Ձեր վստահելի աղբյուրը

Սեպտեմբերի 13-ին ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը հանդիպել է Հայաստանում Կարմիր խաչի միջազգային կոմիտեի (ԿԽՄԿ) պատվիրակության ղեկավար Թիերի Ռիբոյի եւ Հաղորդակցման և կանխարգելման ծրագրերի ղեկավար Զառա Ամատունու հետ: Այս մասին տեղեկացնում է ՀՀ Ազգային Ժողովի պաշտոնական կայքը։

Քննարկվել են 2020 թվականի սեպտեմբերի 27-ին Ադրբեջանի կողմից Արցախի Հանրապետության դեմ սանձազերծված պատերազմից հետո առաջացած իրավիճակին, Արցախյան հակամարտությանը վերաբերող առաջնային մարդասիրական խնդիրներին` այդ թվում  հայ գերևարված անձանց ու անհայտ կորածներին առնչվող հարցեր:

Հանձնաժողովի նախագահը  կարևորել է ազատազրկված անձանց կարգավիճակը հստակեցնելու, ինչպես նաև նրանց վերադարձն ապահովելուն ուղղված քայլերի իրականացումը: ԿԽՄԿ ներկայացուցիչը բացատրել է կառույցի դերն այս հարցում` ընդգծելով պարբերական այցելությունների հնարավորությունը Ադրբեջանի իշխանությունների կողմից բոլոր հաստատված հայ գերիներին, ինչպես նաև նրանց ու նրանց ընտանիքների միջև կապի ապահովումը:

Երկուստեք անդրադարձ է կատարվել սահմանամերձ գոտիներում ստեղծված ծանր իրավիճակին, մասնավորապես քննարկվել են բնակչության համար առաջացած և կենսական նշանակություն ունեցող խնդիրները:

Թիերի Ռիբոն ներկայացրել է ԿԽՄԿ-ի  համակարգված աշխատանքը` նշելով, որ կառույցի ներկայացուցիչները պարբերաբար հանդիպում են զոհվածների, անհայտ կորածների և  ազատազրկված անձանց ընտանիքների հետ, փորձում աջակցել նրանց: Նրանք նաև իրականացնում են գնահատում և արդյունքների մասին տեղեկատվություն տալիս իշխանություններին` գաղտնապահ երկխոսության ձևաչափով:

Թիերի Ռիբոյի խոսքով` ԿԽՄԿ-ն իրականացնում է բացառապես մարդասիրական և ապաքաղաքական գործունեություն հակամարտության առնչությամբ` աշխատելով տարածաշրջանում 1992 թվականից Երևանում, Բաքվում ու Լեռնային Ղարաբաղում իր գրասենյակների միջոցով:

Հանձնաժողովի նախագահ Թագուհի Թովմասյանը հայտնել է, որ պարբերաբար լինում է սահմանամերձ համայնքներում և քաջածանոթ է բնակիչների խնդիրներին: Ըստ նրա` այլևայլ հարցերից բացի, անհրաժեշտ է  լուծում տալ  նաև տուժած բնակիչներին փոխհատուցում տալու հարցին: