Ձեր վստահելի աղբյուրը

ՀՀ Լոռու մարզի Ուռուտ բնակավայրում չկայացան «ՋԻՆ ՀՈԼԴԻՆԳ ԼԻՄԻԹԻԴ» ՍՊԸ-ի կողմից  Ստեփանավանի հանքային շրջանի Ուռուտի հանքային դաշտի տեղամասում 2021-2024թթ. նախատեսվող երկրաբանահետախուզական աշխատանքների շրջակա միջավայրի վրա ազդեցության նախնական գնահատման հայտի վերաբերյալ հանրային լսումները:

«Եկել եք ժողովրդին կըտորելո՞ւ։ Արմանիս էլ բաց արեցին, սաղ հարամեցին,արոտավայրն ու ամեն ինչը։ Հայաստանը կուլ տվիք, պրծաք»,- ասաց Ուռուտ գյուղի տարեց բնակիչներից մեկն ու հորդորեց «ՋԻՆ ՀՈԼԴԻՆԳ ԼԻՄԻԹԻԴ» ընկերության ներկայացուցիչներին հեռանալ գյուղից։

Ուռուտն ունի 1050 բնակիչ։ Հիմնականում զբաղվում են անասնապահությամբ և գյուղատնտեսությամբ։

Վերջին տարիներին մեծ է հետաքրքրությունն էկոլոգիապես մաքուր արտադրանքների, արդյունքում՝ տեղացիների շրջանում նկատվում է ակտիվություն՝ հատկապես պանրի արտադրության մասով։ Ստեփանավան առողջարանային քաղաքից ընդամենը  կմ հեռավորության վրա գտնվող, բնության հրաշագեղ տեսարանով գյուղում ապրողները չեն ցանկանում խաթարել իրենց բնականոն կյանքը։
«Panorama.am»-ի հետ զրույցում գյուղի ղեկավար Սերգեյ Ջուլհակյանն ասաց, որ գրեթե ամբողջ գյուղն է դեմ հանքավայրի շահագործման նպատակով արվող ուսումնասիրություններին։ Այս հարցում գյուղացիները միակարծիք են ՝ հանք չեն ուզում, հող կմշակեն։

«Մարդիկ չեն ցանկանում հանք բացվի։ Բոլորը դեմ արտահայտվեցին։ Ասում են՝ բնությանը վնաս է։ Գյուղում անասնապահությամբ են հիմնականում զբաղվում։ Գյուղացիները բոլորն էլ անասուն են պահում,  կաթի, պանրի արտադրությամբ են զբաղվում։ Բացի այդ, մի քանի փոքր ցեխ կա՝ էկոլոգիապես մաքուր պանրի արտադրությամբ են զբաղվում»,- ասաց համայնքի ղեկավարը։

Մեր դիտարկմանը, թե մեկ այլ ընկերություն ևս հետաքրքրված է տարածքում երկրաբանահետախուզական աշխատանքներ իրականացնելով, արդյո՞ք երկրորդ ընկերությունը հնարավորություններ ունի հանրային լսումներ անցկացնելու, Ջուլհակյանը պատասխանեց․

«Ով էլ գա նույն ձևով գնալու ա, դա վերջն է։ Ուզում են 10 հոգով գան, ուզում են՝ 20, ժողովուրդը դեմ է, ես էլ իրենց կողքին կանգնած եմ։ Հանք չի բացվի»։

Հանրության կողքին լինելու մտադրությամբ, մարզի հասարակական կազմակերպությունների ներկայացուցիչներ ևս  հանրային լսումներին մասնակցելու նպատակով գյուղ էին մեկնել։ Ինչպես «Panorama.am»-ին ներկայացրեց  «Համայնքային համախմբման և աջակցության կենտրոն» ՀԿ-ի նախագահ Օլեգ Դուլգարյանը, բնակչությանը ներկայացրել են այն հնարավոր հետևանքները, որոնք կարող են առաջանալ ՝ հանքավայրի շահագործման պարագայում։

«Ժամանակին օրենսդրությունը մշակվել է միայն հօգուտ  հանքարդյունաբերողների։ Ընդհանրապես ՀՀ օրենսդրությունն ունի բացեր և չկան քաղաքացիներին պաշտպանելու օրենսդրական մեխանիզմներ ։ Էկոլոգիական և  առողջապահական վնասների մասով օրենսդրությունը որևէ լծակ չունի պաշտպանելու քաղաքացիների ոտնահարված իրավունքները։ Օրինակ՝ եթե դու ապրում ես հանքին մոտ, որի շահագործման հետևանքով ձեռք ես բերել ծանր հիվանդություն, Հայաստանում չկան շրջակա միջավայր-մարդ առողջություն գնահատման մեխանիզմներ, որպեսզի հնարավոր լինի ապացուցել դա։ Ոչ էլ օրենքով կարող ես որևէ կերպ պահանջատեր լինել։ Այսինքն՝ միակողմանի օրենդրություն է Հայաստանում՝ ի շահ հանքարդյունաբերողի»,- ասաց Դուլգարյանը։