

Ըստ զեկույցի՝ Սյունիքի պրոթեզավորման վճարները 59 հազարով ավել են եղել, քան նախատեսված է եղել մրցույթի արդյունքում կնքված պայմանագրում, իսկ անօթևանների համար նախատեսված ծախսերը 22 հազար անձով ավել է արվել, որը 16 մլն դրամից ավել գերածախսի պատճառ է դարձել:

Պատգամավորը տեղեկացրեց, որ տուն-ինտերնատի բնակիչների անունով կատարվել են անշարժ գույքի գործարքներ, որոնցից 10 -ը եղել է առանց խնամակալի մասնակցության և տուն- ինտերնատի շահառուն, տնօրենի գրավոր պարզաբանմամբ, չի լքել այն, բայց 2019 թվականի մայիսին և օգոստոսին գործարքներ է կնքել Կադաստրի կոմիտեում և արդյունքում վաճառել է իր անշարժ գույքը:

Հաշվեքննիչ պալատի  զեկույցում նաև ասված է, որ 2019 թվականի փետրվարի 6-ին քաղաքացին մահացել է, սակայն մահից հետո ժառանգություն է ձևակերպվել և կադաստրում գործարքներ են կատարվել:

Նիկոլ Փաշինյանն էլ հակադարձեց, որ Երանի ավագանու ընդդիմադիր անդամի մեքենայի վրա աշխատավարձեր էին դուրս գրվել, իսկ ԱԺ ընդդիմադիր խմբակցության ղեկավարը պետական բյուջեից, որպես Երևանում բնակարան չունեցող պատգամավոր, գումարներ է ստացել և իր ընտանիքին պատկանող բնակարանի հիփոթեքային վարկն է փակել:

Արմեն Եղիզարյանն անտրամաբանական համարեց քաղաքական հիմքերով կառուցած10-20 հազար դրամի դեպքը միլիոնավոր դոլարների չարաշահման դեպքի հետ համեմատելը:

«Քաղաքական  ենթատեքստով գործերը պետք չէ կապել կոռումպացված համակարգի հետ, որը գլխավորել է ձեր թիմակիցը, կուսակցության անդամը և այստեղ նախկիններ չկան, այն եղել է 2019 թվականին և այստեղ ամբողջովին դուք եք կրում պատասխանատվությունը»,-հայտարարեց «Լուսավոր Հայաստան» խմբակցության պատգամավորը:

Նիկոլ Փաշինյանն էլ հայտնեց, որ ողջունում է Հաշվեքննիչ պալատի եզրակացությունը, իսկ իր կողմից նշանակված, իրեն  մերձավոր երկու պաշտոնյա արդեն 1.5 տարի է ինչ բանտում են՝ ատկատ ու կաշառք վերցնելու մեղադրանքով: