«Հայաստանն» ու «Պատիվ ունեմը» կառաջարկեն չեղարկել պատգամավորներին 250 000 դրամ լրավճար տալու վերաբերյալ օրենքը
«Հայաստան» դաշինքը 8-րդ գումարման Ազգային ժողովի ձևավորումից հետո, օրենսդրական նախաձեռնությամբ է հանդես գալու, որով առաջարկելու են չեղարկել 7-րդ գումարման Ազգային ժողովի կողմից ընդունված պատգամավորական ծախսերի համար հատկացվող ամսական վճարի հնգապատկման վերաբերյալ օրենքը։ Այս մասին NEWS.am-ի հետ զրույցում ասել է դաշինքի անդամ Գեղամ Մանուկյանը։
«Առաջին իսկ օրից այդ օրենքի նախագիծը մեր դաշինքի անդամների կողմից սուր քննադատության է արժանացել։ Հիմնավորում են, թե պատգամավորների նյութական միջոցների սղության պատճառով պետք է ավելացնել այդ վճարը, բայց հիմա հազար տեսակ պատճառաբանություն կարելի է բերել։ Տվյալ դեպքում նկատելի է, որ այդ գումարի չափը, որն ամսվա կտրվածքով հատկացվելու է պատգամավորներին, եթե հաշվարկում ենք այն պարգեւավճարների արատավոր սխեման, որը գործել է նախորդ երեք տարիներին, հարկերը հանած գրեթե նույն գումարն է տարվա կտրվածքով։ Անզեն աչքով էլ երևում է, որ իշխանությունը հասկանում է, որ ապագա խորհրդարանում ընդդիմության առկայության պատճառով իրենք այլեւս հնարավորություն չեն ունենա շատ հեզասահ պարգևավճարներ բաշխել պատգամավորների միջեւ, իրենք փորձեցին այդպիսի լուծում գտնել, հույս ունենալով, որ դե գումար է, դրա համար էլ բողոք չի լինելու, բայց խորհրդարանի աշխատանքները սկսելուց հետո մենք նախաձեռնությամբ ենք հանդես գալու, առաջարկելով չեղարկել այդ օրենքը։ Բոլոր փաստարկները դեմ են առնում մի կարեւոր կետի՝ սոցիալական անարդարության. ի՞նչ ասի ուսուցիչը, բժիշկը, զինվորականը և սոցիալական այլ խմբեր, երբ չկա այդ համահավասարությունը»,– ասել է Գեղամ Մանուկյանը։
Մանրամասն՝ սկզբնաղբյուրում։