Ձեր վստահելի աղբյուրը

«Մենք պետք է ողջունենք այս իշխանություններին, որ նրանք միակն են, որոնց ընտրությունը ողջունել է Ադրբեջանի ամբողջ վերնախավը»,-մամուլի ասուլիսի ժամանակ հայտնեց ՀՀ նախկին օմբուդսմեն Լարիսա Ալավերդյանը և բացատրեց, որ հաղթելով հայկական վերնախավին՝ իշխանություններն ուրախացնում են ադրբեջանական վերնախավին:

Նրա խոսքով՝ Նիկոլ Փաշինյանի նպատակը եղել է հաղթել այն վերնախավին, որը ձգտում է պահպանել հայոց պետականությունը հայոց լեռնաշխարհում, և դա տեսակի հետապնդում է՝ ազգային էլիտայի հանդեպ...  անթաքույց ատելություն:

Ալավերդյանը հիշեց իր նախկին խոսքը, թե հայատյացությունը Նիկոլ Փաշինյանի մոտ շատ ավելի բարձր է, քան որոշ թշնամի պետությունների վերնախավում:

«Մենք պետք է հստակ առերեսվենք իրողության հետ, որ այսօր Հայաստանում կա մեծ թվաքանակի խավ, որն ունի թուրք-ադրբեջանական քաղաքական կողմնորոշում»,- հայտարարեց Ալավերդյանը և խոսքն ուղղեց նրանց՝ հիշեցնելով, որ Թուրքիան ցանկանում է նոր ցեղասպանություն իրականացնել՝ հպատակեցնելով կամ նույնիսկ առանց հավատափոխ անելու թրքացնելով տեղի բնակչությանը:

Նա գտնում է, որ Հայաստանում կան մոտ 250 հազար աղանդավորներ, որոնք ընտրել են իրենց սրտի վարչապետին, բայց նրանք Հայ Առաքելական եկեղեցու և իրավապահների խնդիրն են:

«Ընտրությունների արդյունքները կարևոր են նրանով, որ բոլորս պետք է ճանաչենք մեր հասարակությանը և պետք է վերհիշենք վարպետ Մուկոչյանի՝ թվերը նկարելու արվեստը»,- հայտնեց Լարիսա Ալավերդյանը և հավելեց, որ դժվար է գտնել մեկին, որը Հայաստանում կհավատա այդ նկարած 53,2 %-ին:

Նա պատահական չհամարեց, որ Տիգրան Մուկուչյանն այդքան պահանջված է եղել բոլոր իշխանությունների կողմից և հիշեց լրագրող Արմեն Դուլյանի այն խոսքերը, թե երբեք չի հավատա ընտրությունների արդյունքներին, եթե ԿԸՀ նախագահ լինի Մուկուչյանը:

Բանախոսն ընտրության արդյուքները որակեց որպես լեգիտիմության նմանակում և հիշեց, որ հայ ժողովուրդը տեսել է ժողովրդավարության, տարբեր պետությունների ինստիտուցիոնալ կառույցների նմանակում, բայց լեգիտիմության նմանակում առաջին անգամ է տեսնում:

Կրնելով, որ ընտրությունների արդյունքները լեգիտիմության իմիտացիա է՝ Լարիսա Ալավերդյանը հայտնեց, որ այս առումով ողջունելի է մի բան, որ ընտրության իրավունք ունեցողների 50%-ից միայն 400-420 հազարն են ընտրել իրենց սրտի վարչապետին, մնացածը եղել է վարչական ռեսուրսը և բանակը:

Նախկին օմբուդսմենը հավելեց, որ վարչական ռեսուրսի օգտագործում նախկինում էլ է եղել, բայց այդպես գռեհիկ և ցուցադրական ձևով չի եղել:

«Պարտադրանքով, թե կամքով Հայաստանում գոյություն ունի բավականին մեծ թվով հասարակակն խավ, որոնք ունեն քաղաքական առումով թուրքական կամ թուրք-ադրբեջանական կողմնորոշում»,-հայտարարեց Ալավերդյանը և հավելեց, որ ընտրություններին չմասնակցած 50% ընտրազանգվածը թող պատրաստվի առաջիկա  արտահերթ ընտրություններին, որոնք անխուսափելի են: