Ձեր վստահելի աղբյուրը

«Ձեր խոսքով՝ 2018 թ-ից հետո հեռարձակողներին հնարավորություն տրվեց ավելի ազատ՝ առանց կառավարության միջամտության և ուղղորդման վարել խմբագրական քաղաքականություն»,- ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովում Հեռուստատեսության և ռադիոյի հանձնաժողովի նախագահ Տիգրան Հակոբյանին դիմեց «Հայաստան» խմբակցության պատգամավոր Լիլիթ Գալստյանը:

Տիգրան Հակոբյանը հանձնաժողովին ներկայացրեց «Հեռուստատեսության և ռադիոյի հանձնաժողովի 2021 թվականի գործունեության մասին տարեկան հաղորդումը»:

Չբացառելով, որ 30 տարիների ընթացքում նման ճնշումներ եղել են՝ Լիլիթ Գալստյանը նկատեց, որ այն անցյալի քաղաքական գնահատական է:

«Սա ծանր մեղադրանք է, նաև քաղաքական գնահատական՝ ապաքաղաքական մարմնի կողմից և եթե դրա իրավական հիմքերը կային, ապա ճիշտ կլիներ, որ դրանք զետեղված լինեին հաղորդման մեջ՝ նաև հանրային պախարակման համատեքստում»,- հայտարարեց պատգամավորը:

Նա Տիգրան Հակոբյանից հետաքրքրվեց, թե որոնք են ՀՌՀ-ի վարչական վարույթում հայտնված գործերի թիրախները և ընկերությունները:

«Կա քաղաքական  և իրավական գնահատական, մենք տալիս ենք այն միջավայրի գնահատականը, որը կարգավորում ենք և որի զարգացման թերությունների մասին ունենք ամբողջական տեղեկատվություն»,- պատասխանեց Հակոբյանը:

Նրա խոսքով՝ նախկին հանձնաժողովներում նման ուսումնասիրություն չի արվել, քանի որ հանձնաժողովի կարիքը չի եղել և մամուլը խրախուսվել և պատժվել է այլ տեղերից:

«Այն ազատության աստիճանը, որը հիմա է, երբեք չի եղել՝ նույնիսկ մեր՝ 90-ականների սկզբի իշխանության տարիներին, երբ մամուլը քիչ թե շատ ազատ էր»,- ասաց Տիգրան Հակոբյանը,  բայց նաև նկատեց, որ Գալստյանը կարող է բերել նաև այսօր տեղի ունեցող ճնշումների դեպքեր:

ՀՌՀ նախագահը հայտնեց, որ մանիպուլյացնում են գրեթե բոլոր հեռուստաընկերությունները:

«Մենք կարող ենք մի օր նստենք, սուրճ էլ կդնեմ, հաց էլ և միասին նայենք և կտեսնենք, որ մի ռեպորտաժում 25 մանիպուլյացիա են անում, բայց մի կողմը չի տեսնում այն, քանի որ պրոիշխանական է, մյուսն էլ՝ քանի որ ընդդիմադիր է»,- ասաց Հակոբյանը և ուսումնասիրելով իր իսկ ներկայացրած տեղեկանքը՝ հայտնեց, որ ամենաշատը վարչական վարույթ է հարուցվել «Ֆրի նյուզ» հեռուստաընկերության դեմ:

Նա նաև նշեց, որ դիմել են Բարձր տեխնոլոգիաների նախարարությանը և պարզել, որ մասնավոր մուլտիպլեքսի համար Հայաստանը հաճախականություններ չունի:

«Այսինքն, մենք նույնիսկ օրենք ենք ընդունում ԲՏԱ-ն էլ իր վիզան դնում է, բայց մենք հաճախականություներ չունենք: Հայաստանը, նույնիսկ շատ ուզենալու դեպքում էլ, մասնավոր մուլտիպլեքս չի կարող ունենալ: Այն կապված է նրա հետ, որ ժամանակին բոլոր հաճախականություններն անխնա վաճառվել են բջջային օպերատորներին»,- հայտնեց Հակոբյանը: