Ձեր վստահելի աղբյուրը

«Կցանկանայի, որ զոհված և անհայտ կորած 21 զինծառայողների ծնողների հետ ես էլ` իրենց թև ու թիկունք լինելով, բացահայտեինք այս ամբողջ պատմության իրական մեղավորներին»,-հրավիրված ասուլիսում հայտարարեց ԱՀ ՊԲ N զորամասի սպա, կոչումով մայոր Գևորգ Գևորգյանի փաստաբան Գոռ Գևորգյանը։

Նա տեղեկացրեց, որ խոսքը գնում է հրետանային դիվիզիոնի 21 զինծառայողի մասին, որոնցի 7-ը զոհված են, մյուսները՝ անհետ կորած: 

Փաստաբանը հայտնեց, որ հրետանային դիվիզիոնի շտաբի պետ Գևորոգ Գևորգյանը պատերազմի ժամանակ ստացել և կատարել է բազմաթիվ հրամաններ, դրանցից մեկը եղել է ճակատագրական 2020 թ. հոկտեմբերի 11-ին՝ ինչի համար էլ նա հայտնվել է մեղադրյալի աթոռին:

Գոռ Գևորգյանը հայտնեց, որ երբ իր պաշտպանյալին այս տարվա օգոստոսի 20-ին կանչել են որպես մեղադրյալ, նա շտապել էր քննչական մարմին՝ ներկայացնելու իրականությունը, քանի որ իր հարազատներին և իրեն հանիրավի թիարխավորում էին կորուստների համար:

Փաստաբանի խոսքով՝ Գևորգ Գևորգյանը, լավ իմանալով, որ կարող է հրաժարվել ցուցմունքից՝ տվել է 36 էջանոց մանրամասն ցուցմունք՝ հայտնելով, որ իրենց տեղակայել էին Վարանդայի շրջանի (Ֆիզուլի) գյուղերից մեկում և հրետանու կրակի ուղղությունը եղել է Հադրութը:

Դիվիզիոնի շտաբի պետը պատմել է, որ երբ իրեն տվել են նշանակակետերի կորդինատը, նա հրանոթի հնարավորություններով և հեռախոսային ծրագրի միջոցով պարզել է, որ թիրախը 4200 մետրի վրա է, իսկ  իրենց ունեցած Դե-20 տիպի հրանոթները խոցում են մինչև 17 կմ 380 մետր:

Փաստաբանի տեղեկացմամբ՝ շտաբի պետի մոտ մտահոգություն է առաջացել, թե ինչու են հեռահար խոցման հրանոթները տեղադրված նշանակետերին այդքան մոտ և հրամանատարությանը հայտնել է, որ թշնամու հետևակը կարող է կարճ ժամանակահատվածում այդ տարածքն անցնել և իրենք կհայտնվեն ծուղակում, որից հետո նրանց տեղափոխել են Հադրութի Ջրաշխարհ կոչվող տարածք, որտեղից թիրախների հեռավորությունը եղել է 8 կմ:

Գևորգ Գևորգյանն իր ցուցմունքում գրել է, որ երբ բանակի հրետանու պետին զեկուցել են տեղափոխության մասին նա բարկացել է և հրամայել վերադառնալ նույն տեղամաս, ինչը և արել է ինքը: 

Փաստաբանի խոսքով՝ Գևորգ Գևորգյանը այդ ժամանակ զանգել է կնոջը և ասել, որ այնպիսի տեղ են ուղարկում, որ զոհվելու հավանականությունը մեծ է, և եթե մի քանի օր իրենից լուր չունենա, իրենց ամուսնության վկայականով գնա բանկ և իր հաշվից հանի աշխատավարձի խնայողությունները:

Գոռ Գևորգյանը տեղեկացրեց, որ ճակատագրական օրը հրետանու հրամանատարական կետից հրետանային դիվիզիոնի հրամանատարը հրամայել է, որ անցնեն շրջանաձև պաշտպանության, ինչը նշանակում է, որ  թշնամին այնքան է մոտեցել, որ 17 կմ հեռավորություն խոցող հրետանու դիվիզիոնը պետք է թողնի հրանոթները և ավտոմատով անցնի պաշտպանության, բայց քիչ անց եկել է «թողնել, չկրակել մերոնք են» հրամանը և տրվել է հերթական նշանակետը:

Ըստ փաստաբանի՝ 10 րոպեի ընթացքում շտաբի պետը ստացել է նահանջ հրամանը և սկսել են մեքենաները մոտեցնել հրանոոթներին, որից հետո կրկին ստացել են թողնել հրամանը, բայց քիչ անց դիվիզիոնի հրամանատարից ստանում  են հրաման՝ ինչպես կարող են դուրս գան այդտեղից:

Փաստաբանի ներկայացմամբ՝ դիվիզիոնի հրամանատարի հրամանը եղել է բոլորի համար լսելի հաճախականության վրա և շտաբի պետն իր ենթակայության հաշվարկի հետ սպսարկող տեխնիկայով դուրս է եկել կրակակետից՝ համոզվելով, որ իր հետևից գալիս են նաև մյուս մեքենաները, նա հասել է անվտանգ վայր, բայց պարզվել է, որ երկու մեքենա չեն եղել  շարասյան մեջ:

Ըստ շտաբի պետի ցուցմունքի, ինքն այլ հրամանատարների հետ փորձել են վերադառնալ դեպքի վայր, բայց հրետանային կրակոցները և  մութը խանգարել են իրենց:

Փաստաբանը պատմեց, որ երբ դիվիզիոնի հրամանատարը տեսել էր թշնամու տեղաշարժը, զեկուցել էր ԱՀ ՊԲ հրետանու պետին, իսկ նա զեկուցել է Ջաջալ Հարությունյանին և վերջինս ասել է, որ հնարավոր է հայեր են, հանկարծ չկրակեն:

Հետգայում պարզվել է, որ մոտեցողները 250 հոգանոց թշնամական ստորաբաժանում է եղել, որոնց կեսը՝ հայկական համազգեստով:

Գոռ Գևորգյանը քրեական գործից մեջբերեց նաև Ջալալ Հարությունյանի խոսքն այն մասին, որ այդ հատվածում ԱԹՍ և տեսախցիկ չի եղել և նա ասել է, որ հնարավոր է եկողներն հայեր են, հնարավոր է՝ ոչ, և պետք է զգույշ լինեն հայերի վրա չկրակեն:

Փաստաբանը հայտնեց, որ իր պաշտպանյալին մեղադրում են Քրեական օրենսգրքի 374-րդ հոդվածի 4 մասով՝ իշխանության ներկայացուցչի կողմից անգործություն, բայց պետք է ասեն, թե որ գործողությունները չի կատարել, որը պետք է արվեր:

«Այստեղ պետք էր քավութայն նոխազ գնտել, որ ծնողներին ասեին՝ տեսեք պետությունը գործեց և գտավ իր երեխայի զոհվելու պատասխանատուին»,-հայտնեց մայոր Գևորգ Գևորգյանի փաստաբանը:

Փաստաբանը հայտնեց, որ անգործության մեջ մեղադրում են Գևորգ Գևորգյանին, որ դրանից հետո երեք անգամ հետ է վերադարձել և օգնել է այդ հատվածից դուրս բերել դիվիզիոնի հրամանատարին և իրեն ուղեկցող զինվորներին, իսկ մեկ այլ դեպքում Տող գյուղից դուրս է բերել 8 աշխարհազորայիններին: