Այո, Թուրքիան, Ադրբեջանն ուզում են Հայաստանը ոչնչացել. Ռուբեն Մելքոնյան
«Ապազգային իշխանություններից, այն մարդկանցից, որոնք չունեն ազգային մտածելակերպ, չեն ճանաչում մեր պատմությունը, չգիտեն՝ ով է թշնամի, ով բարեկամ, բնականաբար, կարելի է սպասել այսպիսի իրավիճակի»,- ասուլիսում ասաց պատմական գիտությունների դոկտոր, պրոֆեսոր, ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը։
Նա նշեց, որ այս իշխանությունները հատել են բոլոր կարմիր գծերը. «Հասարակության մի մեծ մասին կարողացել են ներարկել, որ թշնամին ոչ թե սահմանից այն կողմ կանգնած է, Թուրքիան է, այլ թշնամին մեր ներսում եղած մարդիկ են, այն գեներալներն են, որոնք կայացրել են այս երկիրը, այն տարբեր պաշտոնյաները, գործիչները, որոնք այս երկիրը ստեղծել են, զարգացրել են իրենց սխալներով, թերացումներով հանդերձ»։
Ռ.Մելքոնյանի խոսքով, թվում էր՝ երբեք որևէ մեկին չպետք է բացատրել, թե ով է Թուրքիան, Ադրբեջանը, ինչ քաղաքականություն են վարել, պետք է նրանցից սպասել ցեղասպանության շարունակության և այլն։
«Բայց մենք հիմա բախվել ենք մի իրավիճակի, երբ երկրի ղեկավարը՝ Փաշինյանը, իր ասուլիսում ասում է՝ ուզում եմ հարցնել Թուրքիային, իրո՞ք ուզում է մեզ ցեղասպանության ենթարկել, Ադրբեջանն իրո՞ք ուզում է վերացնել Հայաստանը, թե՞ ոչ։ Եթե հարց տար դպրոցականը, կմտածեինք՝ գիտելիք չունի, բայց եթե հարցը տալիս է երկրի ղեկավարը, ուրեմն այդ հարցը դառնում է ազգային անվտանգության խնդիր։
Այսինքն, Հայաստանի ղեկավարը հրապարակավ հարցադրում է անում՝ միգուցե Թուրքիան այդքան էլ չի ուզում մեզ ցեղասպանության ենթարկել, դրանով հերքելով նախորդ տասնամյակների գիտական գրականությանը, որն ապացուցում է, որ Թուրքիան ցեղասպան երկիր է, մեր նվիրյալներին, հերոսամարտերը, Արցախյան պատերազմները, որովհետև հարցնում է՝ արդյոք Ադրբեջանն ուզում է Հայաստանին ոչնչացել։ Իսկ Ալիևը բառացիորեն ասում է՝ մենք Հայաստանը պետք է ոչնչացնենք, Թուրքիայի քաղաքական տեսլականի հիմքում Աթաթուրքի հետևյալ լոզունգն է՝ ֆիզիկապես, բարոյապես ոչնչացել Հայաստանը»,- ասաց Ռ. Մելքոնյանը։
Պատմաբանի կարծիքով, հասարակության 30 տոկոսը նմանատիպ գաղափարների հանդեպ լոյալ է, չի ընդզվում, որ միգուցե Ադրբեջանը թշնամի երկիր չէ, Թուրքիան ցեղասպան երկիր չէ։ Ըստ նրա, սա այն ամենամեծ հարվածներից մեկն է, որ այս իշխանությունն իր տարբեր արբանյակներով ներարկել է հասարակության մեջ։
«Փաշինյանի կերպարն անհարիր է պետական պաշտոնյանի հետ։ Փաշինյանի այդ բոլոր հայտարարությունները թուրքական, ադրբեջանական վերլուծական, քաղաքական շրջանակներում մեծապես տարածվող թեզեր են, այսինքն՝ Հայաստանի ղեկավարը բարձրացնում է կիսահռետորական հարց, հերքում է Հայաստանի, հայ ժողովրդի 100 տարվա պայքարի տրամաբանությունը, որովհետև եթե հարցնում ես՝ թշնամի՞ է, թե՞ ոչ, դնում ես հարցականի տակ»,- ասաց պատմաբանը։
Նրա խոսքով, Հայաստանն այժմ դարձել է պետություն, որի հետ եթե Թուրքիան և Ադրբեջանը խոսում են, ապա ընդգծված արհամարհական շեշտադրմամբ։
«Եթե այսպիսի քաղաքականություն վարելը տգիտություն է, ապա դա հանցավոր տգիտություն է, միևնույնն է՝ արժանի պատժի։ Ամբողք քաղաքական թիմը՝ մեծամիտ, դատարկ, ոչ մի գիտելիք չունեցողների, բոլորն արժանի են ամենախիստ պատժի պետականության իմիջը, անվտանգությունը փոշիացնելու համար։ Հիմա էլ չեն ընդունում իրենց մեղքը, շարունակում են իրենց տգետ քաղաքականության հիմքի վրա քանդել երկրի հիմքերը»,- ասաց պատմաբանը՝ ընդգծելով, որ այս իշխանությունը հայոց պատմության ընթացքում ամենավնասակար իշխանությունն է։
Նա նշեց, որ Հայաստանը կայացած պետականության, հաղթած կերպարից վերադառնում է թղթե շերեփի, խնդրողի, միջազգային կառույցների գթասրտության հետ երկրի ապագան կապող պետության. «Այս իշխանությունը կործանեց նաև մեր պետականության իմիջը, հաղթող, չխնդրող կերպարից վերադառնում ենք խնդրող կերպարի»։
Ռուբեն Մելքոնյանն ասաց, որ այս իշխանության ևս մեկ րոպե, մեկ ժամ, մեկ շաբաթ մնալը պետականության հիմքերը վերջնականապես քանդելու ճանապարհ է։
Ասուլիսի վերջում Ռուբեն Մելքոնյանն ընդգծեց. «Ես որպես թուրքագետ, դոկտոր պրոֆեսոր ուզում եմ ասել՝ այո, Թուրքիան ուզում է Հայաստանը ոչնչացել, Թուրքիայի պետական գաղափարախոսության մեջ դրված է Հայաստանը ոչնչացնելու գաղափարը։ Նույնը դրված է Ադրբեջան պետության գաղափարախոսության հիմքում։ Սա պետք է տեսնել ու հասկանալ, որ դրան պետք է դիմագրավել։
Պետք է հասկանաք՝ դիմադրելու հնարավորություն չունեք, միակ բանը, որ կարող եք անել այս պետության համար՝ թողնեք այն պաշտոնը, որը չեք կարողանում կառավարել։ Մինչև կայնքի վերջը պետք է ապաշխարհեք այս պետությանը, պետականությանը, ազգին հասցրած անդառնալի հարվածների համար»։
Լրահոս
Տեսանյութեր
10-ը տղամարդ հարձակվել եք մի կնոջ վրա․ քաղաքացիները պաշտպանում են փողոցային առևտրով զբաղվողներին
