Ձեր վստահելի աղբյուրը

«Դեկտեմբերի 5-ի ՏԻՄ ընտրություններից հետո Վարդենիսում ստեղծված իրավիճակը նոն սենս է»,-լրագրողների հետ հանդիպմանը հայտարարեց Վարդենիսի ՏԻՄ ընտրությունների մասնակից «Ահարոն Խաչատրյան» դաշինքի շահերի ներկայացուցիչ Վարազդատ Հարությունյանը։

ՏԻՄ ընտրությունների արդյունքում «Ահարոն Խաչատրյան» և «Միասնական Վարդենիս» կուսակցությունների դաշինքները համագործակցության հուշագիր են ստորագրել։

Ընտրությունների արդյունքում, ՔՊ-ն ստացել էր 12 մանդատ, «Ահարոն Խաչատրյան» դաշինքը՝ 10 մանդատ, «Միասնական Վարդենիս»-ը՝ 5 մանդատ։

«Կասկածելի վերահաշվարկի արդյունքում «Միասնական Վարդենիս»-ի մանդատները նվազեցրեցին, և այն ունեցավ չորս մանդատ։ Կասկածելի եմ ասում, քանի որ մեկ մանդատը արժեցավ մեկ քվե։ Մենք բողոքարկեցինք այդ որոշումը, դիմեցինք Վարչական դատարան։ Դատարան էլ ընտրական հանձնաժողովի որոշումն անփոփոխ թողնվեց, ինչը մենք համարում ենք ոչ իրավաչափ։ Ակնհայտ խախտումով քվեաթերթիկները վավեր ճանաչվեցին, ու որևէ փոփոխություն տեղի չունեցավ»,-ասաց «Միասնական Վարդենիս» դաշինքի ներկայացուցիչ Դավիթ Շահնազարյանը։

Նա հիշեցրեց, որ իրենց դաշինքի ընտրացուցակը գլխավորող Արամ Հարությունյանը կանչվել է ՔԿ, ապա ձերբակալվել, երկու ամսով կալանավորվել։ Դաշինքում սա որակում են քաղաքական հետապնդում, որն արվել է այն պատճառով, որ Հարությունյանը հրաժարվել է կոալիցիոն հուշագիր ստորագրել ՔՊ-ի հետ։

«Սրանք խիստ քաղաքական որոշումներ են, որոնք չեն տեղավորվում իրավական հարթության մեջ։ Բոլորդ էլ ականատես եղաք Վարդենիս  համայքնի ավագանու առաջին նիստին, երբ երկու դաշինքների ավագանիներին դուրս բերեցին դահլիճից, մի բան, որը երբեք չի եղել Հայաստանի պատմության մեջ։ Մենք ակնկալում ենք իրավական ու իրավաչափ լուծումներ, ակնկալում ենք, որ այս հարցն իրավական գնահատական կստանա»,-ասաց Շահնազարյանը։

Ասուլիսի մյուս բանախոս «Ահարոն Խաչատրյան» դաշինքի ներկաաացուցիչ Խաժակն Մկրտչյանն էլ ավելացրեց, որ «Միասնական Վարդենիսի» հետ կոալիցիա կազմելուց հետո 27 մանդատներից 14-ն իրենցն է։

Նա նշեց, որ համայնքապետի ընտրությունը նախ ձգձգում էին ՔՊ-ականները։ Չնայած խոչընդոտներին, դեկեմբերի 30-ին ընտրեցին համայնքապետ, արձանագրեցին ընտրությունը, սակայն թղթերն ի պահ տալ չկարողացան, քանի որ աշխատակազմի ղեկավարին դուրս կանչեցին ու նա այլևս չվերադարձավ։

Համայնքապետ ընտրվեց Ահարոն Խաչատրյանը, խոչընդոտների պատճառով նա երդվեց համայնքապետարանի բակում՝ պահպանելով արարողակարգը։

«Սակայն համայնքապետը դեռ չի կարողանում կատարել իր պարտականությունները, քանի որ խոչընդոտները, որոնք թույլ չեն տալիս մուտք գործել այդ շենք, առայժմ հաղթահարված չեն»,-ասաց Մկրտչյանը։

Վարազդատ Հարությունյանը խոչընդոտները որակում է  ապօրինություններ, որոնք նկարահանված են։

«ՔՊ անդամները սխալ հաշվարկ էին արել, մտածելով, որ եթե միջադեպ լինի, Ահարոն Խաչատրյանը կամ Կարեն Մկրտչյանը, կամ ավագանու որևէ այլ անդամ բերման ենթարկվի, ապա ավագանու նիստը համարվելու է չկայացած։ Բայց ավագանու առաջին նիստը գումարվում է օրենքի ուժով, որին գրանցվել են ավագանու բոլոր անդամները։ Ավագանու առաջին նիստը չկայացած համարելու որևէ իրավական կառուցակարգ գոյություն չունի, կա ընդմիջման, հանգստի համար նախատեսված կարգավորում։ Մինչև համայնքապետի ընտրությունը նիստը չի կարող համարվել ավարտված»,-ասաց ներկայացուցիչն ու ընդգծեց այդ միջադեպից հետո որևէ զարգացում չկա։

