Ձեր վստահելի աղբյուրը

«Ցավոք սրտի, այս ամենը վերածվում է մանկապարտեզի: Հասկանում եմ, թե Հայաստանի քաղաքացին ինչպես է նայում այս ամեն ինչին»,- պաշտպանության և անվտանգության հարցերի մշտական հանձնաժողովի նիստից հետո Ազգային ժողովում լրագրողների հետ ճեպազրույցում ասաց «Հայաստան» խմբակցության պատգամավոր Գեղամ Նազարյանը:

Հիշեցնենք, որ հանձնաժողովի «Քաղաքացիական պայմանագիր» խմբակցության անդամներն արդեն 6 անգամ դեմ են քվեարկում «Հայաստան» խմբակցության անդամ Արթուր Ղազինյանի թեկնածությանը հանձնաժողովի նախագահի տեղակալի պաշտոնում:

Գ. Նազարյանի խոսքով, վարչախումբը պետք է այս մանկական քմահաճույքից մի կողմ քաշվի, իրենք են կառավարող ուժը, ոչ թե ընդդիմությունը, իրենք իրենց դիրքերից ելնելով պետք է հարգեն ընդդիմության որոշումն ու կողմ քվեարկեն:

«Իրենք այդ գիտակցումը, մտածելակերպը չունեն, թե ինչ է կառավարող ուժը, ինչպես պետք է իրեն պահի: Սա քմահաճույք չէ մեր կողմից, հանրությանը պետք է ցույց տանք, որ քայլ պետք է անի կառավարող խմբակցությունը»,- ասաց նա: 

Դիտարակմանը՝ ղարաբաղյան երրորդ պատերազմի հանգամանքներն ուսումնասիրող հանձնաժողով պետք է ստեղծվի, կա վարկած, որ իշխանությունը  շահագրգռված չէ, փորձում է  ավելորդ տեսարաններ ապահովելով վիժեցնել այդ գործընթացը,  ընդդիմադիր պատգամավորն ասաց. «Կիսում եմ այդ վարկածը, որովհետև մինչև հիմա, բացի հանձնաժողովի նախագահի տեղակալի ընտրության հարցից, որևէ այլ օրակարգ չկա, մեր առաջարկները մերժում են, մեր առաջարկած  արտահերթ նիստը տապալում են, որի օրակարգում պետք է քննարկեինք Սյունքիում ստեղծված իրավիճակը, հրավիրեինք պատասխանատուներին: Սա վկայում է,  որ գործ ունենք գիտակցված  տապալման հետ:

Իրենք կոնկրետ խնդիր ունեն՝ հենց այս հանձնաժողովը մատնվի անգործության, քանի որ կան բազմաթիվ հարցեր, որոնք պահանջում են ամենօրյա ռեժիմով դրանց անդրադառնալ, բայց տեսեք ինչով ենք զբաղված: Այս ընտրության հարցը չի խոչընդոտում այլ հարցերի քննարկմանը, ուղղակի սա առիթ է վարչախմբի համար, որ չանցնեն բուն օրակարգային խնդիրներին»:

Գեղամ Նազարյանն ընդգծեց՝ իրականում սա մի մարդու քմահաճույք է՝ Նիկոլ Փաշինյանի, այստեղ նրա ձեռագիրն է տեսնում:

«Նրա նպատակն է այս հանձնաժողովի աշխատանքների ձախողում, քանի որ բազմաթիվ հարցեր պետք է քննարկվեն այս հանձնաժողովում, բազմաթիվ հարցերի պատասխան փորձելու ենք ստանալ: Իրենց այս իրավիճակում բոլորովին ձեռնտու չէ, որ հանձնաժողովը զբաղվի գործով:
Իրեն ճանաչելով՝ շատ լավ հասկանում եմ՝ ինքն ամեն ինչն է, բոլորն է, ստորացում է  ԱԺ-ին,  հենց իր կուսակից ընկերների խմբակցությանը, քանի որ խոստանում են՝ այդ ինչ հարց է, կկանչեն պատասխանատուներին քննարկման, հետո, չգիտես ինչու, չի կազմակերպվում»,- ասաց Գ. Նազարյանը: