Ձեր վստահելի աղբյուրը

«Պետք է փաստել, որ մեր իրականության մեջ տեղի է ունեցել ֆունկցիոնալ ինվերսիա, երբ քաղաքական իմպոտենտների իշխանությունը, չկարողանալով սպասարկել մեր պետության և ազգի շահը, տրվել է քաղաքական հովերի և «Ով էշ, ես փալան» կարգախոսով սպասարկում են աշխարհաքաղաքական շաբաշները՝ նայելով, թե ով իրենց կպահի իշխանության»,- «Հենարան» մամուլի ակումբում հայտարարեց ՀՀԿ անդամ Լևոն Նազարյանը։

Նրա կարծիքով՝ այս իրավիճակում պետության բեռը կրկին մնացել է այն գործիչների վրա, որոնք եղել են մեր պետության հիմքում կանգնած և մշտապես առաջ են տարել մեր շահը։

Նազարյանը հայտնեց, որ դեռևս մի քանի ամիս առաջ ասվել էր, որ ՀՀԿ կուսակցության ձայնը լինելու է լսելի, և ոչ մեկի համար գաղտնիք չէ, որ այդ աշխատանքի հիմնական ատրիբուտներից մեկն աշխատանքն է միջազգային հարթակներում և դրա արդյունքները տեսանելի էր «XXI դարի գլոբալ մարտահրավերները. միջկուսակցական հարթություն» թեմայով միջազգային միջկուսակցական տեսակոնֆերանսի ժամանակ, որին մասնակցում էին 30 երկրի ներկայացուցիչներ։

Բանախոսի ներկայացմամբ՝ տեսակոնֆերանսի ժամանակ Սերժ Սարգսյանը բարձրացրել է հիմնահարցեր, որենք կենսական կարևորություն ունեն մեր երկրների համար։

Նա հայտնեց, որ երրորդ նախագահը տեսակոնֆերանսի ժամանակ մի քանի կարևոր ուղերձներ է հղել, որոնցից մեկով բարձրացրել է արգելված զինատեսակների օգտագործման և գերիների հարցը, որոնց մասին Նիկոլ Փաշինյանը վախենում է որևէ ծպտուն հանել։

«Նիկել Փաշինյանը կոմպլեքսներ ունի Թուրքիայից և Ալիևից և տեսել ենք, թե ինչպես նրանք երկիրը տարան պալանավորված պարտության»,-ասաց Լևոն Նազարյանը։

Բանախոսը նկատեց, որ Սերժ Սարգսյանը հայտնել է, որ ադրբեջանցիներն արդեն ոտնձգություն են անում ՀՀ սուվերեն տարածքների վրա և զուգահեռ հիշեց, որ  Նիկոլ Փաշինյանը հայտարարում էր, որ Սև լճի 30 %-ի համար պատերազմ չի մղի։

Լևոն Նազարյանի խոսքով՝ ՀՀ երրորդ նախագահի ամենակարևոր ուղերձն այն էր, որ ստեղծված իրավիճակի հետ հայ ժողովուրդը չի համակերպվելու, որը սակայն չպետք է դիտել որպես ռևանշիզմ։

Նա նկատեց, որ այդ հարցը սուր է ընկալվել ադրբեջանցիների կողմից և վերջիններս փորձ էին արել  ընդհատել Ս. Սարգսյանի ելույթը, բայց ադա  նրանց չէր հաջողվել։

Բանախոսն առանձնացրեց նախկին նախագահի ելույթի այն հատվածը, որում կարևորվում էր Արցախի ինքնորոշման իարվունքի հացը և, որ կարգավիճակի խնդիրը լուծված չէ։

«Այս իշխանությունը իր համրությամբ, գլխիկոր պահվածքով, դեռահաս օրիորդի նազանքով  ամեն անգամ չի հանդգնում այս հարցերը բարձրաձայնել»,-նկատեց Լևոն Նազարյանի և մեջբերեց Սերժ Սարգսյանի այն խոսքը, ըստ որի՝ Արցախի ժողովրդի ինքնորոշման իրավունքը սակարկման առարկա չէ։

Նա փաստեց, որ ժողովուրդը տեսնում է, որ այս իշխանության համար ինքնորոշումն առևտրի առարկա է և շեշտեց, որ ՀՀԿ-ն իր քաղաքական օրակարգում այդ հարցը պահելու է։

Նազարյանն անդրադարձավ նաև Հայաստանի և Ռուսաստանի դաշնակցային փոխհարաբերությունների մասին հարցին՝ հիշեցնելով, որ Սերժ Սարգսյանը կոնֆերանսում շեշտել է, որ ճիշտ որոշում էր Հայաստանի համար  անդամակցել Եվրասիական տնտեսական միությանը և Ռուսական 102-րդ ռազմաբազայի ներկայության երկարացումը։

ՀՀԿ անդամը նկատեց, որ գործող իշխանությունները հակառակ վարքագիծն են տանում, քանի որ ամեն ինչ անում են հակառուսական քարոզ տանելու ՀԱՊԿ-ի դերն արժեզրկելու, Ռուսաստանի հետ ռազմավարական դաշնակցական հարաբերություններն արժեզրկելու համար։
«Դրա ամենամեծ դրսևորումն կայանում է նրանում, որ ԱԽՔ քարտուղարը ԱԺ ամբիոնից բանավոր կերպով, ասպես ասած, ծիտիկ ուղարկեց ՀԱՊԿ–ին՝ ասելով՝ դե հիմա եկեք մեզ պաշտպանեք, լավ հասկանալով, որ այն չի համապատասխանում առաջադրված օրակարգին և նպատակաուղղված էր հակառուսական շղարշ տարածելուն»,-հայտարարեց ՀՀԿ անդամը։