Վարդևանյանի միջնորդությունը՝ դատական նիստերը տևական ժամանակ հետաձգելու վերաբերյալ, մերժվեց
Երևանի ընդհանուր իրավասության դատարանը (Շենգավիթի նստավայր), նախագահությամբ դատավոր Աննա Դանիբեկյանի, հետաձգեց ԵԴ/0253/01/19 գործով քննությունը։
Նախկին փոխվարչապետ Արմեն Գևորգյանի փաստաբան Էրիկ Ալեքսանյանը միջնորդեց հետաձգել դատական նիստը՝ հաշվի առնելով այն հանգամանքը, որ պարոն Գևորգյանն ունի առողջական խնդիրներ, այդ պատճառով չի կարողացել ներկայանալ դատական նիստին և լիարժեքորեն իրացնել իր պաշտպանության իրավունքը որպես դատավարական իրավունքների ամբողջություն:
Նա առաջարկեց նիստը նշանակել մայիսի 25-ից ոչ շուտ:
Դատավորը հետաքրքրվեց, թե ինչո՞ւ մայիսի 25-ից ոչ շուտ:
Է. Ալեքսանյանն ասաց, որ Արմեն Գևորգյանը մոտ մեկ ամիս գտնվելու է ամբուլատոր հսկողության տակ:
«Այդ պատճառով մայիսի 25-ից շուտ չի կարող ներկայանալ դատական նիստին»,- ասաց պաշտպանը:
Դատարանին ներկայացվել են նաև փաստաթղթեր, որոնց համաձայն, ըստ Ա. Դանիբեկյանի, Արմեն Գևորգյանը դուրս է գրվել ստացիոնարից մայիսի 6-ին և խորհուրդ է տրվել ամբուլատոր հսկողություն մեկ ամիս:
ՀՀ երկրորդ նախագահ Ռոբերտ Քոչարյանի պաշտպան Արամ Վարդևանյանը միջնորդեց հաջորդ նիստը նշանակել հունիսի 20-ին նշանակված արտահերթ խորհրդարանական ընտրություններից հետո:
«Հունիսի 20-ին կայանալու են ԱԺ արտահերթ ընտրություններ, որին մասնակցել է սույն գործով իմ պաշտպանյալ երկրորդ նախագահ Ռոբերտ Քոչարյանը: Ի վերջո ընտրություններն ունենալու են որոշակի մրցակցություն ենթադրող բաղադրիչ, ընտրություններին մասնակցող անձիք ևս պետք է ունենան հավասար պայմաններ:
Տվյալ դեպքում գործ ունենք մի վարույթի հետ, որտեղ չկան տուժողներ, որի պայմաններում հանրային շահը, յուրաքանրչյուր անձի, այդ թվում սույն գործով մասնակից անձի ընտրություններին լիարժեք մասնակցելու, ավելի գերակա է: Դրանից ելնելով՝ առաջարկում եմ հաջորդ նիստը նշանակել հունիսի 20-ից հետո այն պարզ պատճառով, որ Հայաստանում նշանակված են արտահերթ խորհրդարանական ընտրություններ»,- ասաց Ա. Վարդևանյանը:
Դատավորի հարցին՝ թե ձեր վկայակոչաված հանգամանքներն որքանո՞վ կարող են խանգարել դատական նիստին, պաշտպանն ասաց՝ մի շարք պատճառներով. «Նախագահ Քոչարյանը գլխավորելու է «Հայաստան» դաշինքի ցուցակը՝ լինելով առաջին համարը, ինչը ենթադրում է քարոզարշավի, ընտրական իրավունքի բոլոր բաղադրիչների իրացում: Ենթադրենք, նշանակում եք նիստը, ինչպես միշտ, երեքշաբթի, այդ օրը պետք է հանդիպում լինի ընտրողների հետ որևէ մարզում: Այդ պայմաններում ստացվում է հանրային արժեք ընտրվելու և ընտրելու իրավունքի իրացումը ստորադասվելու է դատաքննության իրավունքին այն պայմաններում, երբ այստեղ չկա տուժող, այսինքն հանրային գերակայող արժեք որպես այդպիսին:
Ի վերջո մենք առավել քան շահագրգռված ենք արագ ժամկետում ավարտվի այս դատական նիստը, ի վերջո նորություն չեմ ասի՝ հիմնավոր կասկածը չհաղթահարված մեղադրանքի մասին է խոսքը գնում: Մյուս կողմից, կարծում եմ, ընտրվելու իրավունքը որպես արժեք այս պայմաններում գերկա է, որովհետև վերաբերում է մեզանից յուրաքանչյուրին»:
Նա նշեց, որ խոսքը գնում է ընդհամենը երեք դատական նիստի մասին, մինչդեռ, ինչպես հիշեցրեց փաստաբանը, նախորդ տարի գարնանը տարբեր պատճառներով չի կայացել 10 դատական նիստ։
Մեղադրող դատախազն ասաց, որ Է. Ալեքսանյանի ներկայացրած միջնորդության հետ կապված առարկություն չունի, իսկ Ա. Վարդևանյանի հնչեցրած հայտարարությունը որևէ հիմք չունի դատական նիստը տևական ժամանակով ընդհատելու համար:
Դատավոր Աննա Դանիբեկյանը հայտարարեց, որ այսօրվա նիստը հետաձգվում է։ Նա ասաց, որ հաջորդ շաբաթ մասնակցելու է վերապատրաստման դասընթացների, հետևաբար մայիսի 25-ից շուտ դատական նիստը չի կարող նշանակվել:
«Միևնույն ժամանակ, դատարանն արձանագրում է, որ Արամ Վարդևանյանի կողմից չի ներկայացվել որևէ հիմնավոր պատճառաբանություն առ այն, որ դատական նիստն ավելի երկար ժամանակով հետաձգելու անհրաժեշտություն, մասնավորապես, որ Ռոբերտ Քոչարյանի՝ ընտրություններին մասնակցելը կբացառի դատական նիստերի բնականոն ընթացքը», - ասաց դատավորը։
Հաջորդ նիստը նշանակվեց մայիսի 25-ին ժամը 13։00-ին։
Հարակից հրապարակումներ`
- Դատական նիստը հետաձգվեց մինչև մայիսի 11-ը
- Դատական նիստը հետաձգվեց մինչև մայիսի 4-ը
- Ռոբերտ Քոչարյանն այսօր դատական նիստի չի ներկայացել. Նա կոնտակտավոր է
- Մնացած մեղադրանքների մասով սույն գործով քննությունը շարունակվում է. Ռոբերտ Քոչարյանի փաստաբանական թիմ
- Ռոբերտ Քոչարյանի նկատմամբ Քր. Օրենսգրքի 300.1 հոդվածի մասով քրեական հետապնդումը դադարեցվեց
Լրահոս
Տեսանյութեր
Ի դեմս Ադրբեջանի՝ այսօր աշխատում է Թուրքիան, սա նոր երևույթ է, որը պետք է գիտակցենք. Դեմոյան