Ձեր վստահելի աղբյուրը

Ազգային ժողովի պաշտպանության և անվտանգության հարցերի մշտական հանձնաժողովը հերթական արտահերթ նիստն է գումարել՝ հանձնաժողովի նախագահի տեղակալի ընտրության հարցով։ Այս հարցը քննարկվում է վեցերորդ անգամ: Այս անգամ էլ հանձնաժողովի նախագահի տեղակալի պաշտոնում առաջադրվել է «Հայաստան» խմբակցության պատգամավոր Արթուր Ղազինյանի թեկնածությունը։  Նրա թեկնածությանը նախորդ հինգ նիստերի ժամանակ դեմ էին քվեարկում հանձնաժողովի «Քաղաքացիական պայմանագիր» խմբակցության անդամները:

Հանձնաժողովի այսօրվա նիստում Արթուր Ղազինյանն ասաց. «Համբերատար պատասխանել եմ  բոլոր հարցերին, չեմ արհամարհել որևէ հարց, էլի պատրաստ էի, եթե, իհարկե, գտնվեիք հասկանալի լեզվի դաշտում: Ինչպես տեսնում եմ, ինքներդ էլ  բազմաթիվ հարթակներում հայտարարել եք, որ ունեք քաղաքական որոշում,  քաղաքական հրահանգ ձեր ղեկավարից դեմ քվեարկել, հետևաբար  ինքնանպատակ է հարցուպատասխանի, արձագանքների, ելույթների և այլնի մասով:

Կրկին ուզում եմ փաստել՝ այս հարցը գտնվում է իշխանության պատասխանատվության տիրույթում, որոշում կայացնողն էլ եք դուք, քվեարկողն էլ:

Մեզ համար այս օրակարգը սպառված է: Իշխանությունը չի կարող ստիպել ընդդիմությանը ենթարկվել իր պահանջներին, փոխել թեկնածուին և «Հայաստան» խմբակցությունն այս պաշտոնը չի զիջելու իշխանությանը:

Հետևաբար, ձեզ թողնում եմ մենակ ձեր որոշումը կայացնելու հարցում», - հայտարարեց Արթուր Ղազինյանը:

Այնուհետև ընդդիմադիր պատգամավորները լքեցին հանձնաժողովի նիստը։

«Դուք արդեն ոչ թե խրամատային, այլ պարտիզանական շարժում եք սկսել», - դիմելով հեռացող  ընդդիմադիրներին՝ ասաց հանձնաժողովի նախագահ Անդրանիկ Քոչարյանը։

Արթուր Ղազինյանը վեցերորդ անգամ չընտրվեց պաշտպանության հարցերի հանձնաժողովի փոխնախագահի պաշտոնում, իշխանական պատգամավորները կրկին դեմ քվեարկեցին նրա թեկնածությանը: 

«Պարոն Ղազինյանը, կարծում եմ, կանոնակարգ օրենքով նախատեսված ժամանակահատվածում մինչև կանոնակարգ օրենքի փոփոխությունների իրականության դառնալը, կարող են այսպես շարունակել»,- ասաց Անդրանիկ Քոչարյանը: