Ձեր վստահելի աղբյուրը

«Տաշիր Պիցցա» ցանցի կետերում, «Երեմյան Փրոջեքթս»-ի «Բուրգըրի» ռեստորանում, Տաթև դպրոցում, «Էլկա» զարգացման կենտրոնում սնվածների շրջանում աղիքային վարակի բռնկման պատճառների, իրականացրած գործողությունների ու հետագա քայլերի շուրջ Panorama.am-ը զրուցել է Սննդամթերքի անվտանգության տեսչական մարմնի ղեկավար Գեորգի Ավետիսյանի հետ։

Panorama.am-Պարոն Ավետիսյան, վերջին շրջանում գրանցված թունավորումներն ու աղիքային վարակի բռնկումը մարդկանց մոտ տպավորություն էր ստեղծել, որ պատճառը թռչնամիսն է, ձուն կամ էլ մայոնեզը։ Սակայն ՍԱՏՄ-ն հայտարարեց, որ լաբորատոր փորձաքննությունների արդյունքում հումքում, կիսաֆաբրիկատներում որևէ անհամապատասխանություն չի հայտնաբերվել։

Գեորգի Ավետիսյան-«Երեմյանների» դեպքում հումքում չենք հայտնաբերել, բայց կիսաֆաբրիկատում ենք հայտնաբերել։

Panorama.am -Շնորհակալ եմ հստակեցման համար։ Վերջին թունավորումները թռչնամսի՞, թռչնամթերքի՞ հետևանքով էին։

Գեորգի Ավետիսյան -Մենք էլ էինք ի սկզբանե թռչնամսի վրա կասկածում, և առաջին հերթին մայոնեզի՝ որպես արագ փչացող սնունդ։ Սակայն մայոնեզի պարագայում լաբորտաոր փորձաքննությունը տվեց բացասական արդյունք, թռչնամսի հումքում որևէ անհամապատսխանություն չկար, բայց խնդիր կար եփած թռչնամսում։ Ներկրված հում հավերի պարագայում լաբորատոր փորձաքննությամբ որևէ բան չի հայտնաբերվել։

Panorama.am -Ստացվում է, որ խնդիրն ի հայտ է եկել հավի մսի ջերմային մշակումից հետո՞։

Գեորգի Ավետիսյան -Այո, դրանք այն հարուցիչներն են (սալմոնելա-խմբ/), որոնք 70 աստիճան ջերմային մշակման արդյունքում վերանում են, բայց մենք հումքն էլ ենք ստուգել ու որևէ բան չենք հայտնաբերել։ Դա մեզ թույլ է տալիս վստահ ասել, որ սնունդը պատրաստելու ընթացքում է խնդիրը եղել կամ դրանից հետո, այսինքն երկրորդային աղտոտում է եղել։

Panorama.am -Սա վերաբերում է բոլո՞ր դեպքերին։
Գեորգի Ավետիսյան -Այո, սա վերաբերում է թունավորման բոլոր դեպքերին՝ և «Տաշիր Պիցցա»-ին, և «Երեմյան Փրոջեքթս»-ին,  և «Տաթև»-ին, և «Էլկա»-ին։ Ընդ որում, բոլորի դեպքում հավի մսի  մատակարարները տարբեր են։ Թունավորումների պատճառը եղել է երկրորդային աղտոտվածությունը։ Զուտ մարդկային գործոն է, իրենց աշխատկիցների խնդիրն է եղել, որոնցից անջատվել է սալմոնելա։

Panorama.am-«Տաշիր պիցցա»-ի երևանյան բոլոր մասնաճյուղերում հիմա ստուգումներ են բացված։ «Երեմյան փրոջեքթս» ընկերությանը պատկանող բազմաթիվ ռեստորաններ կան, հնարավո՞ր է՝ այս սննդի կազմակերպություններում էլ իրականացվեն ստուգումներ։

Գեորգի Ավետիսյան-Երեմյաններին պատկանող ցանցն այս տարի ստուգման ենթարկվել է, և զորամասերին մատկարարվող սնունդը, և ռեստորանները։ Երեմյանների խնդիրը եղել է միայն «Բուրգըրի»-ում, խնդիրը եղել է արդեն պատրաստի կիսաֆաբրիկատի մեջ, ինչպես նշեցի։ Երեկվա տվյալներով, իմ իմանալով, այդ սննդի կազմակերպությունը չի գործում։ «Տաշիր պիցցա»-ի մասով ցանցում եղեծ ողջ սննդամթերքը ոչնչացվել է, իրականցվել է ախտահանում, որից հետո արդեն թույլ ենք տվել աշխատել։

Panorama.am-«Հայր և որդի Երեմյաններ» ընկերությունում՝ որպես ռիսկային տնտեսվարող հաջորդ տարի ստուգումներ են նշանակված։

Գեորգի Ավետիսյան-Այո, ռիսկային կազմակերպությունները տարին մեկ անգամ ստուգվում են։

Panorama.am-Նման մասայական թունավորումները կանխելու համար ՍԱՏՄ-ն ռազմավարություն, քաղաքականություն փոխե՞լ է։

Գեորգի Ավետիսյան-Ցավոք սրտի, ՍԱՏՄ-ն քաղաքականություն մշակելու իրավասություն չունի։ Միջազգային կազմակերպությունների միջոցով փորձում ենք ներդնել ռեյտինգավորման ծրագիր, բայց դա բավականին երկար ու ժամանակատար աշխատանք է։ Ամերիկյան մոդելն ենք ուզում օգտագործել, դիմել ենք միջազգային կազմակերպություններին, որ մեզ համար թրեյնինգներ իրականացնեն, սակայն համավարկի պատճառով դեռ չի ստացվում։ Գաղափարը եղել է 2019-ին, բայց դեռ հետաձգվում է։ Գաղափարն ամեն դեպքում կա, հետո կդիմենք այն մարմիններին, որոնք քաղաքականություն են մշակում։ Մեզ մոտ նույնիսկ սննդի օբյեկտները բացելուց որևէ լիցենզավորում, ծանուցում չի կատարվում, նման բան գոյություն չունի։ Տնտեսվարողը պարտավոր է գրանցվել մեր ռեեստրում, բայց կգտվեն շատ տնտեսվարողներ, որոնք պարտաճանաչ չեն գտնվի կամ ուղղակի չեն իմանա, որ նման բան կա։ Դա էլ է խնդիր։

Panorama.am-Պարոն Ավետիսյան, իսկ Դուք Ձեր մեջ մտածե՞լ եք, թե ինչի հետևանք էր նման մասայական թունավորումը։ Օրինակ, «Տաշիր Պիցցա»-ի երկու մասնաճյուղերում սնված մինչև երկու հարյուր մարդ դիմել էր հիվանդանոց...

Գեորգի Ավետիսյան-Տեսեք, եթե չեմ սխալվում, «Տաշիր Պիցցա»-ն ամեն տարի մեզ գրավոր դիմում էր, որպեսզի իրենց մոտ ստուգումներ իրականացնենք։ Վերջին երկու-երեք տարում նման դիմում չի եղել իրենց կողմից։ Հիմա հետադարձ ենք հիշում։ Հիմա այնպես է ստացվել, որ վերջին երկու-երեք տարիներին ստուգումներ չենք իրականացրել։ Իրենց պահանջը չի եղել։

Panorama.am-Որպես սննդի անվտանգության համար պաըասխանատու տեսչական մարմնի ղեկավար՝ ո՞րն է Ձեր հորդորը, կոչը տնտեսվարողներին։

Գեորգի Ավետիսյան-Ամենակարևոր կոչս այն է, որ պետք է տնտեսվարողներն ունենք սննդամթերքի անվտանգության մասնագետ։ Մենք պատրաստ ենք մասնագիտական աջակցություն ցուցաբերել, որպեսզի խոշոր, միջին, ցանկալի է նաև փոքր տնտեսվարողներն ունենան մասնագետներ, որոնք տարրական գիտելիքներ կունենան սննդի անվտանգության վերաբերյալ ու պատասխանտվությւոն կկրի հնարավոր զարգացումների համար։ Սննդի անվտանգության պատասխանատուն միայն տեսչական մարմինը չէ, առաջին հերթին արտադրողն է, իրացում կազմակերպողը, հետո նոր պետական մարմինը։

Panorama.am-Դուք համարո՞ւմ եք, որ տեսչական մարմինը թերացել է իր աշխատանքը կատարելու ընթացքում։

Գեորգի Ավետիսյան-Ոչ ոք էլ իդեալական չէ, քանի կա մարդկային գործոնը, թերացումներ միշտ էլ լինելու են։ Հնարավոր չէ իդեալական աշխատանք վարել, թունավորումներ լինում են նույնիսկ այնպիսի երկրներում, որոնք ունեն սննդի անվտանգության լավագույն համակարգերը։ Թունավորումներից դժվար է զերծ մնալ։