Ձեր վստահելի աղբյուրը

Ապրիլի 3-ին Պարոնյանի անվան երաժշտական կոմեդիայի պետական թատրոնում պրեմիերա էր՝ «Կրկեսը վառում է լույսերը» բազմաժանր ներկայացումը: Panorama.аm-ի հետ զրույցում   «Երևանի կրկեսի» գեղարվեստական ղեկավար, ՀՀ  մշակույթի վաստակավոր գործիչ, պրոֆեսոր, Հայաստանի կրկեսային գործիչների միության նախագահ Սոս Պետրոսյանն ասաց, որ ներկայացումներն անցել են լեփ-լեցուն դահլիճում, ստիպված մայիսի 21-ին կրկնելու են նույն ծրագիրը։

Նա նշեց, որ այնպես էր բեմադրված ներկայացումը, որը մարդկանց, կարծես, ասում էր՝ սպասեք, շուտով կրկեսը կբացվի։

«Կրկեսը վառում է լույսերը» բազմաժանր ներկայացմանը մասնակցել են Երևանի կրկեսին կից կրկեսային ստուդիայի սաներ, պրոֆեսիոնալ դերասաններ։

Ներկայացման բեմադրիչ Հրաչ Պետրոսյանը Սոս Պետրոսյանի թոռն է, ով նախ սովորել և ավարտել է Ֆրանսիական համալսարանի իրավագիտության ֆակուլտետն, այնուհետև  ընդունվել է Թատրոնի և կինոյի ինստիտուտի կրկեսային ռեժիսուրայի բաժինը, այժմ սովորում է նույն բաժնի ասպիրանտուրայում։

«Հետևներիցս գալիս են»,- ասաց Սոս Պետրոսյանը։

Նա հայտնեց, որ Երևանի կրկեսին կից կրկեսային ստուդիայում ընդունելությունը շարունակվում է, ցանկացողները բավականին շատ են։ Այնտեղ ուսուցումն անվճար է։

Անդրադառնալով Ազգային ժողովի ընդունած օրենքի նախագծին, որով առաջարկվում է արգելել լիազորված մարմնի կողմից հաստատված ցանկում ընդգրկված վայրի որոշ կենդանիների օգտագործումը կրկեսներում, Ս. Պետրոսյանը նախ հիշեցրեց, որ Հայաստանը մեկ կրկես ունի, թե ինչու է օրենքում գրված կրկեսներ, չի հասկացել այդ պահը։ Ըստ նրա, կարելի է և առանց վայրի կենդանիների կրկեսային ներկայացում ունենալ, բայց համեմատություն արեց՝ կարծես ճաշն առանց աղի:

«Կենդանավարժությունը կրկեսային լավագույն ժանրերից մեկն է։ Մեր կրկեսում կենդանավարժությունը լավ ավանդույթներ ունի, լավ դերասաններ՝ Ստեփան Իսահակյան, նրա ատրակցիոնը 1960-ականներին, երբ հայկական կրկեսը փայլում էր, 1970-ականների Միքայել Բաղդասարյանը ստեղծեց «Սասունցի Դավիթ» ատրակցիոնը, որտեղ կային գայլեր, վագրեր, առյուծներ, 1980-ականների թվականներին լավագույն ատրակցիոններից մեկը ստեղծեց Գենադի Մինասյանը՝ արջերի բենեֆիսը»,- ասաց Սոս Պետրոսյանը։

Նա կրկնեց, որ կարող են առանց վայրի կենդանիների ներկայացումներ ունենալ, այդ բացը կլրացնեն բազմաժանր ակրոբատիկական ատրակցիոններով, ընտանի կենդանիներով, այնպես կանեն՝  հանդիսատեսը չզգա վայրի կենդանիների բացակայությունը։

Սոս Պետրոսյանը նշեց, որ երկու տարի առաջ այս թեմայի շուրջ հեռակա զրույց է ունեցել բնապահպանության փոխնախարարի հետ, ներկայացրել է  կենդանավարժության ավանդույթները  հայկական կրկեսային արվեստում։

«Այս օրենքը ֆինանսական առումով վնաս կհասցնի կրկեսային արվեստին, քանի որ այն ժամանակ, երբ դեռ կրկեսը գործում էր, շատերը եթե իմանում էին կենդանիներ չէին լինելու, չէին գնում տոմս»,- ասաց Երևանի կրկեսի գեղարվեստական ղեկավարը։

11 տարի առաջ հիմնովին քանդված Երևանի կրկեսի շենքի տեղում այսօր նոր շենք է արդեն կանգնած, սակայն այն դեռ իր դռները չի բացել հանդիսատեսի առջև։ Սոս Պետրոսյանն ասաց, որ շենքը հիմնովին պատրաստ է, մնում է ներքին մասնագիտական ձևավորումը։

«Ինձ թվում է էլ ուշացնելու տեղ չկա, ամեն ինչ անում են վերջացնելու ու մեր հանդիատեսին շքեղ կրկես նվիրելու ուղղությամբ։ Ասում են՝ մինչև հաջորդ տարվա սկիզբ այն պատրաստ կլինի ամբողջությամբ։  Տեսնենք։ Ժողովուրդը սպասում է շքեղ կրկեսի բացմանը։ Մենք էլ ենք սպասում՝ ավելի շատ, որպեսզի չգնանք Պարոնյանի անվան թատրոնում, այն մյուս թատրոնում ներկայացումներ բեմադրել։
Կրկեսը պետք է ունենա իր շենքը»,- ասաց նա։

Լուսանկարները՝ «Երևանի կրկեսի» ֆեյսբուքյան էջից։