Ձեր վստահելի աղբյուրը

Ազգային ժողովը 76 պատգամավորով սկսեց արտահերթ նիստի երկրորդ օրվա աշխատանքները և Ֆինանսների նախարարի տեղակալ Արման Պողոսյանը միանգամից անցավ Հարկային օրենսգրքում փոփոխություններ և լրացումներ կատարելու մասին օրենքի նախագծի ներկայացմանը:

Նրա խոսքով՝ գործադիրը առաջարկվում է սահմանել անշարժ գույքի օտարման գործարքների ավելացված արժեքի և շահութահարկի հարկման բազաների նվազագույն մեծության որոշման կանոնները, որը  կառուցապատողների համար կձևավորի կանխատեսելի և անորոշություններից զերծ հարկային միջավայր:

Օրինագծով առաջարկվում է անշարժ գույքի իրացման օտարման գործարքների մասով ԱԱՀ-ով և շահութահարկով հարկման նպատակով, որպես հարկման բազա, հիմք ընդունել ոչ թե անշարժ գույքի մոտարկված շուկայական արժեքը, ինչպես գործող իրավակարգավորումներով է արվում,  այլ դրա 80 %-ը:

Նախագծի հիմնավորման մեջ ասվում է. «2021 թվականի հունվարի 1-ից հետո իրավունքի պետական գրանցում ստացած՝ անշարժ գույք գնելու իրավունքի պայմանագրի հիման վրա շենքերի, շինությունների (այդ թվում՝ անավարտ, կիսակառույց), բնակելի կամ այլ տարածքների օտարման դեպքում ԱԱՀ-ով հարկման բազան որոշվում է օրենքով սահմանված կարգով, բայց ոչ պակաս, քան անշարժ գույք գնելու իրավունքի պետական գրանցման ամսաթվի դրությամբ գործող՝ անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանող օրենքով սահմանված կարգով, սակայն անշարժ գույքի օտարման օրվա դրությամբ անշարժ գույքի որակական և քանակական բնութագրիչների հիման վրա հաշվարկված՝ անշարժ գույքի հաշվարկային արժեքի 80 %-ը:

Մինչև 2021 թվականի հունվարի 1-ը իրավունքի պետական գրանցում ստացած՝ անշարժ գույք գնելու իրավունքի պայմանագրի հիման վրա 2021 թվականի հունվարի 1-ից հետո շենքերի, շինությունների (այդ թվում՝ անավարտ, կիսակառույց), բնակելի կամ այլ տարածքների օտարման դեպքում ԱԱՀ-ով և շահութահարկով հարկման բազաների նվազագույն չափի որոշման համար հիմք է ընդունվում անշարժ գույք գնելու իրավունքի պետական գրանցման ամսաթվի դրությամբ գործող գույքի հաշվարկային արժեքը»: