Արա Վարդանյան. Փաշինյանը սեփական որոշումներ չի ընդունում
«Մարտի 1-ից խոսելուց երբեք չպետք է մոռանանք, որ այն հոկտեմբերի 27-ի տրամաբանական շարունակությունն էր»,-ասուլիսում հայտարարեց «Հայաստան» համահայկական հիմնադրամի նախկին գործադիր տնօրեն Արա Վարդանյանը և հավելեց, որ ՀՀ երկրորդ նախագահ Ռոբերտ Քոչարյանը մեկ անգամ չէ, որ կանխել է պետական հեղաշրջման փորձերը:
Նրա խոսքով՝ հոկտեմբերի 27-ի իրադարձություններից հետո Ռոբերտ Քոչարյանը կանխեց պանթյուրքիստական պլանների իրականացումը՝ հիշեցնելով, որ այն ժամանակ կարմիր գրիչով գրված էին ապագա նախարարնների անունները, որը պանթյուրքիստական պլանի առաջին մասն էր:
Ըստ Վարդանյանի՝ հոկտըեմբերի 27-ից հետո նման ձևով ցանկանում էին իշխանությունը զավթել հայ ժողովրդից և երկիրը տանել այնտեղ, ուր գնաց 2018 թվականից սկսած:
«Հայաստան» դաշինքի անդամը գտնում է, որ հոկտեմբերի 27-ից հետո, մարտի 1-ին տեղի ունեցավ պանթյուրքական ուժերի երկրորդ փորձը, որը նույնպես տապալեց երկրորդ նախագահը:
«Ցավոք 2018 թվականին պրոթուրքական ուժերին հաջողվեց հաղթանակ տոնել Հայաստանում, էլ ավելի ցավալի է, որ մեր հասարակության մի զգալի մասն այդպես էլ չհասկացավ, թե իրականում ինչ է կատարվում Հայաստանում»,-հայտարարեց Արա Վարդանյանը և հավելեց. «2018 թվականին ժողովուրդը չհասկացավ, որ պայքարը ոչ թե Սերժ Սարգսյանի դեմ էր, այլ՝ Արցախի»:
Բանախոսը զարմանալի չհամարեց, որ 2018 թվականից անմիջապես հետո տեղի ուենցավ արցախյան հերոսների վարկաբեկումը, այնուհետև՝ արցախյան կործանիչ պատերազմը:
«Ես լիահույս եմ, որ շուտով՝ մոտակա ժամանակները ՀՀ ընդդիմադիր դաշտում հավաքված առաջնորդները, կուսակցությունները միահամուռ՝ ձեռք-ջեռքի տված, կկարողանան ազատվել այս իշխանությունից»,-նկատեց բանախոսը:
Անդրադառնալով Ղազախստանի իրադարձություններին՝ Վարդանյանը նկատեց, որ փողոցից իշխանության եկած մարդը հայտարարում է, թե՝ «ղազախստանյան նման զարգացումն անընդունելի է»...։
Արա Վարդանյանը հիշեցրեց, որ Փաշինյանը ղազախ ցուցարարներին «ահաբեկիչներ» է անվանել, և շեշտեց. «Դե, ես ուրախ եմ, որ Փաշինյանը վերջապես իրեն ահաբեկիչ ճանաչեց, իհարկե, ես ավելի կոշտ որակում կտայի, բայց եկեք համակերպվենք, որ նա պարզապես ահաբեկիչ է»:
«Հայաստան» դաշինքի անդամը, հիշեցնելով, որ 90-ականների սկզբին Արևմուտքին հաջողվեց փլուզել ԽՍՀՄ-ը, նկատեց. «Սակայն այժմ, առանց հասկանալու, Արևմուտքը նպաստում է դրա վերածննդին՝ Ռուսաստանին այլ ելք չթողնելով, քան հարևանների հետ փոխգործակցության նոր ձևաչափեր գտնելը»։
Արա Վարդանյանը շեշտեց, որ Հայաստանում իշխանությունները Արևմուտքի և Թուրքիայի կողմից են, բայց Ռուսաստանը մինչ այժմ կարողացել է որոշակի հարցերում օգտագործել Հայաստանի գործող իշխանություններին, որը Արևմուտքի որոշակի արձագանքի կհանգեցնի։
«Նիկոլ Փաշինյանը մեկ Արևմուտքից է ապտակ ստանում, մեկ Ռուսաստանից, և դա կշարունակվի այնքան ժամանակ, քանի դեռ նա փորձում է բոլորին բավարարել»,-ասաց «Հայաստան» դաշինքի ներկայացուցիչը և հայտնեց, որ Փաշինյանը սեփական որոշումներ չի ընդունում, այլ ԱՄՆ-ի, ՌԴ-ի, Թուրքիայի հրահանգներն է կատարում: