Ձեր վստահելի աղբյուրը

Արտեմ Ալիխանյանի անվան Ֆիզիկայի ինստիտուտի կողքին՝ Երևանի Աջափնյակ վարչական շրջանի «Ֆիզգոռոդոկ»-ում շինաշխատանքները ժամանակավորապես կասեցված էին` հողի ապօրինի օտարման հիմքերը քննող քրեական գործի շրջանակներում, սակայն դրանք անակնկալ կերպով վերսկսեցին նոյեմբերին, փորման աշխատանքները մեծ ինտենսիվությամբ շարունակվեցին` անտանելի աղմուկ ու անհանգստություն պատճառելով հարակից շենքերի բնակիչներին, այդ թվում` շաբաթ օրերին ևս։ «Ֆիզգոռոդոկ»-ում շինաշխատանքների ընթացքի  մասին գրառում է արված «ՖիզԳորոդոկ Երևան» ֆեյսբուքյան էջում։

«Դրան զուգահեռ` իրավապահ մարմինների ուժերի մեծ կենտրոնացմամբ ընթացք տրվեց բնակիչների հանդեպ ապօրինի հետապնդումներին և նրանց դեմ հարուցված կեղծ գործերին` շարունակական քաշքշուկի ու անհանգստության մեջ պահելով նրանց. մետաղական դարպասների վրա արված գրությունների կամ «պզիկի» գործը կասեցվեց քննիչի կողմից, սակայն ընդամենը մեկ օր անց վերաբացվեց` ըստ մեր տեղեկությունների` ուղղակիորեն դատախազության ցուցումով

Կառուցապատող կազմակերպության գործողությունները  շարունակում են խաթարել բնակիչների բնականոն կյանքն ու այս պահին նրանց բերած ծանր տեխնիկան խոչընդոտում է թաղամաս մտնող միակ ճանապարհով մեքենաների և հետիոտնի տեղաշարժը, ամբողջությամբ փակվել է շրջանցող ճանապարհը։

Երևանի նոր քաղաքապետ Հրաչյա Սարգսյանը, Ազատության ուղիղ եթերով խոստանալով այցելել թաղամաս և զրուցել բնակիչների հետ, դեռևս չի արձագանքել առարկայական պայմանավորվածության մեր առաջարկներին և չի ներկայացրել հանդիպման օրվա իր առաջարկը։

Հաշվի առնելով նախատոնական և տոնական օրերի զբաղվածությունը` մեր բնակիչներն ուժերը կենտրոնացրել են իրավական պայքարի վրա, սակայն, ինչպես տեսնում եք, անպատժելիությունն ու ապօրինությունները շարունակվում են` իրավապահ մարմինների թողտվությամբ և աջակցությամբ»,- գրված է էջում։