Ձեր վստահելի աղբյուրը

Հնդկաստանում մշակված Covaxin կորոնավիրուսի դեմ պատվաստանյութը 77,8% արդյունավետություն է ցուցաբերել հետազոտության երրորդ փուլում։ Այս մասին գրում է «ՌԻԱ ՆՈՎՈՍՏԻ» գործակալությունը, վկայակոչելով «The Lancet» գիտական ​​ամսագրին։

«COVID-19-ի ցանկացած ծանրության դեմ արդյունավետությունը երկրորդ պատվաստումից 14 օր հետո 77,8% էր, իսկ ծանր COVID-19-ի դեմ արդյունավետությունը՝ 93,4%, ասիմպտոմատիկ COVID-19-ի դեմ արդյունավետությունը՝ 63,6 տոկոս։ Նախնական վերլուծությունը ցույց է տվել արդյունավետություն 65,2%-ով դելտա շտամի դեմ, սակայն լրացուցիչ հետազոտություններ են անհրաժեշտ այս և այլ շտամների դեմ կլինիկական արդյունավետությունը հաստատելու համար»,- ասվում է հոդվածում։

Գիտնականները նշել են, որ Covaxin-ը, որն օգտագործում է ավանդական ապաակտիվացված վիրուսի տեխնոլոգիան, «առաջացնում է կայուն հակամարմինների արձագանք» երկու դեղաչափից երկու շաբաթ անց:

18-ից 97 տարեկան 24,419 մասնակցի պատահական փորձարկումների արդյունքում Հնդկաստանում 2020 թվականի նոյեմբերից մինչև 2021 թվականի մայիս ընկած ժամանակահատվածում մահվան դեպքեր կամ պատվաստանյութի հետ կապված անբարենպաստ դեպքեր չեն գրանցվել, նշում է հրատարակությունը:

Հնդկաստանը շարունակում է մնալ աշխարհում երկրորդ տեղում COVID-19-ի հայտնաբերված դեպքերի թվով։ Առողջապահության նախարարության վերջին տվյալների համաձայն՝ անցյալ տարվա մարտից, երբ երկրում սկսվեց համաճարակը, վարակվածների ընդհանուր թիվը գերազանցել է 34,4 միլիոնը, ավելի քան 33,8 միլիոնն ապաքինվել է, ավելի քան 462 հազար մարդ մահացել է։ .