Ուզում էի փոխել վերաբերմունք, ինչին իշխանությունը չհամաձայնվեց. Թագուհի Թովմասյան
«Հայաստանում այսօր չկա ավելի կարևոր խնդիր, քան զինծառայողներին որևէ իրավունքով, արտոնությունով օժտելը»,- ԱԺ-ում լրագրողների հետ զրույցում ասաց «Զինվորական ծառայության և զինծառայողի կարգավիճակի մասին» օրենքում լրացում կատարելու մասին օրենսդրական նախաձեռնությամբ հանդես եկած «Պատիվ ունեմ» խմբակցության պատգամավոր Թագուհի Թովմասյանը:
Նա ընդգծեց, որ զինծառայողներին բոլորն են պարտական:
«Այսօրվա պայմաններում, երբ մենք չունենք նույնիսկ կահավորված առաջնագիծ, անմարդկային պայմաններում զինծառայողներն իրականցնում են իրենց պարտքը, նրանք ունեն մեր հոգածության կարիքը»,- նշեց ընդդիմադիր պատգամավորը:
Ինչ վերաբերում է օրենսդրական նախաձեռնությանը՝ Թ. Թովմասյանն ասաց. «Կան զինծառայողներ, ովքեր իսկապես ապրում են վարձով, սակայն վարձակալը չի համաձայնվում պայմանագիր կնքել: Իրենք ստիպված այլ մարդու հետ պայմանագիր են կնքում, ներկայացնում այդ պայմանագիրը որպես վարձակալության փաստաթուղթ, դրա հիման վրա ստանում են փոխհատուցում: Ստացվում է՝ զինծառայողը փաստացի բնակվում է վարձով ոչ այն հասցեում, որի համար ներկայացրել է փաստաթուղթ: Այսօր 81 զինծառայողի նկատմամբ կա քրեական հետապնդում միայն այն բանի համար, որ ապրում են վարձով: Սա աբսուրդ է»:
Նա ասաց, որ հարցը հետևողականորեն բարձրաձայնել է, գրություններ ուղարկել, խնդրել տարբեր գերատեսչություններին ուշադրություն հրավիրել այս հարցի վրա:
«Վերջին պատասխանը ստացել եմ Զինվորական դատախազությունից այն մասին, որ կա խնդիր, առաջարկում են լուծման տարբերակ: Երբ հասկացա, որ պետական օղակներում սկսել են խնդիրը դիտարկել, ահազանգ են հնչեցնում, հնարավոր համարեցի կոնսենսուս ձևավորվի, գուցե հնարավոր է հարցը տեղից շարժել: Նույնիսկ ես զիջման գնացի. իմ նախաձեռնությունը դրված էր շրջանառության մեջ, ես մեկ շաբաթով հետ քաշեցի, որ այսօրվա քննարկումը ծավալվի, գտնենք բոլոր թեկուզ բանալի բառերը, որոնք խնդրահարույց կետ չեն առաջացնի, դրա հիման վրա օրենսդրական նախաձեռնությունը դնեմ շրջանառության մեջ»,- ասաց «Պատիվ ունեմ» խմբակցության պատգամավորը:
Նրա փոխանցմամբ, առաջիկա երկու օրերին պաշտոնապես շրջանառության մեջ կդնի օրենքի նախագիծը, կխնդրի համապատասխան մարմինները գրավոր տեսակետ հայտնեն, որպեսզի դրանք ամփոփելով՝ ԱԺ-ն կայացնի իր որոշումը:
«Հուսամ՝ ԱԺ-ում չի լինի որևէ մեկը, ով կկանգնի ու կասի՝ այս խնդիրը որ լուծում ենք, առաջանում է երկրորդ խնդիր»,- ասաց Թագուհի Թովմասյանը:
Անդրադառնալով իր ներկայացրած՝ «Զինվորական ծառայության և զինծառայողի կարգավիճակի մասին» օրենքում լրացում կատարելու մասին օրենքի նախագծով առաջարկվող մեկ այլ փոփոխությանը, ըստ որի զինծառայողների առողջական վիճակի հետազոտումը, փորձաքննությունը և բուժումն իրականացնել առաջնահերթ ու անվճար՝ պետության երաշխավորած բժշկական օգնության և սպասարկման շրջանակներում, որն իշխանության կողմի չընդունվեց, նա նշեց, որ իրեն բացարձակ չեն գոհացրել ներկայացված հիմնավորումները:
«Զարմացած եմ ուղղակի, որ իմ նախաձեռնությունը չընդունվեց ու չընդունվեց ամենաանհեթեթ պատճառաբանությամբ: Ասում են՝ մենք չենք ցանկանում, որ զինծառայողն անհավասար պայմաններում լինի, եթե մենք զինծառայողին տալիս ենք արտոնություն, պետք է տալ մյուս խավերին, այդ թվում լրագրողներին, իրավաբաններին:
Բայց ես կարծում եմ, որ հասարակության բոլոր խավի ներկայացուցիչները պետք է ավելի քիչ սահմանափակ հնարավորություններ ունենան, քան զինծառայողները, քանի որ մենք պարտք ենք զինծառայողներին: Իմ օրինագիծը ոչ լրացուցիչ բեռ էր բյուջեի համար, ոչ կազմակերպական լրացուցիչ խնդիր էր առաջացնում, ընդամենը վերաբերմունք էր, այսինքն՝ ինչ վերաբերմունք է ցուցաբերվում զինծառայողի նկատմամբ»,- ասաց Թ. Թովմասյանը:
Նա նշեց՝ նկատել է, որ ցանկացած հիվանդանոցում պետական պատվերով սպասարկվող քաղաքացիների, առավել ևս զինծառայողների նկատմամբ չկա հատուկ վերաբերմունք, առանձնահատուկ վերաբերմունք է ցուցաբերվում վճարունակ քաղաքացիների նկատմամբ, այսինքն՝ եթե քաղաքացին վճարունակ է, գումար է տալիս, արտահերթ նա պետք է մտնի, իսկ պետպատվերը թող սպասի:
«Այս վերաբերմունքն է մեր երկրում, ուզում էի փոխել հակառակը, ինչին իշխանությունը չհամաձայնեց»,- ընդգծեց «Պատիվ ունեմ» խմբակցության պատգամավոր Թագուհի Թովմասյանը:
Հարակից հրապարակումներ`
- Մենք ավանդույթ ունենք՝ աշխատել բաց. Թագուհի Թովմասյանը չընդունեց Անդրանիկ Քոչարյանի առաջարկը
- Նախագիծը մերժում եք, բայց դիմացը ոչինչ չեք առաջարկում. Թագուհի Թովմասյանը՝ Ավանեսյանին
- Մինչև հիմա չունենք բանակում պատվաստումների քանակի մասին որևէ տեղեկություն. Թագուհի Թովմասյան