Փաստաբանն ասաց,  ավագանու անդամեներ Կարեն Մկրտչյանին  ու Ահարոն Խաչատրյանին բերման ենթարկելուց հետո հայտարարվել է նիստը շարունակելու մասին, այդ մասին ծանուցվել է ՔՊ-ականներին,  ավագանու «Ահարոն Խաչատրյան» և «Միասնական Վարդենիս» խմբակցությունների  ավագանու անդամները սպասել են նրանց։

«Բավականին երկար նրանց սպասելուց հետո ավագանու անդամները որոշեցին շարունակել  նիստը։ Դրա ընթացքում ՔՊ-ական անդամները ներխուժեցին դահլիճ, հայտարարեցին, որ նիստն ապօրինի է։ Առաջարկվեց, որ նրանք մասնակցեն նիստին։ Նրանք էլ հայտարարեցին, «մեր առաջին համարն այստեղ չէ»։ Ավագանու ՔՊ-ական անդամներին ասացին, ինչքան պետք է կսպասեն, թաքուն նիստ անցկացնելու մտադրություն չունեն։ Նրանք հրաժարվեցին, քաղաքական հայտարարություններ արեցին, ասացին իրենց փաստաբանին են սպասում, գնացին ու չեկան»,-ասաց Վ. Հարությունյանը։

Շարունակելով ներկայացնել իրադարձությունները, նա նշեց, որ նորընտիր համայնքապետի երդմնակալության օրը ոստիկանությունը խոչընդոտեց  ավագանու անդամների մուտքը համայնքապետերան, որը նրանց նստավայրն է, մինչդեռ իրենք նախապես իրավական բնույթի գրություն էին հղել ոստիկանություն՝ խնդրելով ոչ միայն չխոչընդոտել, այլև օգնել։

««Ոստիկանության մասին» ՀՀ օրենքի 11-րդ հոդվածը հստակ սահմանում է, որ ոստիկանությունը պետք է աջակցի ՏԻՄ աշխատանքներին։ Ոստիկանությունն ապօրինի խոչընդոտեց։ Մենք դիմելու ենք դատարան, ավագանու 14 անդամներ հանդես են գալիս որպես համահայցվորներ։ Դատարանից պահանջելու ենք ոչ իրավաչափ ճանաչել ոստիկանության գորողությունները, խնդրելու ենք նաև հայցի ապահովման միջոց կիրառել ու արգելել ոստիկանությանը խոչընդոտել ավագանու աշխատանքներին»,-ասաց Վ. Հարությունյանը։

Նա նաև հայտեց, որ Վարդենիսի ավագանու «Քաղաքացիական պայմանագիր» խմբակցությունը դիմել է վարչական դատարան՝ պահանջելով անվավեր ճանաչել համայնքապետի ընտրության մասին որոշումը, մինչդեռ իրենց մարտավարական հնարքները անակնկալի են բերելու ՔՊ-ականներին։ 

Դրանց մասին ասուլիսում խոսել չի ցանկանում, բայց նկատած տարօրինակությունները թվարկեց։  Օրինակ, իրենց զանգել են ուրբաթ օրը, երկուշաբթի կանչել դատարան, որ որոշում վերցնեն։ Հունվարի 10-ին վերցրել են հայցը վարույթ ընդունելու որոշումը, որը ստորագրված է հենց հունվարի 10-ի ամսաթվով։

«Այսինքն դատարանի աշխատակիցը, որ զանգել է, ուրբաթ օրն արդեն գիտեր, որ երկուշաբթի վարույթ ընդունելու որոշում են կայացնելու»,-ասաց Վ. Հարությունյանը՝ կասկած հայտնելով նաև այն դատավորի մասին, որին ոչ էլեկտրոնային տարբերակով մակագարվել է հայցը։

Նա հիշեցնում է, որ ՔՊ-ի կողմից դատարան ներկայացրած ու վարույթ ընդունած հայցադիմումը չի կասեցնում Ահարոն Խաչատրյանի լիազորությունը, նման ոչ որոշում կա , ոչ էլ միջնորդություն։

«Վաղը ժամը 9։00-ից սկսած ոստիկանությունը ոչ միայն պետք է ձեռնպահ մնա Ահարոն Խաչատրյանի՝ համայնքապետարան մուտք գործելը խոչընդոտելուց, այլև անհրաժեշտության դեպքում պետք է աջակցի, որպեսզի Ահարոն Խաչատրյանը հնարավորություն ունենա մտնել համայնքապետարան, ստանձնել  իր պարտականությունները»,-ասաց դաշինքի ներկայացուցիչ Վ. Հարությունյանը։