ՄԻՊ. Պետք է խթանել կանանց ակտիվությունը տնտեսական ու մյուս ոլորտներում
Մարդու Իրավունքների պաշտպան Արման Թաթոյանին հաճելիորեն զարմացրել են Գորիս քաղաքում կանան զարգացման «Ռեսուրս կենտրոնում» վերջին մի քանի շաբաթում տեղի ունեցած փոփոխությունները։
Թաթոյանը ֆեյսբուքյան իր էջում մի քանի լուսանկարներ է հրապարակել կենտրոնից ու գրել.
«Սյունիքում մայիսի 14-ի փաստահավաք աշխատանքերի ժամանակ Գորիս խոշորացված համայնքի ղեկավար Առուշ Առուշանյանի հետ այցելեցինք Գորիս քաղաքում Կանանց զարգացման «Ռեսուրս կենտրոն» հիմնադրամ և Վերիշենում նույն հիմնադրամի սոցիալական ձեռնարկություն, որոնք կանանց աշխատանքի ու տնտեսական զարգացման հաջողված օրինակ են:
Հաճելի էր տեսնել, որ կենտրոն իմ վերջին այցից հետո, չնայած պատերազմին, ոլորտներն ընդլայնվել են` ներառելով անգամ Արցախից տեղահանված ավելի քան 40 ընտանիքների կանանց:
Շնորհակալություն Կենտրոնի տնօրեն Ռուզաննա Տոռոզյանին (Ruzanna Torozyan), կենտրոնի աշխատակիցներին ու շահառուներին կարևոր ջանքերի համար:
Պետք է խթանել կանանց ակտիվությունը տնտեսական ու մյուս ոլորտներում: Դա հասարակության ու պետության զարգացման համար կլինի միայն օգտակար
Պայմանավորվեցինք Մարդու իրավունքների պաշտպանի հետ համագործակցությամբ համատեղ միջոցառումների մասին»։
Նշենք, կենտրոնում արտադրվում է Goris Handmade-ը, որն արտադրում է բարձրորակ, 100% բնական բրդից իրերի լայն տեսականի, ներառյալ՝ գորգեր, բարձեր, ծածկոցներ և ավելի քան 50 տարբեր խաղալիք կենդանիներ:
Կենտրոնի տնօրեն Ռուզաննա Տոռոզյանի խոսքով, հիմնադրամի շահառուների թվում են ինչպես հաշմանդամություն ունեցող, այնպես էլ Արցախից տեղահանված ավելի քան 40 ընտանիքների կանայք, որոնք անցնում են ուսումնառություն և ստանում նոր մասնագիտություն՝ աշխատաշուկայում մրցունակ դառնալու համար (ձեռարվեստ, խոհարարություն, համակարգչային գիտելիքներ, հաշվապահություն, վարսահարդարում և այլն)։