Ձեր վստահելի աղբյուրը

Ազգային ժողովում կառավարության հետ հարցուպատասխանի ժամանակ ընդդիմադիր պատգամավոր Արմեն Ռուստամյանի կողմից Նիկոլ  Փաշինյանի հրաժարականի հանրային պահանջը ներկայացնելուց հետո ամբիոնին մոտեցավ  Փաշինյանը՝ ասելով, որ կփորձի կետ-կետ անդրադառնալ։

«Տապալել է բանակցային գործընթացում  հայկական շահերը պաշտպանելու գործը։

Բանակցային գործընթացը տապալել է Սերժ Սարգսյանը, ինքը դրա մասին խոստովանել է  2018 թվականի ապրիլի 17-ին ԱԺ ամբիոնից արած հայտարարությամբ՝ ասելով, որ բանակցային գործընթացը կանգնած է, որովհետև Ադրբեջանի պահանջներն անիրատեսական և անընդունելի են մեզ համար։ Եվ Սերժ Սարգսյանն է այս ամբիոնից հայտարարել ապագա պատերազմի մասին, ասելով՝ այլևս երկար ժամանակ մենք չպետք է հույս ունենք, որ Ադրբեջանը չի փորձի պատերազմի ճանապարհով լուծել Ղարաբաղի հարցը։

Խոստովանել է, որ կարող էր կանխել պատերազմն ու խուսափել հազարավոր զոհերից, բայց չի արել։

Ես 2020 թվականի սեպտեմբերի 27-ին ԱԺ ամբիոնից ասել եմ՝ Հայաստանի սիրելի քաղաքացիներ, պատգամավորներ, հենց հիմա կարող եմ կանգնեցնել պատերազմը, դրա համար կա պայման, պետք է համաձայնվել, որ Լեռնային Ղարաբաղը լինի ԼՂ ինքնավար մարզի նման կարգավիճակ ունեցող մի միավոր, այսինքն Ադրբեջանի կազմում։ Եթե վերադառնանք ու միացնենք այս տրամաբանությունը Սերժ  Սարգսյանի առաջ քաշած տրամաբանությանը, կստացվի հետևյալը՝ ըստ էության պատերազմը կանխելու համար անհրաժեշտ էր  ընդունել Ադրբեջանի անիրատեսական պահանջները, այսինքն՝ ճանաչել ԼՂ-ն Ադրբեջանի կազմում։

Խոսում եք նշաձողերի մասին․ ուզում եմ հիշեցնել ձեզ, պարոն Ռուստամյան, այն պահին, նաև դուք այդ ժամանակ եղել եք կառավարության  մաս, ՀՀ-ն ընդունել է Մադրիդյան սկզբունքները որպես բանակցությունների հիմք, ահա այդ պահից դուք ճանաչել եք Ղարաբաղն Ադրբեջանի կազմում»,- ասաց Փաշինյանը։

«Տիկին Գրիգորյան, ես ձեզ դուրս կբերեմ դահլիճից, եթե այդպես շարունակեք։ Լռություն դահլիճում»,- նկատողություն արեց ԱԺ նախագահ Ալեն Սիմոնյանը։

Փաշինյանն էլ ասաց. «Հանգիստ։ Հիմա շատ կարևոր բացահայտում է հնչելու,  պետք չի թողել աղմուկ-աղաղակի մեջ  կորի։ Արձագանեք, կասեմ»։

Արմեն Ռուստամյանն ասաց. «Այս ժամանակային անհավասարությունը, բնականաբար, հնարավորություն չի տալիս, որ ձեզ ավելի մանրամասն ներկայացնենք, որ դուք չեք  տիրապետում Ղարաբաղի հարցի կարգավորմանը. ի սկզբանե այդպես է եղել, հիմա էլ դուք դա շարունակում եք անել։ Եթե ձեզ թվում է, թե նախկինների վրա  մեղքեր բարդելով դուք կարող եք արդարացնել այն  ձախողումները, որոնք դուք եք բերել այս երկրի գլխին,  չարաչար սխալվում եք։

Ես ձեզ հիշեցնեմ, 2018 թվականին մենք բանավեճ ենք ունեցել, որի ժամանակ ձեզ հարցրել եմ՝  երբ դառնաք վարչապետ, պարտավորվո՞ւմ եք իրականացնել այն, ինչ  Ղարաբաղի ժողովուրդն իր Սահմանադրության 175-րդ հոդվածով նախատեսել է։ Ասել եք՝  այո։ Դրա մասին խոսեք։ Ինչո՞ւ չեք առաջնորդվել Ղարաբաղի  ժողովրդի կամքի իրականացման պատասխանատվությամբ։ Հիմա ի՞նչ կապ ունի, ով ինչ է արել ժամանակին։ Դուք եք եկել վարչապետ և պարտավոր էիք այդ կամքն իրականացնել։ Այդ կամքի իրականացման խոստումը դուք եք տվել։ Հիմա հարց եմ ձեզ տալիս՝ դրանից հետո դուք ինքներդ եք հայտարարել, որ անգամ չեք տեսնում տեսական  հնարավորություն Արցախն Ադրբեջանի կազմից հանելու։ Եթե դուք այդ տեսակետի վրա եք, մնում եք վարչապետ ո՞ր ինչ անեք։ Որ թողեք Արցախն Ադրբեջանի կազմո՞ւմ։ Սրան պատասխանեք»։

Փաշինյանը ասաց. «Ուշադրություն դարձրեք, որ ձեզ ժամանակային սահմանափակում չդրվեց, ձեր ասելիքն ամբողջությամբ ասեցիք…Ախ չեք ուզում լսել։ Բա դա էինք սպասում։  Ախ չեք ուզում լսել։ Բա էդ ասեք, բա էդ ասեք։ Ոնց միշտ փախել եք, տենց միշտ փախնելու եք»։

Ընդդիմադիր պատգամավորներն այդ պահին լքեցին ԱԺ նիստերի դահլիճը, իսկ ՔՊ-ականները ծափահարեցին։

«Կեցցե  հայկական ժողովրդավարությունը »,- գոռաց Փաշինյանը։

«Նիկոլ վարչապետ»,-  բղավեցին ՔՊ-ականները։

«Հենց ասացի, որ բացահայտում է  հնչելու, թողեցին փախան»,- ասաց Փաշինյանը, որից հետո ԱԺ-ում հայտարարվեց ընդմիջում։

Ընդմիջումից հետո Փաշինյանն ասաց, որ պատշաճ չի համարում հետևից հարցին պատասխանել, հույս ունի ընդդիմադիրներն այդ հարցով կվերադառնան։

«Կանոնակարգը թույլ չի տալիս, բայց, կարծում ենք, բացառիկ պայմաններում կարող ենք հարցի պատասխանը առկախել մինչև մեր գործընկերների վերադարձը դահլիճ»,- նշեց նա։