Այ մեր, գնա գործիդ. Սասուն Միքայելյանը՝ Եռաբլուրում իրեն դիմած կնոջը
ԵԿՄ վարչության նախագահ Սասուն Միքայելյանը ՀՀ անկախության 30-ամյակի կապակցությամբ այցելեց «Եռաբլուր» զինվորական պանթեոն։ Վարչության անդամների հետ Միքայելյանը ծաղիկներ խոնարհեց շիրիմներին։
Լրագրողների հետ զրույցում ասաց, որ Հայաստանն անկախ պետություն է, միջազգային ատյաններում ճանաչված և անկախությունը պետք է կարողանալ պահպանել։
Մի կին բղավելով դիմեց Սասուն Միքայելյանին՝ ասելով. «Կամաց-կամաց խոսում ես, որ չիմանա՞ն, որ դու էլ ես մասնակից Ղարաբաղի ծախմանը։ Ղարաբաղը դուք եք ծախել, դու և Նիկոլը, ստոր արարածներ»։
Սասուն Միքայելյանն արձագանքեց. «Այ մեր, գնա գործիդ, Ղարաբաղը քո լեզվով ես ծախել»։
Այնուհետև շարունակեց խոսքը. «Ես որպես ԵԿՄ նախագահ, իմ գործն եմ անում, հզորացնում ենք Երկրապահը, երիտասարդներով ենք համալրում, որպեսզի, Աստված մի արասցե, ոտնձգություն լինի Հայաստանի պետական սահմանի դեմ, գնանք կանգնենք բանակի կողքին։ Ոտնձգություններ կան, կլինեն։ Առավել ևս ավելի ծանր վիճակի մեջ ենք։ Այսօր առավել ևս քան երբևէ, պետք է համախմբված լինել»։
Անդրադառնալով Փաշինյանի հայտարարությանը, թե ընդդիմությունը շեղում է խաղաղ զարգացման օրակարգից, Ս. Միքայելյանը նշեց, որ խաղաղ բանակցային գործընթաց է ընթանում. «Գնում է բանակցային գործընթաց խաղաղ ձևով։ Այսօր մենք մեր պետությունը, զինված ուժերը այդ աստիճան հզոր չենք, որ կարողանանք զենքի կամ ինչ-որ միջոցներով արդյունքի հասնենք, բայց դա չի նշանակում, որ պետք է ամեն ինչի համաձայնենք։ Դրա համար հզորանալ է պետք, դա ենք անում երկրապահներս, առավել ևս մեր թշնամու կողմից գերեվարվածներ կան։ Մենք գիտենք, որ մի օր, մի ժամ այնտեղ մնալը ինչ է նշանակում»։
Պատասխանելով հարցին, թե ի՞նչ կասեք բոլոր նրանց, ովքեր սպարապետ Վազգեն Սարգսյանին են սկսել քննադատել, ասել թե ժամանակին սխալներ է գործել, Ս. Միքայելյանն ասաց. «Խաչատուր Սուքիասյանը շատ փոքր մարդ է, որ Վազգեն Սարգսյանին քննադատի։ Մարդ պետք է իր անցած ուղին նայի, հետհայացք գցի իր անցած ճանապարհին, անկախության պատմության մեջ արած գործին, նոր Վազգեն Սարգսյանից խոսի։ Նա այն մարդն է, որ կարողացավ ազատագրել 8000 քմ տարածք, կարողացավ համախմբել մարդկանց ու ազատագրել Արցախը։
Նման կարգի մարդիկ փոքր են, որ քննադատեն Սարգսյանին»։
Հարակից հրապարակումներ`
- Կարմիրբերետավորները Եռաբլուրից բերման ենթարկեցին զոհված զինծառայողի հորը
- Հերիք չէ Եռաբլուրում պղծում են շիրիմները, այստեղից բերման են ենթարկում այդ հերոսների ծնողներին. քաղաքացի
- Թուրքն իրավունք չունի գա մեր երեխեքի մոտ. Զոհված զինծառայողների ծնողները Եռաբլուրում են