Ձեր վստահելի աղբյուրը

ՀՀ Ընտրական օրենսգրքով ընտրական տեղամասում գործում է ընտրողների գրանցման էլեկտրոնային համակարգ: Ընտրությունների ընթացքում էլեկտրոնային գրանցման փուլում ընտրողները թողնում են նաև իրենց մատնահետքը, դա ապացույց է, որ կոնկրետ մարդը մասնակցել է քվեարկությանը:

Panorama.am-ը հետաքրքրվեց Կենտրոնական ընտրական հանձնաժողովից՝ ինչպես է կազմակերպվելու այն քաղաքացիների մատնահետք վերցնելու գործընթացը, ովքեր հնարավորություն չունեն մատնահետք թողնելու. մասնավորապես՝ հաշվի առնելով վերջին 44-օրյա պատերազմը, որի ընթացքում շատ տղաներ  կորցրել են ոչ միայն մատները, այլև՝  թևերը:

ԿԸՀ մամուլի խոսնակ Հերմինե Հարությունյանն ասաց, որ տեղամասում տեխնիկական սարքավորումներով իրականացվում է ընտրողների էլեկտրոնային գրանցումը:

«Սարքավորման քայլերից մեկն է նաև ընտրողից  մատնահետքի ստացումը: Սակայն եթե անհնար է մատնահետք վերցնել, այսինքն մատնահետքի ստանալու անհնարինության դեպքում սարքավորումն ունի այդ քայլը բաց թողնելու հնարավորություն:

Լինում են դեպքեր, երբ ընտրողի մատնահետքը չի ընթերցվում, նաև կոնկրետ ձեր նշված դեպքերում, սարքը բաց կթողնի այդ քայլը, որևէ խնդիր չի լինի և ընտրողը կարող է քվեարկել»,- ասաց նա:

Հասկանալի է, որ առաջիկա ընտրություններին համեմատաբար շատ կլինեն նաև հաշմանդամի սայլակով ընտրողները, կրկին՝ պատերազմի հետևանքով: Մշտապես բարձրաձայնվել է այն հարցը, որ ոչ բոլոր տեղամասային կենտրոններն են հարմարեցված հաշմանդամություն ունեցող անձանց համար:

ԿԸՀ մամուլի խոսնակն ասաց, որ դա ԿԸՀ գործառույթը չէ, տեղամասային կենտրոններն արդեն սահմանված են, հնարավորինս հարմարեցված են հաշմանդամություն ունեցող անձանց համար, բայց, իհարկե, չեն բացառվում դեպքեր, որ տեղամասերը հասանելի չլինեն:

«Եթե ընտրողն ինքնուրույն քվեարկելու դժվարություն ունի, կարող է դիմել տեղամասային ընտրական հանձնաժողովի նախագահին, և վերջինս իմացությամբ ընտրողին որևէ մեկը կարող է օգնել կատարել իր քվեարկությունը»,- ասաց Հերմինե Հարությունյանը: