Բանակն ունի բոլոր կարողություններն արագ համալրվելու և սահմանում նորմալ իրավիճակ ստեղծելու համար. Օհանյան
«Ադրբեջանի հետ խաղաղության գնալն առանց նախապայմանների, առանց համապատասխան իրադրության ճիշտ գնահատման, անընդունելի է»,- ԱԺ-ում լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը։
Նա ընդգծեց, որ հակառակորդի հիմնական նպատակն է Արցախի Հանրապետության հայաթափումը։
«Նրա հեռահար նպատակն է տարբեր տիպի ճնշումներով, մարտավարական քայլերով փորձել ռազմավարական կարևոր բարձունքներ, կետեր, աշխարհագրական դիրքեր զբաղեցնել, որպեսզի հետագայում այդ հատվածներից ճնշումներն Արցախի ժողովորդի վրա կարողանան շարունակական դարձնել»,- ասաց Օհանյանը։
Ընդդիմադիր խմբակցության ղեկավարի համար անընդունելի է ՀՀ իշխանությունների մինչև հիմա ձեռնարկած միջոցառումները. «Հայաստանի և Արցախի իշխանությունները մինչև հիմա չեն գիտակցել, թե ինչպիսի անվտանգային միջավայր գոյություն ունի Հայաստանի և Արցախի շուրջ, ժամանակին որոշումներ չեն ընդունել։
Միանշանակ, այսօր այս իրադրության պատասխանատուներն այս իշխանություններն են և բնակչությունը պետք է այս իշխանություններից պահանջի արագ միջոցառումներ ձեռնարկել»։
«Հայաստան» խմբակցության ղեկավարը նշեց, որ ԱԺ-ում գործունեություն ծավալելու ընթացքում տեսել են, որ Հայաստանի իշխանություններն ամեն ինչ գցում են ուրիշների վրա, միայն թե իրենք ոչ մի բանով չզբաղվեն։
«Հայկական բանակը, պաշտպանության բանակն ունեն բոլոր հնարավորությունները, կարողությունները արագ որոշումներ ընդունելու, զինված ուժերն արագ համալրելու և սահմանում նորմալ իրավիճակ ստեղծելու համար։ Դա նշանակում է կամ նրանցից չեն պահանջում, կամ հստակ հրամաններ ՀՀ իշխանությունների կողմից չեն ստացել»,- ասաց Օհանյանը։
Նա նշեց, որ յուրաքանրյուր պահի պետք է սպասել մարտական գործողությունների, պատերազմի. «Եթե ուզում ես խաղաղություն, պետք է պատրաստվել պատերազմի։ Իսկ այդ ուղղությամբ այս իշխանությունների կողմից կատարվող քայլերը չափազանց դանդաղ են։
Նորից եմ ասում՝ Հայաստանի Զինված ուժերը, Արցախի Պաշտպանության բանակը բավականին լուրջ ճանապարհ են անցել իրենց կայացման ու զարգացման ողջ ընթացքում, ամենաունակն են այսօր վերականգնվելու, արագ միջոցառումներ ձեռնարկելու, որպեսզի շարունակեն հանդիսանալ մեր ժողովորդի անվտանգության երաշխիք։ Իսկ դրա համար պետք է հրամաններ ստանան զարգացման, բարեփոխումների պլաններ կազմեն ու արագ գնան այդ ամենն իրականացնելու»։
Ս. Օհանյանի խոսքով, հայկական բանակն, ի տարբերություն նախկինի, միայնակ ի վիճակի չէ մեր անվտանգությունն ապահովելու, մինչև որ չվերականգնվի։
«Դա նշանակում է, որ միջազգային երաշխիքների օգտագործումն այն ուղղությունն է, գերակա քայլերից մեկն է, որ Հայաստանի իշխանությունները կարող են անել, բայց դրա հետ մեկտեղ պետք է արագ քայլեր կատարեն մեր բանակի վերականգնման ուղղությամբ»,- ասաց «Հայաստան» խմբակցության ղեկավարը։
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց